ਦੋ ਅਮਰੀਕੀ ਤੇ ਇਕ ਬਿ੍ਟਿਸ਼ ਵਿਗਿਆਨਕ ਨੂੰ ਮਿਲਿਆ ਕੈਮਿਸਟਰੀ ਦਾ ਨੋਬਲ ਪੁਰਸਕਾਰ

ਸਟਾਕਹੋਮ, 9 ਅਕਤੂਬਰ- ਕੈਮਿਸਟਰੀ 2024 ਲਈ ਨੋਬਲ ਪੁਰਸਕਾਰ ਦਾ ਐਲਾਨ ਕਰ ਦਿੱਤਾ ਗਿਆ ਹੈ। ਇਸ ਸਾਲ 3 ਵਿਗਿਆਨੀਆਂ ਨੂੰ ਇਹ ਇਨਾਮ ਦਿੱਤਾ ਗਿਆ ਹੈ। ਇਨ੍ਹਾਂ ਵਿਚ ਅਮਰੀਕੀ ਵਿਗਿਆਨੀ ਡੇਵਿਡ ਬੇਕਰ, ਜੌਨ ਜੰਪਰ ਅਤੇ ਬ੍ਰਿਟਿਸ਼ ਵਿਗਿਆਨੀ ਡੇਮਿਸ ਹੈਸਾਬਿਸ ਸ਼ਾਮਿਲ ਹਨ। ਇਸ ਵਾਰ ਇਸ ਨੋਬਲ ਇਨਾਮ ਨੂੰ ਦੋ ਭਾਗਾਂ ਵਿਚ ਵੰਡਿਆ ਗਿਆ ਹੈ। ਪਹਿਲਾ ਹਿੱਸਾ ਡੇਵਿਡ ਬੇਕਰ ਨੂੰ ਦਿੱਤਾ ਗਿਆ, ਜਿਨ੍ਹ ਨੇ ਇਕ ਨਵੀਂ ਕਿਸਮ ਦਾ ਪ੍ਰੋਟੀਨ ਬਣਾਇਆ ਹੈ। ਪ੍ਰੋਟੀਨ ਡਿਜ਼ਾਈਨ ਇਕ ਤਕਨੀਕ ਹੈ, ਜਿਸ ਵਿਚ ਪ੍ਰੋਟੀਨ ਦੀ ਬਣਤਰ ਨੂੰ ਬਦਲ ਕੇ ਨਵੀਆਂ ਵਿਸ਼ੇਸ਼ਤਾਵਾਂ ਵਾਲੇ ਪ੍ਰੋਟੀਨ ਤਿਆਰ ਕੀਤੇ ਜਾਂਦੇ ਹਨ। ਇਹ ਦਵਾਈਆਂ ਅਤੇ ਟੀਕੇ ਬਣਾਉਣ ਵਿਚ ਮਦਦ ਕਰਦਾ ਹੈ। ਇਨਾਮ ਦਾ ਦੂਜਾ ਹਿੱਸਾ ਡੇਮਿਸ ਅਤੇ ਜੌਨ ਜੰਪਰ ਨੂੰ ਦਿੱਤਾ ਗਿਆ, ਜਿਨ੍ਹਾਂ ਨੇ ਇਕ ਏ.ਆਈ. ਮਾਡਲ ਬਣਾਇਆ, ਜੋ ਗੁੰਝਲਦਾਰ ਪ੍ਰੋਟੀਨ ਦੀ ਬਣਤਰ ਨੂੰ ਸਮਝਣ ਵਿਚ ਮਦਦ ਕਰਦਾ ਹੈ।