22-01-2026

 ਬਸੰਤ ਦਾ ਤਿਉਹਾਰ ਤੇ ਚਾਈਨਾ ਡੋਰ
ਬਸੰਤ ਦਾ ਤਿਉਹਾਰ ਲਹਿੰਦੇ ਤੇ ਚੜ੍ਹਦੇ ਪੰਜਾਬ ਵਿਚ ਪਤੰਗਾਂ ਚੜ੍ਹਾ ਕੇ ਪੂਰੇ ਉਤਸ਼ਾਹ ਨਾਲ ਮਨਾਇਆ ਜਾਂਦਾ ਹੈ। ਪਹਿਲੇ ਸਮਿਆਂ 'ਚ ਪਿੰਡਾਂ, ਸ਼ਹਿਰਾਂ ਤੇ ਕਸਬਿਆਂ ਵਿਚ ਸਾਦੇ ਧਾਗੇ ਨੂੰ ਮਾਂਝਾ ਲਗਾ ਕੇ ਡੋਰ ਤਿਆਰ ਕੀਤੀ ਜਾਂਦੀ ਸੀ, ਜਿਸ ਨਾਲ ਪਤੰਗ ਉਡਾਉਣ ਤੇ ਡੋਰ ਨਾਲ ਪੇਚੇ ਲਗਾ ਕੇ ਕੱਟੇ ਜਾਣ ਨਾਲ ਕੋਈ ਜਾਨੀ ਨੁਕਸਾਨ ਨਹੀਂ ਹੁੰਦਾ ਸੀ। ਹੁਣ ਚਾਈਨਾ ਡੋਰ ਨਾਲ ਪਤੰਗ ਚੜ੍ਹਾਏ ਜਾਂਦੇ ਹਨ, ਇਹ ਡੋਰ ਲੋਹੇ ਤੇ ਕੱਚ ਆਦਿ ਦੀ ਪਰਤ ਚੜ੍ਹਾ ਕੇ ਤਿਆਰ ਕੀਤੀ ਜਾਂਦੀ ਹੈ, ਜੋ ਕਿ ਪਤੰਗਬਾਜ਼ੀ ਕਰਨ ਮੌਕੇ ਪੇਚੇ ਲਗਾਉਣ ਸਮੇਂ ਕੱਟਣੀ ਮੁਸ਼ਕਿਲ ਹੋ ਜਾਂਦੀ ਹੈ। ਪਤੰਗ ਚੜ੍ਹਾਉਣ ਲਈ ਬੱਚਿਆਂ, ਨੌਜਵਾਨਾਂ ਵਲੋਂ ਇਹੀ ਡੋਰ ਖਰੀਦੀ ਜਾਂਦੀ ਹੈ। ਭਾਵੇਂ ਕਿ ਪ੍ਰਸ਼ਾਸਨ, ਪੁਲਿਸ ਵਲੋਂ ਇਹ ਡੋਰ ਖਰੀਦਣ ਤੇ ਵੇਚਣ 'ਤੇ ਪੂਰਨ ਪਾਬੰਦੀ ਲਗਾਈ ਗਈ ਹੈ, ਪ੍ਰੰਤੂ ਫਿਰ ਵੀ ਕਈ ਥਾਵਾਂ 'ਤੇ ਇਹ ਧੜੱਲੇ ਨਾਲ ਵਿਕ ਰਹੀ ਹੈ। ਇਸ ਡੋਰ ਨਾਲ ਰਾਹਗੀਰ, ਪੰਛੀ ਜ਼ਖ਼ਮੀ ਹੋ ਜਾਂਦੇ, ਡੋਰ ਬਿਜਲੀ ਦੀਆਂ ਤਾਰਾਂ ਵਿਚ ਫਸ ਜਾਣ ਕਾਰਨ ਅਣਸੁਖਾਵੀਂ ਘਟਨਾ ਵਾਪਰ ਜਾਂਦੀ ਹੈ। ਲੋਹੜੀ ਅਤੇ ਬਸੰਤ ਦੇ ਤਿਉਹਾਰ ਦੌਰਾਨ ਇਸ ਡੋਰ ਦੀ ਵਿਕਰੀ ਹੋਰ ਵੀ ਵਧ ਜਾਂਦੀ ਹੈ ਅਤੇ ਪਤੰਗਬਾਜ਼ੀ ਕੀਤੀ ਜਾਂਦੀ ਹੈ ਭਾਵੇਂ ਪੁਲਿਸ ਦੀ ਚੈਕਿੰਗ ਵੀ ਵਧ ਜਾਂਦੀ ਹੈ, ਫਿਰ ਵੀ ਚੋਰੀ-ਛਿਪੇ ਡੋਰ ਵੇਚੀ ਤੇ ਖ਼ਰੀਦੀ ਜਾਂਦੀ ਹੈ। ਪ੍ਰਸ਼ਾਸਨ ਅਤੇ ਪੁਲਿਸ ਨੂੰ ਚਾਈਨਾ ਡੋਰ ਵੇਚਣ ਤੇ ਖ਼ਰੀਦਣ ਵਾਲਿਆਂ 'ਤੇ ਸਖ਼ਤ ਕਾਰਵਾਈ ਕਰਨੀ ਚਾਹੀਦੀ ਹੈ, ਤਾਂ ਜੋ ਤਿਉਹਾਰਾਂ ਦੌਰਾਨ ਵਾਪਰਨ ਵਾਲੇ ਹਾਦਸਿਆਂ ਤੋਂ ਬਚਾਅ ਹੋ ਸਕੇ ਅਤੇ ਖ਼ੁਸ਼ੀ ਦੇ ਤਿਉਹਾਰ ਨੂੰ ਗ਼ਮੀ ਵਿਚ ਬਦਲਣ ਤੋਂ ਰੋਕਿਆ ਜਾ ਸਕੇ।

-ਅਮਰੀਕ ਸਿੰਘ ਚੀਮਾ
ਸ਼ਾਹਬਾਦੀਆ, ਜਲੰਧਰ।

ਉਦਾਸੀ ਨੂੰ ਦੂਰ ਕਰੋ

'ਸਾਡੀ ਸਿਹਤ' ਮੈਗਜ਼ੀਨ ਵਿਚ ਪੂਨਮ ਦਿਨਕਰ ਦਾ ਲੇਖ 'ਉਦਾਸੀ ਨੂੰ ਦੂਰ ਕਰਨ ਦੇ ਰਾਜ਼' ਪੜ੍ਹਿਆ ਸੀ। ਪਦਾਰਥਵਾਦੀ ਸਮੇਂ ਵਿਚ ਮਨੁੱਖ ਅੰਨਾ ਵਹਿ ਗਿਆ ਹੈ। ਉਸ ਨੂੰ ਆਪਣੇ ਆਸ-ਪਾਸ ਦੀ ਖ਼ਬਰ ਨਹੀਂ ਹੈ। ਮਨੁੱਖ ਜਿੰਨੀ ਮਰਜ਼ੀ ਕਮਾਈ ਕਰ ਲਵੇ ਉਸ ਨੂੰ ਸਬਰ-ਸਬੂਰੀ ਨਹੀਂ ਹੈ। ਅੱਜ ਘੋਰ ਨਿਰਾਸ਼ਾ 'ਚੋਂ ਗੁਜ਼ਰ ਰਿਹਾ ਹੈ। ਖ਼ੁਸ਼ੀ ਉਸ ਦੇ ਨੇੜੇ ਨਹੀਂ ਢੁਕਦੀ, ਘੋਰ ਨਿਰਾਸ਼ਾ 'ਚੋਂ ਨਿਕਲਣ ਲਈ ਅਨੇਕਾਂ ਯਤਨ ਕਰ ਰਿਹਾ ਹੈ। ਉਸ ਨੂੰ ਰਸਤਾ ਨਹੀਂ ਲੱਭ ਰਿਹਾ। ਉਦਾਸੀ ਤੋਂ ਬਚਣ ਲਈ ਲੇਖਕ ਨੇ ਸਾਨੂੰ ਅਨੇਕਾਂ ਉਪਾਅ ਦੱਸੇ ਹਨ, ਜਿਨ੍ਹਾਂ ਨੂੰ ਅਸੀਂ ਜੀਵਨ ਵਿਚ ਧਾਰਨ ਕਰਕੇ ਉਦਾਸੀ ਨੂੰ ਦੂਰ ਕਰ ਸਕਦੇ ਹਾਂ। ਪਹਿਲਾਂ ਤਾਂ ਸਾਨੂੰ ਜਿੰਨਾ ਕਮਾ ਰਹੇ ਹਾਂ, ਉਸ ਨੂੰ ਵਿਚਾਰ ਕੇ ਸਬਰ ਕਰਨਾ ਪਵੇਗਾ। ਜੀਵਨ ਵਿਚ ਖ਼ਰਚਿਆਂ ਨੂੰ ਘੱਟ ਕਰੋ, ਫਾਲਤੂ ਖ਼ਰਚ ਤੋਂ ਬਚੋ। ਦੋਸਤਾਂ-ਮਿੱਤਰਾਂ ਨਾਲ ਰਾਬਤਾ ਕਾਇਮ ਰੱਖੋ। ਉਨ੍ਹਾਂ ਨਾਲ ਮਨ ਦੀਆਂ ਗੱਲਾਂ ਸਾਂਝੀਆਂ ਕਰੋ। ਅਖ਼ਬਾਰ ਵਿਚ ਵੱਖ-ਵੱਖ ਛਪਦੇ ਲੇਖ ਨੂੰ ਪੜ੍ਹੋ, ਸੰਪਾਦਕ ਨਾਂਅ ਖ਼ਤ ਲਿਖੋ, ਮਨ ਨੂੰ ਸਕੂਨ ਦੇਵੇਗਾ। ਸਮਾਜ ਵਿਚ ਅਜਿਹੇ ਬੰਦਿਆਂ ਨਾਲ ਰਾਬਤਾ ਪੈਦਾ ਕਰੋ ਜੋ ਜੀਵਨ ਲਈ ਵਧੀਆ ਵਿਚਾਰ, ਚੰਗੀ ਸਲਾਹ ਦੇਣ ਵਾਲੇ ਹੋਣ।

-ਰਾਮ ਸਿੰਘ ਪਾਠਕ

ਦੁਰਘਟਨਾਵਾਂ ਨੂੰ ਬੁਲਾਵਾ

ਅੱਜਕੱਲ੍ਹ ਜਲੰਧਰ-ਪਠਾਨਕੋਟ ਹਾਈਵੇਅ ਦੇ ਨਾਲ ਹੀ ਸੜਕ ਦੀ ਸਾਈਡ 'ਤੇ ਪਾਈਪ ਪਾਉਣ ਲਈ ਸੜਕ ਨੂੰ ਪੁੱਟਿਆ ਜਾ ਰਿਹਾ ਹੈ ਅਤੇ ਸੜਕ ਨੂੰ ਪੁੱਟ ਕੇ ਜੋ ਮਿੱਟੀ ਬਾਹਰ ਰਹਿ ਜਾਂਦੀ ਹੈ ਉਸ ਨੂੰ ਸੜਕ ਕਿਨਾਰੇ ਹੀ ਢੇਰੀਆਂ ਲਗਾ ਦਿੱਤੀਆਂ ਗਈਆਂ ਹਨ। ਧੁੰਦ ਦੇ ਮੌਸਮ ਹੋਣ ਕਾਰਨ ਆਉਂਦੇ-ਜਾਂਦੇ ਰਾਹਗੀਰਾਂ ਲਈ ਇਹ ਮਿੱਟੀ ਦੀਆਂ ਢੇਰੀਆਂ ਵੱਡੀ ਸਮੱਸਿਆ ਦਾ ਕਾਰਨ ਬਣ ਚੁੱਕੀਆਂ ਹਨ, ਜਦਕਿ ਕੰਪਨੀ ਨੂੰ ਪਹਿਲਾਂ ਤਾਂ ਚਾਹੀਦਾ ਹੈ ਕਿ ਮਿੱਟੀ ਦੀ ਢੇਰੀ ਨੂੰ ਸੜਕ ਦੇ ਦੂਜੇ ਪਾਸੇ ਲਗਾਇਆ ਜਾਵੇ। ਜੇਕਰ ਸੜਕ ਵਾਲੇ ਪਾਸੇ ਵੀ ਲਗਾਉਣਾ ਹੈ ਤਾਂ ਇਸ ਦੇ ਨਾਲ ਕੋਈ ਰੇਡੀਏਟਰ ਵਰਗੀ ਕੋਈ ਚੀਜ਼ ਲਗਾ ਦਿੱਤੀ ਜਾਵੇ, ਤਾਂ ਜੋ ਗੱਡੀਆਂ ਵਾਲਿਆਂ ਨੂੰ ਦੂਰ ਤੋਂ ਹੀ ਉਸ ਦੀ ਲਾਈਟ ਨਜ਼ਰ ਆ ਜਾਵੇ ਅਤੇ ਉਹ ਸਾਵਧਾਨ ਹੋ ਜਾਣ। ਪਰ ਕੰਪਨੀ ਵਲੋਂ ਇਨ੍ਹਾਂ ਗੱਲਾਂ ਨੂੰ ਅਣਗੌਲਿਆ ਕਰਦੇ ਹੋਏ ਸੜਕ ਦੇ ਕਿਨਾਰਿਆਂ 'ਤੇ ਹੀ ਮਿੱਟੀ ਦੇ ਢੇਰ ਲਗਾਏ ਜਾ ਰਹੇ ਹਨ। ਸਾਡੀ ਸਰਕਾਰ ਨੂੰ ਬੇਨਤੀ ਹੈ ਕਿ ਇਸ ਖ਼ਿਲਾਫ਼ ਬਣਦੀ ਕਾਰਵਾਈ ਕੀਤੀ ਜਾਵੇ, ਤਾਂ ਜੋ ਸੜਕ 'ਤੇ ਚਲ ਰਹੇ ਵਾਹਨ ਚਾਲਕ ਸੁਰੱਖਿਅਤ ਆਪਣੇ ਘਰਾਂ ਨੂੰ ਪਹੁੰਚ ਸਕਣ।

-ਅਸ਼ੀਸ਼ ਸ਼ਰਮਾ ਜਲੰਧਰ।

ਨਸ਼ਾ ਅਤੇ ਖਿਡਾਰੀ

13 ਜਨਵਰੀ ਦੇ ਖੇਡ ਜਗਤ ਅੰਕ ਵਿਚ ਖਿਡਾਰੀ ਬਨਾਮ ਡੋਪਿੰਗ ਸਿਰਲੇਖ ਹੇਠ ਵੀਰਪਾਲ ਗਿੱਲ ਸਮਰਾਲਾ ਦਾ ਲਿਖਿਆ ਲੇਖ ਪੜ੍ਹਿਆ। ਲੇਖਕ ਨੇ ਮਹੱਤਵਪੂਰਨ ਮੁੱਦੇ 'ਤੇ ਲਿਖ ਕੇ ਖਿਡਾਰੀਆਂ ਵਿਚ ਵਧ ਰਹੀ ਨਸ਼ਿਆਂ ਦੀ ਪ੍ਰਵਿਰਤੀ ਸੰਬੰਧੀ ਆਪਣੀ ਚਿੰਤਾ ਦਾ ਪ੍ਰਗਟਾਵਾ ਕੀਤਾ ਹੈ। ਮੇਰੀ ਸਰਕਾਰ ਨੂੰ ਅਪੀਲ ਹੈ ਕਿ ਉਹ ਇਸ ਮਾਮਲੇ ਨੂੰ ਗੰਭੀਰਤਾ ਨਾਲ ਲਵੇ ਅਤੇ ਜੋ ਖਿਡਾਰੀ ਨਸ਼ਾ ਕਰਦੇ ਹਨ ਉਨ੍ਹਾਂ ਨੂੰ ਖੇਡ ਮੈਦਾਨਾਂ ਤੋਂ ਬਾਹਰ ਦਾ ਰਸਤਾ ਦਿਖਾਇਆ ਜਾਵੇ। ਇਸ ਸੰਬੰਧੀ ਡੋਪਿੰਗ ਟੈਸਟ ਹੇਠਲੇ ਪੱਧਰ 'ਤੇ ਸਖ਼ਤੀ ਨਾਲ ਲਾਗੂ ਕੀਤੇ ਜਾਣਾ ਵੀ ਇਸ ਮਸਲੇ ਵਿਚ ਕਾਫੀ ਸਹਿਯੋਗ ਦੇ ਸਕਦਾ ਹੈ।

-ਫ਼ਤਿਹਵੀਰ ਸਿੰਘ
ਮੁਲਤਾਨੀਆ ਰੋਡ, ਬਠਿੰਡਾ।