15-01-2026

 ਦੂਜਿਆਂ ਪ੍ਰਤੀ ਸੋਚ ਹੀ ਤੁਹਾਡੀ ਪਛਾਣ ਹੈ
ਜਦੋਂ ਮਨੁੱਖ ਦੂਜਿਆਂ ਵੱਲ ਸਾਫ਼, ਸਹੀ ਤੇ ਸਕਾਰਾਤਮਕ ਨਜ਼ਰ ਨਾਲ ਵੇਖਣਾ ਸਿੱਖ ਲੈਂਦਾ ਹੈ ਤਾਂ ਉਸ ਦੀ ਜ਼ਿੰਦਗੀ ਦੀ ਦਿਸ਼ਾ ਹੀ ਬਦਲ ਜਾਂਦੀ ਹੈ। ਇਹ ਸੋਚ ਫੇਰ ਸਾਡੇ ਵਿਚਾਰਾਂ, ਬੋਲਾਂ, ਵਰਤਾਓ ਅਤੇ ਫ਼ੈਸਲਿਆਂ ਵਿਚ ਝਲਕਣ ਲੱਗ ਪੈਂਦੀ ਹੈ, ਜਿਸ ਦਾ ਅਸਰ ਇਹ ਹੁੰਦਾ ਹੈ ਕਿ ਲੋਕ ਸਾਨੂੰ ਸੁਣਦੇ ਹਨ, ਸਮਝਦੇ ਹਨ ਅਤੇ ਸਤਿਕਾਰ ਦਿੰਦੇ ਹਨ। ਹੌਲੀ-ਹੌਲੀ ਸਮਾਜ ਵਿਚ ਸਾਡਾ ਭਰੋਸਾ ਬਣਦਾ ਹੈ, ਦੂਰੀਆਂ ਘਟਦੀਆਂ ਹਨ ਅਤੇ ਪਿਆਰ ਆਪਣੀ ਜਗ੍ਹਾ ਬਣਾ ਲੈਂਦਾ ਹੈ। ਜਿਸ ਮਨੁੱਖ 'ਤੇ ਲੋਕ ਭਰੋਸਾ ਕਰਨ ਲੱਗ ਪੈਣ, ਉਸ ਲਈ ਸਫ਼ਲਤਾ ਫੇਰ ਦੂਰ ਨਹੀਂ ਰਹਿੰਦੀ। ਉਹ ਹਰ ਕੰਮ ਆਤਮ-ਵਿਸ਼ਵਾਸ ਨਾਲ ਕਰਦਾ ਹੈ ਅਤੇ ਹਰ ਮੰਚ 'ਤੇ ਆਪਣੀ ਪਛਾਣ ਬਣਾਉਂਦਾ ਹੈ। ਅਜਿਹੀ ਸੋਚ ਮਨੁੱਖ ਨੂੰ ਅੰਦਰੋਂ ਮਜ਼ਬੂਤ ਅਤੇ ਬਾਹਰੋਂ ਮਾਣਯੋਗ ਬਣਾਉਂਦੀ ਹੈ। ਨਤੀਜਾ ਇਹ ਹੁੰਦਾ ਹੈ ਕਿ ਨਾ ਸਿਰਫ਼ ਜੀਵਨ ਸੁਖਦਾਇਕ ਬਣਦਾ ਹੈ, ਸਗੋਂ ਸਮਾਜ ਵਿਚ ਵੀ ਉਸ ਦਾ ਦਰਜਾ ਆਪਣੇ-ਆਪ ਉੱਚਾ ਹੋ ਜਾਂਦਾ ਹੈ।

-ਬਲਦੇਵ ਸਿੰਘ ਬੇਦੀ ਜਲੰਧਰ।

ਫਰਕ
ਸਮਾਜ ਵਿਚ ਇਕ ਫਰਕ ਤਾਂ ਸ਼ੁਰੂ ਤੋਂ ਹੀ ਹੁੰਦਾ ਆਇਆ ਹੈ, ਭਾਵੇਂ ਕੁੜੀ ਵੀ ਨੌਕਰੀ ਕਰਦੀ ਹੋਵੇ ਤੇ ਮੁੰਡਾ ਵੀ ਨੌਕਰੀ ਕਰਦਾ ਹੋਵੇ। ਫਿਰ ਔਰਤ ਭਾਵੇਂ ਕਿਸੇ ਵੀ ਵੱਡੇ ਅਹੁਦੇ ਤੋਂ ਰਿਟਾਇਰ ਹੋਈ ਹੋਵੇ, ਉਸ ਦੀਆਂ ਘਰੇਲੂ ਜ਼ਿੰਮੇਵਾਰੀਆਂ ਘੱਟ ਨਹੀਂ ਹੁੰਦੀਆਂ। 58 ਸਾਲ ਤੋਂ ਉੱਪਰ ਰਿਟਾਇਰ ਹੋਈਆਂ ਔਰਤਾਂ ਦਾ ਜੀਵਨ ਸੁਖਾਲਾ ਨਹੀਂ ਹੋਇਆ। ਇਹ ਫ਼ਰਕ ਸ਼ੁਰੂ ਤੋਂ ਬਣਿਆ ਹੀ ਆਇਆ ਹੈ, ਭਾਵੇਂ ਕਿੰਨਾ ਵੀ ਆਖੀ ਜਾਈਏ ਆਦਮੀ ਔਰਤ ਬਰਾਬਰ ਹਨ ਪਰ ਬਰਾਬਰਤਾ ਹੈ ਨਹੀਂ, ਕਿਉਂਕਿ ਉਨ੍ਹਾਂ ਦੇ ਮੋਢਿਆਂ 'ਤੇ ਭਾਰ ਪੈ ਜਾਂਦਾ ਹੈ। ਬੱਚਿਆਂ ਦੇ ਬੱਚੇ ਕੌਣ ਸੰਭਾਲੇਗਾ, ਪਤੀ ਤੱਕ ਵੀ ਤੁਣਕ ਮਾਰ ਦਿੰਦੇ ਹਨ, ਉਹਨੇ ਘਰ ਬਹਿ ਕੇ ਕਰਨਾ ਕੀ ਹੈ। ਇਹ ਔਰਤ ਵਾਸਤੇ ਬਹੁਤ ਮਾਨਸਿਕ ਪ੍ਰੇਸ਼ਾਨੀ ਦੀ ਵਜ੍ਹਾ ਬਣ ਜਾਂਦੀ ਹੈ। ਜੋ ਔਰਤ ਸਾਰੀ ਜ਼ਿੰਦਗੀ ਕੰਮ ਕਰਦਿਆਂ ਲੜਕੀ ਤੋਂ ਬੁੱਢੀ ਹੋ ਜਾਂਦੀ ਹੈ ਪਰ ਉਸ ਦੀਆਂ ਜ਼ਿੰਮੇਵਾਰੀਆਂ ਦਾ ਬੋਝ ਕਦੇ ਨਹੀਂ ਘਟਦਾ।

-ਕੰਵਲਜੀਤ ਕੌਰ ਜੁਨੇਜਾ
ਰੋਹਤਕ।

ਸਿੱਖਿਆ ਪ੍ਰਣਾਲੀ ਦੀ ਅਸਲੀ ਤਾਕਤ
ਅਧਿਆਪਕ ਕਿਸੇ ਵੀ ਸਮਾਜ ਦੀ ਅਸਲੀ ਤਾਕਤ ਹੁੰਦੇ ਹਨ। ਪੰਜਾਬ ਦੀ ਸਿੱਖਿਆ ਪ੍ਰਣਾਲੀ ਨੂੰ ਮਜ਼ਬੂਤ ਬਣਾਉਣ ਵਿਚ ਅਧਿਆਪਕਾਂ ਦੀ ਭੂਮਿਕਾ ਸਿਰਫ਼ ਪਾਠ ਪੜ੍ਹਾਉਣ ਤੱਕ ਸੀਮਿਤ ਨਹੀਂ, ਸਗੋਂ ਵਿਦਿਆਰਥੀਆਂ ਦੇ ਚਰਿੱਤਰ, ਸੋਚ ਅਤੇ ਜੀਵਨ ਮੁੱਲਾਂ ਨੂੰ ਸੰਵਾਰਨ ਤੱਕ ਫੈਲੀ ਹੋਈ ਹੈ। ਪੰਜਾਬ ਸਰਕਾਰ ਵਲੋਂ ਸਿੱਖਿਆ ਖੇਤਰ ਵਿਚ ਕੀਤੇ ਗਏ ਕਈ ਉਪਰਾਲੇ ਸ਼ਲਾਘਾਯੋਗ ਹਨ। ਬਿਲਡਿੰਗ ਸਕੂਲ ਆਫ ਹੈਪਿਨੈੱਸ ਵਰਗਾ ਦੂਰਦਰਸ਼ੀ ਕਾਰਜਕ੍ਰਮ ਇਸ ਗੱਲ ਦਾ ਪ੍ਰਮਾਣ ਹੈ ਕਿ ਸਰਕਾਰ ਵਿਦਿਆਰਥੀਆਂ ਦੀ ਮਾਨਸਿਕ ਖੁਸ਼ਹਾਲੀ, ਆਤਮ-ਵਿਸ਼ਵਾਸ ਅਤੇ ਸਕਾਰਾਤਮਕ ਸੋਚ ਨੂੰ ਬਰਾਬਰ ਮਹੱਤਵ ਦੇ ਰਹੀ ਹੈ। ਇਸ ਦੇ ਨਾਲ ਜੀਵਨ ਕੌਸ਼ਲ ਸਿੱਖਿਆ, ਯੋਗਾ ਅਤੇ ਧਿਆਨ, ਸਿਹਤ ਅਤੇ ਭਲਾਈ, ਖੇਡਾਂ ਦਾ ਉਤਸ਼ਾਹ, ਸੱਭਿਆਚਾਰਕ ਗਤੀਵਿਧੀਆਂ, ਡਿਜ਼ੀਟਲ ਸਿੱਖਿਆ, ਕਮਜ਼ੋਰ ਵਿਦਿਆਰਥੀਆਂ ਲਈ ਵਾਧੂ ਕਲਾਸਾਂ ਅਤੇ ਮਾਪੇ-ਅਧਿਆਪਕ ਸੰਪਰਕ ਵਰਗੇ ਉਪਰਾਲੇ ਵੀ ਸਫ਼ਲਤਾ ਨਾਲ ਲਾਗੂ ਹੋ ਰਹੇ ਹਨ। ਅਧਿਆਪਕਾਂ ਦੀ ਨਿਸ਼ਠਾ ਅਤੇ ਪੰਜਾਬ ਸਰਕਾਰ ਦੀ ਦੂਰਦਰਸ਼ੀ ਸੋਚ ਮਿਲ ਕੇ ਸੂਬੇ ਦੀ ਸਿੱਖਿਆ ਨੂੰ ਨਵੀਂ ਉਚਾਈਆਂ 'ਤੇ ਲਿਜਾ ਰਹੀਆਂ ਹਨ। ਸਸ਼ਕਤ ਅਧਿਆਪਕ, ਖੁਸ਼ ਵਿਦਿਆਰਥੀ ਅਤੇ ਸੰਵੇਦਨਸ਼ੀਲ ਸਰਕਾਰ ਇਹੀ ਪੰਜਾਬ ਦੇ ਰੌਸ਼ਨ ਭਵਿੱਖ ਦੀ ਨੀਂਹ ਹੈ।

-ਅੰਜੂ ਸੂਦ
ਹੈੱਡ ਟੀਚਰ, ਲਲਹੇੜੀ।