ਨਡਾਲਾ, 17 ਮਈ (ਰਘਬਿੰਦਰ ਸਿੰਘ)-ਦੁਨੀਆ ਭਰ ਵਿਚ ਜਾਣੀ ਪਹਿਚਾਣੀ ਅਤੇ ਇੱਕੋ ਇੱਕ ਨੋਬਲ ਪੁਰਸਕਾਰ-ਵਿਜੇਤਾ ਭਾਰਤੀ ਸਾਹਿਤਕਾਰ ਅਤੇ ਬਹੁ-ਪਸਾਰੀ ਸ਼ਖ਼ਸੀਅਤ ਰਬਿੰਦਰਨਾਥ ਟੈਗੋਰ ਜੀ ਦਾ 165ਵਾਂ ਜਨਮ ਦਿਹਾੜਾ ਬਹੁਤ ਹੀ ਉਤਸ਼ਾਹ ਨਾਲ ਗੁਰੂ ਹਰਗੋਬਿੰਦ ਪਬਲਿਕ ਸਕੂਲ ਨਡਾਲਾ ਵਿਖੇ ਮਨਾਇਆ ਗਿਆ | ਇਸ ਮੌਕੇ ਤੇ ਸਕੂਲ ਦੇ 20 ਵਿਦਿਆਰਥੀਆਂ ਵੱਲੋਂ ਇੰਟਰ ਹਾਊਸ ਇੰਗਲਿਸ਼ ਕਵਿਤਾ ਉਚਾਰਨ ਮੁਕਾਬਲੇ ਵਿਚ ਭਾਗ ਲਿਆ ਗਿਆ | ਸਕੂਲ ਵਿਦਿਆਰਥੀਆਂ ਨੇ ਰਬਿੰਦਰਨਾਥ ਟੈਗੋਰ ਜੀ ਦੁਆਰਾ ਰਚਿਤ ਕਿਤਾਬ 'ਗੀਤਾਂਜਲੀ' ਵਿਚ ਦਰਜ ਕਵਿਤਾਵਾਂ ਦਾ ਸਫਲ ਉਚਾਰਨ ਕੀਤਾ | ਇਸ ਮੌਕੇ ਅਮਲਤਾਸ ਹਾਊਸ ਦੀ ਵਿਦਿਆਰਥਣ ਲਵਪ੍ਰੀਤ ਕੌਰ ਨੇ ਪਹਿਲਾ, ਕਿਚਨਾਰ ਹਾਊਸ ਦੀ ਵਿਦਿਆਰਥਣ ਪ੍ਰਭਜੋਤ ਕੌਰ ਨੇ ਦੂਜਾ ਅਤੇ ਅਮਲਤਾਸ ਹਾਊਸ ਦੀ ਵਿਦਿਆਰਥਣ ਮਨਪ੍ਰੀਤ ਕੌਰ ਨੇ ਤੀਜਾ ਸਥਾਨ ਹਾਸਲ ਕੀਤਾ | ਗੁਲਮੋਹਰ ਹਾਊਸ ਦੀ ਵਿਦਿਆਰਥਣ ਗੁਰਲੀਨ ਕੌਰ ਅਤੇ ਅਮਲਤਾਸ ਹਾਊਸ ਦੀਆਂ ਵਿਦਿਆਰਥਣਾਂ ਤਰਨਪ੍ਰੀਤ ਕੌਰ ਅਤੇ ਅਨੂਪਬੀਰ ਕੌਰ ਨੂੰ ਕੌਨਸੋਲੇਸ਼ਨ ਪ੍ਰਾਈਜ਼ ਦਿੱਤੇ ਗਏ | ਇਸ ਮੌਕੇ ਵਿੱਦਿਅਕ ਖੇਤਰ ਵਿਚ ਜਾਣੀ-ਪਹਿਚਾਣੀ ਅਤੇ ''ਟੈਗੋਰ ਐਂਡ ਮੀ'' ਕਾਵਿ ਸੰਗ੍ਰਹਿ ਦੀ ਰਚਨਹਾਰੀ ਮੈਡਮ ਪ੍ਰੋਮਿਲਾ ਅਰੋੜਾ ਮੁੱਖ ਮਹਿਮਾਨ ਦੇ ਤੌਰ ਤੇ ਅਤੇ ਹਰਨਿੰਦਰਜੀਤ ਕੌਰ (ਟੀਚਰ ਅਤੇ ਰੇਡੀਓ-ਟੀਵੀ ਪ੍ਰੈਜ਼ੈਂਟੇਟਰ ) ਵਿਸ਼ੇਸ਼ ਮਹਿਮਾਨ ਵਜੋਂ ਪ੍ਰੋਗਰਾਮ ਵਿਚ ਸ਼ਾਮਲ ਹੋਏ | ਪ੍ਰੋਗਰਾਮ ਦੇ ਸ਼ੁਰੂ ਵਿਚ ਸਕੂਲ ਚੇਅਰਮੈਨ ਡਾ. ਆਸਾ ਸਿੰਘ ਘੁੰਮਣ ਨੇ ਟੈਗੋਰ ਦੇ ਪੰਜਾਬ ਨਾਲ ਗਹਿਰੇ ਸੰਬੰਧਾਂ ਬਾਰੇ ਚਾਨਣਾ ਪਾਇਆ | ਪ੍ਰੋਮਿਲਾ ਅਰੋੜਾ ਨੇ ਸ਼ਾਂਤੀਨੀਕੇਤਨ ਵੱਲੋਂ ਸਨਮਾਨਿਤ ਕੀਤੇ ਜਾਣ ਦੇ ਮੌਕੇ ਦੀਆਂ ਯਾਦਾਂ ਸਾਂਝੀਆਂ ਕੀਤੀਆਂ | ਹਰਨਿੰਦਰਜੀਤ ਨੇ ਜੱਜਮੈਂਟ ਸੁਣਾਉਂਦਿਆਂ ਬਹੁਮੁੱਲੇ ਨੁਕਤੇ ਅਤੇ ਵਡਮੁੱਲੇ ਵਿਚਾਰ ਸਾਂਝੇ ਕੀਤੇ | ਜੇਤੂਆਂ ਨੂੰ ਟਰਾਫ਼ੀਆਂ ਅਤੇ ਨਗਦ ਇਨਾਮ ਪ੍ਰਦਾਨ ਕੀਤੇ ਗਏ | ਇਸ ਮੌਕੇ ਸਕੂਲ ਪਿ੍ੰਸੀਪਲ ਮਨਪ੍ਰੀਤ ਕੌਰ, ਮੈਡਮ ਸਰਬਜੀਤ ਕੌਰ, ਮੈਡਮ ਖ਼ੁਸ਼ਬੂ ਅਤੇ ਈਵੈਂਟ ਇੰਚਾਰਜ ਨਰਿੰਦਰ ਕੁਮਾਰ ਹਾਜ਼ਰ ਸਨ |
