ਮਮਦੋਟ/ਫਿਰੋਜ਼ਪੁਰ, 2 ਜੁਲਾਈ (ਸੁਖਦੇਵ ਸਿੰਘ ਸੰਗਮ)- ਮਮਦੋਟ ਬਲਾਕ ਦੇ ਪਿੰਡ ਰਾਓ ਕੇ ਹਿਠਾੜ ਵਿਖੇ ਅੱਜ ਲਛਮਣ ਨਹਿਰ ਵਿਚ ਪਾੜ ਪੈਣ ਨਾਲ ਸੈਂਕੜੇ ਏਕੜ ਰਕਬਾ ਪਾਣੀਂ ਵਿਚ ਡੁੱਬ ਗਿਆ। ਪਿੰਡ ਵਾਸੀਆਂ ਨੇ ਦੱਸਿਆ ਕਿ ਅੱਜ ਸਵੇਰੇ ਕਰੀਬ 8 ਵਜੇ ਪਿੰਡ ਵਿਚੋਂ ਲੰਘਦੀ ਲਛਮਣ ਨਹਿਰ (ਮਮਦੋਟ ਡਿਸਟ੍ਰੀਬਿਉਟਰੀ) ਵਿਚ ਕਰੀਬ 20 ਫੁੱਟ ਚੌੜਾ ਪਾੜ ਪੈ ਗਿਆ ਜਿਸ ਨਾਲ ਇਸ ਪਾਸ ਦੇ ਪਿੰਡਾਂ ਫਾਰੂ ਵਾਲਾ, ਚੱਕ ਰਾਓ ਕੇ, ਗੱਟੀ ਮੱਤੜ ਅਤੇ ਰਾਓ ਕੇ ਹਿਠਾੜ ਆਦਿ ਦੇ ਲਗਭਗ 200 ਏਕੜ ਨੀਵੇਂ ਰਕਬੇ ਵਿਚ ਤਾਜ਼ੀ ਲੱਗੀ ਝੋਨੇ ਦੀ ਫ਼ਸਲ ਪਾਣੀ ਦੀ ਮਾਰ ਹੇਠ ਆ ਗਈ ਜਿਸਦਾ ਨਿਕਾਸ ਨਾਂ ਹੋਣ ਕਾਰਨ ਫ਼ਸਲ ਖ਼ਰਾਬ ਹੋਣ ਦਾ ਖਦਸ਼ਾ ਜਤਾਇਆ ਜਾ ਰਿਹਾ ਹੈ।
ਸੂਚਨਾ ਮਿਲਦੇ ਹੀ ਸਿੰਚਾਈ ਵਿਭਾਗ ਦੇ ਅਧਿਕਾਰੀ ਅਤੇ ਕਰਮਚਾਰੀ ਮੌਕੇ ਤੇ ਪੁੱਜ ਗਏ ਹਨ ਤੇ ਪਾੜ ਨੂੰ ਭਰਨ ਦੇ ਯਤਨ ਕੀਤੇ ਜਾ ਰਹੇ ਹਨ।
