01-04-26

 ਆਧੁਨਿਕ ਜੀਵਨ ਸ਼ੈਲੀ
ਆਧੁਨਿਕ ਜੀਵਨ ਸ਼ੈਲੀ ਅੱਜ ਦੇ ਸਮੇਂ ਵਿਚ ਤੇਜ਼ੀ, ਤਕਨਾਲੋਜੀ ਅਤੇ ਅਨੇਕਾਂ ਸੁਵਿਧਾਵਾਂ ਨਾਲ ਭਰਪੂਰ ਹੈ। ਅੱਜ ਮਨੁੱਖ ਦੀ ਜੀਵਨ ਸ਼ੈਲੀ ਪਹਿਲਾਂ ਨਾਲੋਂ ਕਾਫ਼ੀ ਬਦਲ ਚੁੱਕੀ ਹੈ। ਕੰਮ ਕਰਨ ਦੇ ਢੰਗ, ਖਾਣ-ਪੀਣ ਦੀਆਂ ਆਦਤਾਂ ਅਤੇ ਰਹਿਣ-ਸਹਿਣ ਦੇ ਤਰੀਕਿਆਂ ਵਿਚ ਨਵੀਂ ਸੋਚ ਅਤੇ ਨਵੇਂ ਢੰਗ ਸ਼ਾਮਿਲ ਹੋ ਗਏ ਹਨ। ਮੋਬਾਈਲ ਫੋਨ, ਇੰਟਰਨੈੱਟ ਅਤੇ ਸੋਸ਼ਲ ਮੀਡੀਆ ਨੇ ਮਨੁੱਖੀ ਜੀਵਨ ਨੂੰ ਕਾਫ਼ੀ ਆਸਾਨ ਬਣਾਇਆ ਹੈ, ਪਰ ਇਸ ਨਾਲ ਲੋਕਾਂ ਦੀ ਸਰੀਰਕ ਕਿਰਿਆਵਾਂ ਵੀ ਘੱਟ ਹੋ ਗਈਆਂ ਹਨ। ਆਧੁਨਿਕ ਜੀਵਨ ਵਿਚ ਸਹੂਲਤਾਂ ਵੱਧਣ ਕਾਰਨ ਮਨੁੱਖ ਦੀ ਜ਼ਿੰਦਗੀ ਹੋਰ ਵੀ ਆਰਾਮਦਾਇਕ ਹੋ ਗਈ ਹੈ, ਪਰ ਇਸ ਦੇ ਨਾਲ ਸਿਹਤ ਨਾਲ ਸੰਬੰਧਿਤ ਸਮੱਸਿਆਵਾਂ ਵੀ ਵਧ ਰਹੀਆਂ ਹਨ। ਫਾਸਟ ਫੂਡ ਦੀ ਵੱਧ ਰਹੀ ਵਰਤੋਂ, ਲੰਮੇ ਸਮੇਂ ਤੱਕ ਬੈਠ ਕੇ ਕੰਮ ਕਰਨ ਦੀ ਆਦਤ ਅਤੇ ਤਣਾਅ ਭਰੀ ਜ਼ਿੰਦਗੀ ਕਾਰਨ ਕਈ ਬਿਮਾਰੀਆਂ ਦਾ ਖ਼ਤਰਾ ਵਧਦਾ ਜਾ ਰਿਹਾ ਹੈ। ਇਸ ਕਰਕੇ ਲੋਕ ਪਰਿਵਾਰਕ ਅਤੇ ਸਮਾਜਿਕ ਰਿਸ਼ਤਿਆਂ ਲਈ ਵੀ ਘੱਟ ਸਮਾਂ ਕੱਢ ਪਾ ਰਹੇ ਹਨ। ਇਸ ਦੇ ਬਾਵਜੂਦ ਆਧੁਨਿਕ ਜੀਵਨ ਦੇ ਕਈ ਸਕਾਰਾਤਮਕ ਪੱਖ ਵੀ ਹਨ। ਸਿੱਖਿਆ ਅਤੇ ਸਿਹਤ ਸੇਵਾਵਾਂ ਵਿਚ ਕਾਫ਼ੀ ਸੁਧਾਰ ਆਇਆ ਹੈ ਅਤੇ ਜਾਣਕਾਰੀ ਦਾ ਪ੍ਰਸਾਰ ਵੀ ਬਹੁਤ ਤੇਜ਼ ਹੋ ਗਿਆ ਹੈ। ਇਸ ਲਈ ਜ਼ਰੂਰੀ ਹੈ ਕਿ ਅਸੀਂ ਆਧੁਨਿਕਤਾ ਅਤੇ ਆਪਣੀਆਂ ਪਰੰਪਰਾਵਾਂ ਵਿਚ ਸੰਤੁਲਨ ਬਣਾਈ ਰੱਖੀਏ, ਤਾਂ ਜੋ ਜੀਵਨ ਸੁਖਮਈ, ਸੰਤੁਲਿਤ ਅਤੇ ਸਿਹਤਮੰਦ ਬਣ ਸਕੇ।

- ਸਤਵਿੰਦਰ ਕੌਰ ਮੱਲੇਵਾਲ

ਖੁਰਾਕ ਠੀਕ ਤਾਂ ਸਿਹਤ ਠੀਕ
ਚੰਗੀ ਸਿਹਤ ਦੇ ਲਈ ਠੀਕ ਭੋਜਨ ਦਾ ਹੋਣਾ ਬਹੁਤ ਜ਼ਰੂਰੀ ਹੈ। ਅਸੀਂ ਜੋ ਵੀ ਕੁਝ ਖਾਂਦੇ ਹਾਂ ਉਸ ਦਾ ਅਸਰ ਸਾਡੇ ਸਰੀਰ 'ਤੇ ਪੈਂਦਾ ਹੈ। ਚੰਗੀ ਸਿਹਤ ਦੇ ਲਈ ਪੌਸਟਿਕ ਭੋਜਨ ਦਾ ਹੋਣਾ ਜ਼ਰੂਰੀ ਹੈ ਜਿਸ ਨਾਲ ਸਿਹਤ ਵੀ ਸਿਹਤਮੰਦ ਹੁੰਦੀ ਹੈ। ਚੰਗੀ ਸਿਹਤ ਦੇ ਲਈ ਡਰਾਈਵ ਕਰਨਾ ਵੀ ਬਹੁਤ ਜ਼ਰੂਰੀ ਹੈ। ਅੱਜ ਕੱਲ੍ਹ ਅਸੀਂ ਵੇਖਦੇ ਹਾਂ ਕਿ ਨੌਜਵਾਨ ਪੀੜ੍ਹੀ ਫਾਸਟ ਫੂਡ ਖਾਂਦੇ ਹੈ ਜਿਵੇਂ ਕਿ ਬਰਗਰ, ਨੂਡਲਜ਼, ਪੀਜ਼ਾ ਆਦਿ। ਜਿਸਦੇ ਨਾਲ ਕਈ ਬਿਮਾਰੀਆਂ ਲਗਦੀਆਂ ਹਨ। ਜਿਆਦਾਤਰ ਤਲੀਆ ਹੋਈਆ ਚੀਜ਼ਾਂ ਦੀ ਵਰਤੋਂ ਨਾ ਕਰੋ ਇਸ ਨਾਲ ਐਸੀਡਿਟੀ ਦੀ ਸਮੱਸਿਆ ਰਹਿੰਦੀ ਹੈ। ਸਹੀ ਭੋਜਨ ਦੇ ਨਾਲ ਧਿਆਨ ਦਿਓ ਖਾਣਾ ਨਿਸਚਿਤ ਸਮੇਂ 'ਤੇ ਖਾਓ, ਚਬਾ ਚਬਾ ਕੇ ਖਾਓ, ਗੱਲਾਂ ਨਾ ਕਰੋ, ਮੋਬਾਈਲ ਦੀ ਵਰਤੋਂ ਨਾ ਕਰੋ, ਟੀ.ਵੀ ਨਾ ਦੇਖੋ, ਖਾਣੇ 'ਤੇ ਪੂਰਾ ਧਿਆਨ ਦਿਓ।

-ਸਿਮਰਨਜੀਤ ਕੌਰ
ਫ਼ਿਰੋਜ਼ਪੁਰ ਕੁਠਾਲਾ।

ਖੋਖਲੀ ਹੁੰਦੀ ਜਾ ਰਹੀ ਨਵੀਂ ਪੀੜ੍ਹੀ
ਅੱਜ ਜਦੋਂ ਅਸੀਂ ਸਾਲ 2026 ਵਿਚ ਖੜ੍ਹੇ ਹਾਂ, ਤਾਂ ਪੰਜਾਬ ਦੇ ਸਿੱਖਿਆ ਪ੍ਰਣਾਲੀ ਵਿਚ ਇਕ ਗੰਭੀਰ ਕਮੀ ਸਾਫ਼ ਤੌਰ 'ਤੇ ਨਜ਼ਰ ਆ ਰਹੀ ਹੈ। ਸਕੂਲਾਂ ਵਿਚ ਪੜ੍ਹ ਰਹੇ ਬਹੁਤ ਸਾਰੇ ਵਿਦਿਆਰਥੀ ਅੱਜ ਅੰਕਾਂ ਦੀ ਅੰਨ੍ਹੀ ਦੌੜ ਅਤੇ ਸੋਸ਼ਲ ਮੀਡੀਆ ਦੇ ਵਧਦੇ ਪ੍ਰਭਾਵ ਕਾਰਨ ਮਾਨਸਿਕ ਤਣਾਅ ਅਤੇ ਇਕੱਲੇਪਣ ਦਾ ਸ਼ਿਕਾਰ ਹੋ ਰਹੇ ਹਨ। ਪ੍ਰੀਖਿਆਵਾਂ ਦੇ ਦਿਨਾਂ ਦੌਰਾਨ ਇਹ ਸਮੱਸਿਆ ਹੋਰ ਵੀ ਗੰਭੀਰ ਹੋ ਜਾਂਦੀ ਹੈ। ਦੁੱਖ ਦੀ ਗੱਲ ਹੈ ਕਿ ਸਾਡਾ ਮੌਜੂਦਾ ਪਾਠਕ੍ਰਮ ਬੱਚਿਆਂ ਨੂੰ ਸਰੀਰਕ ਵਿਗਿਆਨ ਤਾਂ ਪੜ੍ਹਾਉਂਦਾ ਹੈ, ਪਰ ਮਾਨਸਿਕ ਸੰਤੁਲਨ ਬਣਾਈ ਰੱਖਣ ਦੇ ਤਰੀਕਿਆਂ ਬਾਰੇ ਲਗਭਗ ਚੁੱਪ ਹੈ। ਇਸ ਮੁੱਦੇ ਨੂੰ ਉਠਾਉਣਾ ਇਸ ਲਈ ਵੀ ਜ਼ਰੂਰੀ ਹੋ ਗਿਆ ਹੈ ਕਿਉਂਕਿ ਨੌਜਵਾਨਾਂ ਵਿਚ ਵਧ ਰਹੀ ਨਸ਼ਿਆਂ ਦੀ ਲਤ ਅਤੇ ਹਿੰਸਕ ਰੁਝਾਨ ਦਾ ਇਕ ਵੱਡਾ ਕਾਰਨ ਉਹਨਾਂ ਦੀ ਮਾਨਸਿਕ ਮਜ਼ਬੂਤੀ ਦੀ ਘਾਟ ਹੈ। ਆਪਣੀਆਂ ਭਾਵਨਾਵਾਂ ਨੂੰ ਸਾਂਝਾ ਕਰਨ ਤੋਂ ਗੁਰੇਜ ਕਰਨ ਵਾਲਾ ਬੱਚਾ ਸਕਦਾ ਜਾਂ ਅਸਫਲਤਾ ਨੂੰ ਸਹਿਣ ਤੋਂ ਅਸਮਰਥ ਹੋਣ ਕਰਕੇ ਅਕਸਰ ਗ਼ਲਤ ਰਾਹਾਂ ਵੱਲ ਮੁੜ ਜਾਂਦਾ ਹੈ। ਕੇਵਲ ਡਿਗਰੀਆਂ ਵੰਡਣ ਨਾਲ ਇਕ ਸਿਹਤਮੰਦ ਅਤੇ ਜ਼ਿੰਮੇਵਾਰ ਸਮਾਜ ਦੀ ਸਿਰਜਣਾ ਨਹੀਂ ਕੀਤੀ ਜਾ ਸਕਦੀ। ਇਸ ਲਈ ਸਰਕਾਰ ਅਤੇ ਸਿੱਖਿਆ ਬੋਰਡਾਂ ਨੂੰ ਚਾਹੀਦਾ ਹੈ ਕਿ ਮਾਨਸਿਕ ਸਿਹਤ ਨੂੰ ਪਹਿਲੀ ਜਮਾਤ ਤੋਂ ਹੀ ਪਾਠਕ੍ਰਮ ਦਾ ਲਾਜ਼ਮੀ ਹਿੱਸਾ ਬਣਾਇਆ ਜਾਵੇ। ਜੇਕਰ ਅਸੀਂ ਅੱਜ ਇਸ ਮਨੋਵਿਗਿਆਨਕ ਪੱਖ ਵੱਲ ਗੰਭੀਰ ਧਿਆਨ ਨਾ ਦਿੱਤਾ, ਤਾਂ ਆਉਣ ਵਾਲੀ ਪੀੜ੍ਹੀ ਬਾਹਰੋਂ ਭਾਵੇਂ ਸਿੱਖਿਆਯਾਫ਼ਤਾ ਦਿਖਾਈ ਦੇਵੇਗੀ, ਪਰ ਅੰਦਰੋਂ ਖੋਖਲੀ ਰਹਿ ਜਾਵੇਗੀ।

-ਪ੍ਰਭਜੋਤ ਕੌਰ, ਧੂੰਦਾ