10-02-26

 ਕੂੜੇ ਦੀ ਸਮੱਸਿਆ
ਪੰਜਾਬ ਦੇ ਸ਼ਹਿਰਾਂ ਵਿਚ ਇਕ ਵਾਰ ਫਿਰ ਕੂੜੇ ਦੀ ਸਮੱਸਿਆ ਵਧਣ ਲਗ ਪਈ ਹੈ। ਪਹਿਲਾਂ ਕੂੜੇ ਦੇ ਡੰਪ ਸਾਫ਼ ਹੋਣੇ ਸ਼ੁਰੂ ਹੋ ਗਏ ਸਨ-ਜਿਸ ਕਰਕੇ ਲੋਕਾਂ ਨੇ ਸੁੱਖ ਦਾ ਸਾਹ ਲਿਆ ਸੀ। ਪਰ ਹੁਣ ਉਨ੍ਹਾਂ ਡੰਪਾਂ 'ਤੇ ਇਕ ਵਾਰ ਫਿਰ ਕੂੜਾ ਵਧਣ ਲੱਗ ਪਿਆ ਹੈ। ਨਿਗਮਾਂ ਅਤੇ ਪ੍ਰਸ਼ਾਸਨ ਨੇ ਇਸ ਸਮੱਸਿਆ ਨੂੰ ਹੱਲ ਕਰਨ ਲਈ ਕਈ ਵਿਚਾਰ ਕੀਤੇ ਪਰ ਫਿਰ ਵੀ ਇਹ ਸਮੱਸਿਆ ਹੱਲ ਹੋਣ ਦਾ ਨਾਂਅ ਨਹੀਂ ਲੈ ਰਹੀ। 50 ਕਿੱਲੋ ਕੂੜਾ ਡੰਪਾਂ 'ਤੇ ਸੁੱਟਣ ਵਾਲਿਆਂ ਦੇ ਚਲਾਨ ਹੋਣੇ ਚਾਹੀਦੇ ਹਨ। ਜਿੰਨੀ ਦੇਰ ਤੱਕ ਕੂੜਾ ਡੰਪਾਂ 'ਤੇ ਆਉਣਾ ਬੰਦ ਨਹੀਂ ਹੁੰਦਾ ਓਨੀ ਦੇਰ ਤਕ ਸ਼ਹਿਰਾਂ ਵਿਚ ਕੂੜੇ ਦੀ ਸਮੱਸਿਆ ਸੁਧਰਨ ਵਾਲੀ ਨਹੀਂ ਹੈ।

-ਸੌਰਵ ਕੁਮਾਰ ਜਲੰਧਰ

ਲਿਫ਼ਾਫ਼ਿਆਂ 'ਤੇ ਰੋਕ

ਸਨਿਚਰਵਾਰ ਦੀ ਸ਼ਾਮ ਨੂੰ ਨਜ਼ਦੀਕੀ ਰਿਸ਼ਤੇਦਾਰਾਂ ਦਾ ਫੋਨ ਆਇਆ ਕਿ ਕੱਲ੍ਹ ਨੂੰ ਛੁੱਟੀ ਹੋਣ ਕਾਰਨ ਅਸੀਂ ਪਰਿਵਾਰ ਸਮੇਤ ਤੁਹਾਡੇ ਕੋਲ ਆ ਰਹੇ ਹਾਂ। ਇਸ ਬਾਰੇ ਜਦੋਂ ਪਤਨੀ ਨੂੰ ਦੱਸਿਆ ਤਾਂ ਉਸ ਨੇ ਇਕ ਸਾਮਾਨ ਦੀ ਸੂਚੀ ਬਣਾ ਕੇ ਮੇਰੇ ਹੱਥ ਫੜਾਈ ਤੇ ਬਾਜ਼ਾਰ ਤੋਂ ਸਾਮਾਨ ਲਿਆਉਣ ਲਈ ਕਿਹਾ। ਸਭ ਤੋਂ ਪਹਿਲਾਂ ਅਸੀਂ ਸਬਜ਼ੀ ਮੰਡੀ ਗਏ, ਜਿਥੇ ਸਬਜ਼ੀ ਵਾਲੇ ਨੇ ਸਾਰੀ ਸਬਜ਼ੀ ਅਤੇ ਹੋਰ ਸਾਮਾਨ ਤੋਲ ਕੇ ਥੈਲੇ ਲਈ ਕਿਹਾ। ਮੇਰੇ ਵਲੋਂ ਕਾਰਨ ਪੁੱਛਣ 'ਤੇ ਉਹ ਕਹਿਣ ਲੱਗਾ ਕਿ ਸਰਕਾਰ ਵਲੋਂ ਪੋਲੀਥੀਨ ਦੇ ਲਿਫ਼ਾਫ਼ਿਆਂ 'ਤੇ ਪਾਬੰਦੀ ਲਗਾ ਦਿੱਤੀ ਗਈ ਹੈ। ਹਾਲੇ ਦੋ ਘੰਟੇ ਪਹਿਲਾਂ ਹੀ ਅਧਿਕਾਰੀ ਸਾਡੇ ਕੋਲੋਂ ਲਿਫ਼ਾਫ਼ਿਆਂ ਬਾਰੇ ਪੜਤਾਲ ਕਰਕੇ ਗਏ ਹਨ। ਮਸਾਂ ਹੀ ਉਸ ਨੇ ਸਾਰਾ ਸਾਮਾਨ ਇਕ ਬੋਰੀ ਵਿਚ ਪਾ ਕੇ ਦਿੱਤਾ। ਫਿਰ ਮੈਂ ਸੋਚਿਆ ਚਲੋ ਕੱਲ੍ਹ ਵਾਸਤੇ ਦੁੱਧ ਲੈ ਚਲਦੇ ਹਾਂ, ਜਦੋਂ ਦੁੱਧ ਵੇਖਿਆ ਤਾਂ ਉਹ ਵੀ ਲਿਫ਼ਾਫ਼ੇ ਵਿਚ ਬੰਦ। ਉਥੋਂ ਨਿਕਲ ਕੇ ਮੈਂ ਰਿਸ਼ਤੇਦਾਰਾਂ ਅਤੇ ਉਨ੍ਹਾਂ ਦੇ ਬੱਚਿਆਂ ਲਈ ਖਾਣ-ਪੀਣ ਦਾ ਸਾਮਾਨ ਲੈਣ ਲਈ ਇਕ ਬੇਕਰੀ ਵਿਚ ਚਲਾ ਗਿਆ ਤਾਂ ਮੈਂ ਕੁਰਕੁਰੇ, ਚਿਪਸ, ਬਿਸਕੁਟ, ਨਮਕੀਨ, ਚਾਕਲੇਟ, ਬ੍ਰੈੱਡ ਆਦਿ ਲਈ ਕਿਹਾ ਤਾਂ ਇਹ ਸਾਰੀਆਂ ਚੀਜ਼ਾਂ ਵੀ ਲਿਫ਼ਾਫ਼ਾ ਬੰਦ ਹੀ ਮਿਲੀਆਂ। ਇਸ ਮਗਰੋਂ ਅਸੀਂ ਕਰਿਆਨਾ ਸਟੋਰ 'ਤੇ ਪਹੁੰਚ ਕੇ ਮਾਲਕ ਨੂੰ ਸੂਚੀ ਦਿੱਤੀ ਤਾਂ ਉਸ ਨੇ ਸਾਮਾਨ ਕਢਵਾਉਣਾ ਸ਼ੁਰੂ ਕਰ ਦਿੱਤਾ, ਲੂਣ ਦਾ ਪੈਕਟ, ਵੇਸਣ, ਦੁੱਧ ਵਾਲੀਆਂ ਸੇਵੀਆਂ, ਦਾਲਾਂ, ਖੰਡ, ਹਲਦੀ ਆਦਿ ਸਾਰਾ ਸਾਮਾਨ ਵੀ ਲਿਫ਼ਾਫ਼ਿਆਂ ਵਿਚ ਹੀ ਬੰਦ ਸੀ। ਕੀ ਸਰਾਕਰ ਇਨ੍ਹਾਂ ਨੂੰ ਲਿਫ਼ਾਫ਼ੇ ਨਹੀਂ ਮੰਨਦੀ? ਇਸ ਮਗਰੋਂ ਮੈਂ ਸੋਚਿਆ ਕਿ ਇਕ ਸਬਜ਼ੀ ਵਾਲੇ ਜਾਂ ਕੱਪੜੇ ਵਾਲੇ ਦੀ ਦੁਕਾਨ ਤੋਂ ਲਿਫ਼ਾਫ਼ੇ ਬੰਦ ਕਰਵਾ ਕੇ ਪ੍ਰਸ਼ਾਸਨ ਨੂੰ ਕੀ ਲੱਗਦਾ ਹੈ ਕਿ ਅਸੀਂ ਲਿਫ਼ਾਫ਼ੇ ਬੰਦ ਕਰਵਾ ਦਿੱਤੇ ਹਨ। ਜੇਕਰ ਸਹੀ ਵਿਚ ਹੀ ਸਰਕਾਰ ਨੇ ਲਿਫ਼ਾਫ਼ੇ ਬੰਦ ਕਰਵਾਉਣੇ ਹਨ ਤਾਂ ਸਰਕਾਰ ਨੂੰ ਸਭ ਤੋਂ ਪਹਿਲਾਂ ਇਸ ਦਾ ਬਦਲਵਾਂ ਹੱਲ ਲੱਭਣਾ ਪਵੇਗਾ ਨਹੀਂ ਤਾਂ ਸਰਕਾਰ ਚਾਹ ਕੇ ਵੀ ਲਿਫ਼ਾਫ਼ੇ ਬੰਦ ਨਹੀਂ ਕਰਵਾ ਸਕਦੀ।

-ਪਰਮਜੀਤ ਸੰਧੂ
ਥੇਹ ਤਿੱਖਾ, ਗੁਰਦਾਸਪੁਰ।

ਅਵਾਰਾ ਪਸ਼ੂਆਂ ਦੀ ਸਮੱਸਿਆ

ਅਵਾਰਾ ਪਸ਼ੂਆਂ ਦੇ ਸੜਕਾਂ 'ਤੇ ਖੁੱਲ੍ਹੇਆਮ ਘੁੰਮਣ ਨਾਲ ਆਮ ਜਨਤਾ ਨੂੰ ਅਨੇਕਾਂ ਗੰਭੀਰ ਸਮੱਸਿਆਵਾਂ ਦਾ ਸਾਹਮਣਾ ਕਰਨਾ ਪੈਂਦਾ ਹੈ। ਅਵਾਰਾ ਪਸ਼ੂ ਸਿਰਫ਼ ਸਿਹਤ ਸੰਬੰਧੀ ਸਮੱਸਿਆਵਾਂ ਹੀ ਨਹੀਂ, ਸਗੋਂ ਸੜਕ ਹਾਦਸਿਆਂ ਦਾ ਵੀ ਮੁੱਖ ਕਾਰਨ ਬਣ ਰਹੇ ਹਨ। ਅਜੋਕੇ ਸਮੇਂ ਵਿਚ ਵੱਧ ਰਹੀ ਆਵਾਜਾਈ ਦੌਰਾਨ ਅਕਸਰ ਅਵਾਰਾ ਪਸ਼ੂ ਅਚਾਨਕ ਕਿਸੇ ਵੀ ਵਾਹਨ ਦੇ ਸਾਹਮਣੇ ਆ ਜਾਂਦੇ ਹਨ, ਜਿਸ ਕਾਰਨ ਭਿਆਨਕ ਦੁਰਘਟਨਾਵਾਂ ਵਾਪਰਦੀਆਂ ਹਨ। ਅਵਾਰਾ ਕੁੱਤਿਆਂ ਦੇ ਟੀਕਾਕਰਨ ਦੀ ਕਮੀ ਕਾਰਨ ਉਨ੍ਹਾਂ ਦੇ ਵੱਢਣ ਨਾਲ ਰੇਬੀਜ਼ ਵਰਗੀ ਘਾਤਕ ਬਿਮਾਰੀ ਹੋਣ ਦਾ ਭਾਰੀ ਖ਼ਤਰਾ ਬਣਿਆ ਰਹਿੰਦਾ ਹੈ। ਬੀਤੇ ਸਮੇਂ ਦੌਰਾਨ ਪੰਜਾਬ ਦਾ ਇਕ ਨਾਮੀ ਕਲਾਕਾਰ ਵੀ ਇਸ ਤਰ੍ਹਾਂ ਦੀ ਹੀ ਦੁਰਘਟਨਾ ਦਾ ਸ਼ਿਕਾਰ ਹੋ ਕੇ ਪੰਜਾਬੀ ਇੰਡਸਟਰੀ ਨੂੰ ਸਦਾ ਲਈ ਅਲਵਿਦਾ ਕਹਿ ਗਿਆ, ਜੋ ਇਸ ਸਮੱਸਿਆ ਦੀ ਗੰਭੀਰਤਾ ਨੂੰ ਸਾਫ਼ ਦਰਸਾਉਂਦਾ ਹੈ। ਇਸ ਲਈ ਸਰਕਾਰ ਨੂੰ ਚਾਹੀਦਾ ਹੈ ਕਿ ਅਵਾਰਾ ਪਸ਼ੂਆਂ ਦੀ ਸਮੱਸਿਆ ਦਾ ਕੋਈ ਪੱਕਾ ਅਤੇ ਪ੍ਰਭਾਵਸ਼ਾਲੀ ਹੱਲ ਕੱਢਿਆ ਜਾਵੇ, ਤਾਂ ਜੋ ਆਮ ਜਨਤਾ ਨੂੰ ਸੜਕਾਂ 'ਤੇ ਨਿਕਲਦਿਆਂ ਆਪਣੀ ਜਾਨ ਦੀ ਚਿੰਤਾ ਨਾ ਕਰਨੀ ਪਵੇ ਅਤੇ ਸੁਰੱਖਿਅਤ ਜੀਵਨ ਯਕੀਨੀ ਬਣਾਇਆ ਜਾ ਸਕੇ।

-ਕਰਨਜੋਤ ਸਿੰਘ
ਫ਼ਤਹਿਗੜ੍ਹ ਸਾਹਿਬ

ਗਾਜ਼ੀਆਬਾਦ ਤੋਂ ਇਕ ਸਬਕ

ਗਾਜ਼ੀਆਬਾਦ ਵਿਚ 4 ਫਰਵਰੀ 2026 ਨੂੰ ਹੋਈ ਹੈਰਾਨੀਜਨਕ ਘਟਨਾ ਦੌਰਾਨ ਤਿੰਨ ਕੁੜੀਆਂ ਨੇ ਆਪਣੀ ਜਾਨ ਗੁਆਈ, ਜੋ ਸਾਨੂੰ ਗੇਮ ਐਡਿਕਸ਼ਨ ਦੇ ਮੁੱਦੇ ਬਾਰੇ ਸੋਚਣ ਲਈ ਮਜਬੂਰ ਕਰਦੀ ਹੈ। ਦਿਨੋ-ਦਿਨ ਨਸ਼ੇ ਦੀ ਲਤ ਵਾਂਗ ਵਧਦੀ ਜਾ ਰਹੀ, ਇਹ ਸਮੱਸਿਆ ਸਿਰਫ਼ ਭਾਰਤ ਤੱਕ ਸੀਮਿਤ ਨਹੀਂ, ਬਲਕਿ ਦੁਨੀਆ ਦੇ ਹੋਰ ਦੇਸ਼ਾਂ ਵਿਚ ਵੀ ਇਸ ਤਰ੍ਹਾਂ ਦੇ ਮਾਮਲੇ ਸਾਹਮਣੇ ਆ ਰਹੇ ਹਨ, ਦੱਖਣੀ ਕੋਰੀਆ ਤੇ ਚੀਨ ਵਿਚ ਵੀ ਬੱਚਿਆ ਦੇ ਮੋਬਾਈਲ ਐਡਿਕਸ਼ਨ ਦੀਆ ਸਮੱਸਿਆਵਾ ਵਧ ਰਹੀਆਂ ਹਨ। ਇਕ ਮਾਨਸਿਕ ਚੁਣੌਤੀ ਬਣ ਚੁੱਕੀ ਹੈ। ਆਨਲਾਈਨ ਅਤੇ ਸੋਸ਼ਲ ਮੀਡੀਆ ਦੀ ਦੁਨੀਆ ਵਿਚ ਬੱਚਿਆਂ ਨੂੰ ਇਕੱਲਾ ਛੱਡ ਦਿੱਤਾ ਜਾਂਦਾ ਹੈ ਕਿ ਉਨ੍ਹਾਂ ਦੀ ਚੁੱਪ ਵੀ ਸੁਣਾਈ ਨਹੀਂ ਦਿੰਦੀ। ਮਤਲਬ ਬੱਚਿਆਂ ਨੂੰ ਮੋਬਾਈਲ ਨਹੀਂ, ਸਗੋਂ ਪਰਿਵਾਰ ਦੀ ਮੌਜੂਦਗੀ ਦੀ ਲੋੜ ਹੈ। ਪੜ੍ਹਾਈ ਲਈ ਤਕਨਾਲੋਜੀ ਜ਼ਰੂਰੀ ਹੈ, ਪਰ ਇਹ ਗ਼ਲਤ ਹੈ ਕਿ ਤਕਨਾਲੋਜੀ ਬੱਚਿਆਂ ਦੀ ਜਾਨ ਖ਼ਤਰੇ ਵਿਚ ਪਾ ਦਿੱਤੀ ਜਾਵੇ। ਪੜ੍ਹਾਈ ਲਈ ਮੋਬਾਈਲ ਫੋਨ ਹੋਣੇ ਚਾਹੀਦੇ ਹਨ, ਪਰ ਸੋਸ਼ਲ ਮੀਡੀਆ ਲਈ ਨਹੀਂ। ਖ਼ਾਸ ਕਰਕੇ ਘੱਟ ਉਮਰ ਦੇ ਬੱਚਿਆਂ ਲਈ ਮੋਬਾਈਲ ਦੇ ਉਪਯੋਗ 'ਤੇ ਨਿਯਮ ਬਣਾਉਣੇ ਚਾਹੀਦੇ ਹਨ।

-ਮਨਪ੍ਰੀਤ
ਜਲੰਧਰ।