ਨੋਏਲ ਟਾਟਾ ਸੰਭਾਲਣਗੇ ਟਾਟਾ ਟਰੱਸਟ ਦੀ ਕਮਾਂਡ

ਮਹਾਰਾਸ਼ਟਰ, 11 ਅਕਤੂਬਰ- ਰਤਨ ਟਾਟਾ ਦੀ ਮੌਤ ਤੋਂ ਬਾਅਦ ਸਮੂਹ ਦੇ ਸਭ ਤੋਂ ਵੱਡੇ ਹਿੱਸੇਦਾਰ ਟਾਟਾ ਟਰੱਸਟ ਦੀ ਕਮਾਨ ਉਨ੍ਹਾਂ ਦੇ ਮਤਰੇਏ ਭਰਾ ਨੋਏਲ ਟਾਟਾ ਨੂੰ ਸੌਂਪ ਦਿੱਤੀ ਗਈ ਹੈ। ਅੱਜ ਮੁੰਬਈ ’ਚ ਹੋਈ ਬੈਠਕ ’ਚ ਟਰੱਸਟ ਦੇ ਚੇਅਰਮੈਨ ਦੇ ਤੌਰ ’ਤੇ ਨੋਏਲ ਦੇ ਨਾਂਅ ’ਤੇ ਸਹਿਮਤੀ ਬਣ ਗਈ ਹੈ। ਨੋਏਲ ਟਾਟਾ ਆਪਣੇ ਪਰਿਵਾਰਕ ਸੰਬੰਧਾਂ ਅਤੇ ਸਮੂਹ ਦੀਆਂ ਕਈ ਕੰਪਨੀਆਂ ਵਿਚ ਸ਼ਮੂਲੀਅਤ ਕਾਰਨ ਟਾਟਾ ਦੀ ਵਿਰਾਸਤ ਨੂੰ ਅੱਗੇ ਵਧਾਉਣ ਲਈ ਇਕ ਮਜ਼ਬੂਤ ​​ਦਾਅਵੇਦਾਰ ਸਨ। ਨੋਏਲ ਟਾਟਾ ਪਹਿਲਾਂ ਹੀ ਸਰ ਦੋਰਾਬਜੀ ਟਾਟਾ ਟਰੱਸਟ ਅਤੇ ਸਰ ਰਤਨ ਟਾਟਾ ਟਰੱਸਟ ਦੇ ਟਰੱਸਟੀ ਹਨ। ਨੋਏਲ ਟਾਟਾ ਗਰੁੱਪ ਦੀ ਕੰਪਨੀ ਟਰੇਂਟ ਐਂਡ ਵੋਲਟਾਸ ਦੇ ਚੇਅਰਮੈਨ ਵੀ ਹਨ। ਉਹ ਟਾਟਾ ਸਟੀਲ ਅਤੇ ਟਾਈਟਨ ਦੇ ਵਾਈਸ ਚੇਅਰਮੈਨ ਵੀ ਹਨ।