13-10-25

 ਸ਼ਰਾਰਤੀ ਅਨਸਰਾਂ 'ਤੇ ਕਾਰਵਾਈ ਹੋਵੇ
ਅੱਜਕੱਲ੍ਹ ਕੁਝ ਲੋਕਾਂ ਦੀ ਸੋਚ ਨੂੰ ਪਤਾਨਹੀਂ ਕੀ ਹੋ ਗਿਆ ਹੈ। ਇਹ ਲੋਕ ਕੌਣ ਨੇ, ਇਨ੍ਹਾਂ ਲੋਕਾਂ ਦੀ ਕੀ ਸੋਚ ਹੈ। ਇਹ ਦਿਮਾਗੀ ਤੌਰ 'ਤੇ ਬਿਮਾਰ, ਸ਼ਰਾਰਤੀ ਅਨਸਰ ਜਾਣਬੁੱਝ ਕੇ ਦੇਸ਼ ਵਿਚ ਨਫ਼ਰਤ ਦੀ ਅੱਗ ਲਗਾਉਣਾ ਚਾਹੁੰਦੇ ਹਨ।
ਪਿਛਲੇ ਕੁਝ ਦਿਨਾਂ ਤੋਂ ਕੁਝ ਮਾੜੀ ਅਤੇ ਘਟੀਆ ਮਾਨਸਿਕਤਾ ਵਾਲੇ ਕੁਝ ਸ਼ਰਾਰਤੀ ਲੋਕਾਂ ਵੱਲੋਂ ਸ੍ਰੀ ਦਰਬਾਰ ਸਾਹਿਬ ਵਿਚ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਪ੍ਰਕਾਸ਼ ਦੀਆਂ ਗਲਤ ਵੀਡੀਓ ਬਣਾ ਕੇ ਸੋਸ਼ਲ ਮੀਡੀਆ ਤੇ ਅਪਲੋਡ ਕੀਤੀਆਂ ਜਾ ਰਹੀਆਂ ਹਨ, ਜਦੋਂ ਕਿ ਸਿੱਖ ਧਰਮ ਸਾਰੇ ਹੀ ਧਰਮਾਂ ਦਾ ਸਤਿਕਾਰ ਕਰਦਾ ਹੈ। ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਵਿਚ ਵੀ ਸਾਰੇ ਹੀ ਧਰਮਾਂ ਅਤੇ ਜਾਤਾਂ ਦੇ ਭਗਤਾਂ, ਪੀਰਾਂ, ਫ਼ਕੀਰਾਂ, ਰਿਸ਼ੀਆਂ-ਮੁਨੀਆਂ ਦੀ ਬਾਣੀ ਦਰਜ ਹੈ।
ਸਾਰਿਆਂ ਨੂੰ ਹੀ ਬਹੁਤ ਮਾਣ ਸਤਿਕਾਰ ਦਿੱਤਾ ਗਿਆ ਹੈ। ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਜੀ ਦੀ ਬਾਣੀ ਨੇ ਹਮੇਸ਼ਾ ਹੀ ਮਨੁੱਖਤਾ ਦੀ ਸਾਂਝੀਵਾਲਤਾ ਦਾ ਸੁਨੇਹਾ ਦਿੱਤਾ ਹੈ। ਪਰ ਜੋ ਵੀਡੀਓ ਸ੍ਰੀ ਦਰਬਾਰ ਸਾਹਿਬ ਦੀਆਂ ਸ਼ਰਾਰਤੀ ਲੋਕਾਂ ਵਲੋਂ ਗਲਤ ਬਣਾ ਕੇ ਲੋਡ ਕੀਤੀਆਂ ਗਈਆਂ ਹਨ। ਉਨ੍ਹਾਂ ਨੂੰ ਦੇਖ ਕੇ ਪੂਰੇ ਸੰਸਾਰ ਵਿਚ ਵਸਦੇ ਸਿੱਖਾਂ ਦੇ ਹਿਰਦਿਆਂ ਨੂੰ ਝੰਜੋੜ ਕੇ ਰੱਖ ਦਿੱਤਾ ਹੈ।
ਸਾਡੀ ਸਿੱਖ ਪੰਥ ਦੇ ਆਗੂਆਂ ਅਤੇ ਜਥੇਦਾਰ ਸਾਹਿਬਾਨਾਂ ਨੂੰ ਬੇਨਤੀ ਹੈ ਕਿ ਉਹ ਹੁਣ ਸਿਰਫ ਇੱਕਲੇ ਬਿਆਨ ਦੇਣ ਜੋਗੇ ਹੀ ਰਹਿ ਗਏ ਹਨ। ਅਜਿਹੇ ਸ਼ਰਾਰਤੀ ਅਨਸਰਾਂ ਦੇ ਖ਼ਿਲਾਫ਼ ਸਾਰੇ ਲੋਕਾਂ ਨੂੰ ਨਾਲ ਲੈ ਕੇ ਆਵਾਜ਼ ਬੁਲੰਦ ਕਰਕੇ ਸਖ਼ਤ ਤੋਂ ਸਖ਼ਤ ਕਾਰਵਾਈ ਕਰਾਉਣੀ ਚਾਹੀਦੀ ਹੈ।

-ਗੁਰਤੇਜ ਸਿੰਘ ਖੁਡਾਲ,
ਗਲੀ ਨੰਬਰ-11 ਭਾਗੂ ਰੋਡ ਬਠਿੰਡਾ।

ਭਰਮ ਦੀਆਂ ਕਿਸਮਾਂ
ਮਨੋਵਿਗਿਆਨ ਵਿਸ਼ੇ ਅਨੁਸਾਰ ਕਿਸੇ ਵਸਤੂ ਨੂੰ ਗ਼ਲਤਫ਼ਹਿਮੀ ਤੇ ਭੁਲੇਖੇ ਨਾਲ ਕੁਝ ਹੋਰ ਸਮਝ ਲੈਣ ਦੀ ਕਿਰਿਆ ਨੂੰ ਭਰਮ ਕਿਹਾ ਜਾਂਦਾ ਹੈ। ਮਨੋਵਿਗਿਆਨ ਵਿਸ਼ੇ ਦੀ ਤਕਨੀਕੀ ਭਾਸ਼ਾ ਵਿਚ ਵਸਤੂ ਨੂੰ ਉਦੀਪਕ ਅਤੇ ਸਮਝ ਲੈਣ ਨੂੰ ਪ੍ਰਤੱਖੀਕਰਮ ਦੇ ਨਾਵਾਂ ਨਾਲ ਜਾਣਿਆ ਜਾਂਦਾ ਹੈ।
ਜਿਵੇਂ ਕਿ ਹਨੇਰੇ ਵਿਚ ਰੱਸੀ ਨੂੰ ਸੱਪ ਸਮਝ ਲੈਣਾ ਅਤੇ ਆਮ ਤੌਰ 'ਤੇ ਭਰਮ ਸਰਵਵਿਆਪਕ ਹੁੰਦੇ ਹਨ ਅਤੇ ਇਹ ਸਾਰੇ ਮਨੁੱਖਾਂ ਲਈ ਬਰਾਬਰ ਹੁੰਦੇ ਹਨ। ਉਦਾਹਰਨ ਦੇ ਤੌਰ 'ਤੇ ਰੇਲ ਦੀਆਂ ਪਟੜੀਆਂ ਦੂਰ ਤੋਂ ਸਾਰੇ ਮਨੁੱਖਾਂ ਨੂੰ ਮਿਲਦੀਆਂ ਹੋਈਆਂ ਦਿਖਾਈ ਦਿੰਦੀਆਂ ਹਨ। ਅਜਿਹੇ ਭਰਮਾਂ ਨੂੰ ਸਥਾਈ ਭਰਮ ਵੀ ਕਿਹਾ ਜਾਂਦਾ ਹੈ। ਕੁਝ ਭਰਮ ਵਿਅਕਤੀਗਤ ਵੀ ਹੁੰਦੇ ਹਨ।
ਭਾਵ ਇਕ ਵਿਅਕਤੀ ਨੂੰ ਕਿਸੇ ਉਦੀਪਕ ਬਾਰੇ ਭਰਮ ਹੋ ਸਕਦਾ ਹੈ ਅਤੇ ਦੂਜੇ ਵਿਅਕਤੀ ਨੂੰ ਨਹੀਂ ਹੋ ਸਕਦਾ ਜਾਂ ਕੁਝ ਹੋਰ ਭਰਮ ਹੋ ਸਕਦਾ ਹੈ। ਉਦਾਹਰਨ ਦੇ ਤੌਰ 'ਤੇ ਹਨ੍ਹੇਰੇ ਵਿਚ ਕਿਸੇ ਖੰਭੇ ਨੂੰ ਦੇਖ ਕੇ ਇਕ ਵਿਅਕਤੀ ਨੂੰ ਆਦਮੀ ਹੋਣ ਦਾ ਭਰਮ, ਦੂਜੇ ਨੂੰ ਭੂਤ-ਪ੍ਰੇਤ ਦਾ ਭਰਮ ਅਤੇ ਤੀਜੇ ਨੂੰ ਚੋਰ ਹੋਣ ਦਾ ਭਰਮ ਹੋ ਸਕਦਾ ਹੈ। ਪਰੰਤੂ ਥੋੜ੍ਹੀ ਰੌਸ਼ਨੀ ਹੋਣ 'ਤੇ ਸਾਰੇ ਭਰਮ ਦੂਰ ਹੋ ਜਾਂਦੇ ਹਨ।
ਮਨੋਵਿਗਿਆਨੀਆਂ ਦੁਆਰਾ ਅਨੇਕਾਂ ਹੀ ਜਿਊਮੈਟਰੀਕਲ ਭਰਮਾਂ ਦੀ ਖੋਜ ਕੀਤੀ ਗਈ ਹੈ, ਜਿਨ੍ਹਾਂ ਵਿਚ ਜੂਲਨਰ ਭਰਮ, ਮੂਲਰ ਲਾਇਰ ਭਰਮ, ਪੋਗੇਨਡਾਰਫ਼ ਭਰਮ ਅਤੇ ਹੈਰਿੰਗ ਭਰਮ ਪ੍ਰਮੁੱਖ ਹਨ। ਇਸ ਤੋਂ ਇਲਾਵਾ ਗਤੀ ਸੰਬੰਧੀ ਭਰਮਾਂ 'ਤੇ ਵੀ ਖੋਜਾਂ ਹੋਈਆਂ। ਫ਼ਿਲਮਾਂ ਵਿਚ ਪ੍ਰਯੋਗ ਕੀਤਾ ਜਾਂਦਾ ਗਤੀ ਭਰਮ ਫਾਈਫਿਨੋਮਨਾ ਕਹਾਉਂਦਾ ਹੈ।

-ਮਨੋਵਿਗਿਆਨਕ ਪ੍ਰਯੋਗਸ਼ਾਲਾ
ਪਿੰਡ ਨੌਨੀਤਪੁਰ, ਤਹਿ. ਗੜ੍ਹਸ਼ੰਕਰ, ਹੁਸ਼ਿਆਰਪੁਰ।

ਰਾਹੁਲ ਗਾਂਧੀ ਪ੍ਰਤੀ ਸਿੱਖ ਆਗੂਆਂ ਦੀ ਸੋਚ
ਪਿਛਲੇ ਦਿਨੀਂ ਹਰਜਿੰਦਰ ਸਿੰਘ ਲਾਲ ਦੇ ਸਰਗੋਸ਼ੀਆਂ ਕਾਲਮ 'ਚ 'ਰਾਹੁਲ ਗਾਂਧੀ, ਇੰਡੀਆ ਗੱਠਜੋੜ ਤੇ ਸਿੱਖ ਸਰੋਕਾਰ' ਸਿਰਲੇਖ ਅਧੀਨ ਲਿਖਿਆ ਲੇਖ ਪੜ੍ਹਿਆ। ਜੋ ਸਿਆਸੀ ਸੱਚ ਦੇ ਨੇੜੇ ਹੈ। ਸਿੱਖ ਧਾਰਮਿਕ ਆਗੂਆਂ ਨੂੰ ਸੋਚਣਾ ਹੋਵੇਗਾ ਕਿ ਉਨ੍ਹਾਂ ਨੂੰ ਸਮੇਂ ਦੀ ਤੌਰ ਨਾਲ ਤੁਰਨਾ ਹੈ ਜਾਂ ਫਿਰ ਇਕ ਜਮਾਤ ਦੇ ਪਿਛਲੱਗੂ ਬਣ ਕੇ ਸਿੱਖ ਮਸਲਿਆਂ ਨੂੰ ਉਲਝੇ ਰਹਿਣ ਦੇਣਾ ਹੈ।
ਜੇ ਸਿੱਖ ਆਗੂਆਂ ਨੇ ਸਿੱਖਾਂ ਦੀ ਭਾਰਤ ਦੀ ਰਾਜਨੀਤੀ 'ਚ ਹਿੱਸੇਦਾਰ ਬਣਾ ਕੇ ਮਸਲਿਆਂ ਨੂੰ ਅੰਤਰਰਾਸ਼ਟਰੀ ਪੱਧਰ 'ਤੇ ਚੁੱਕ ਕੇ ਨਜਿੱਠਣਾ ਹੈ ਤਾਂ ਸਿਰਫ਼ ਰਾਸ਼ਟਰੀ ਪੱਧਰ 'ਤੇ ਨਹੀਂ, ਸਗੋਂ ਅੰਤਰਰਾਸ਼ਟਰੀ ਰਾਜਨੀਤੀ ਨੂੰ ਸਮਝ ਕੇ ਅੱਗੇ ਵਧਣਾ ਪਵੇਗਾ। ਲੇਖਕ ਗੁਰਬਾਣੀ ਦੀਆਂ ਤੁਕਾਂ ਦਾ ਹਵਾਲਾ ਦਿੰਦਿਆਂ ਮੁਆਫ਼ ਕਰ ਦੇਣ ਨੂੰ ਸਭ ਤੋਂ ਵੱਡਾ ਗੁਣ ਦੱਸਦਿਆਂ ਨਸੀਹਤ ਦੇ ਕੇ ਸੱਚ ਦੀਆਂ ਪਰਤਾਂ ਖੋਲ੍ਹਦਾ ਹੈ।
ਜੇ ਸਿੱਖ ਧਾਰਮਿਕ ਆਗੂ ਸੱਚ-ਮੁੱਚ ਗੁਰੂ ਸਾਹਿਬਾਨਾਂ ਵਲੋਂ ਦੱਸੇ ਮਾਰਗ 'ਤੇ ਚੱਲਣ ਦੇ ਪੈਰੋਕਾਰ ਹਨ ਤਾਂ ਉਨ੍ਹਾਂ ਨੂੰ ਰਾਹੁਲ ਗਾਂਧੀ ਨੂੰ ਸਿਰੋਪਾਓ ਦਿੱਤੇ ਜਾਣ ਵਾਲੇ ਪਾਠੀ ਤੇ ਰਾਗੀ ਸਿੰਘਾਂ ਨੂੰ ਤੁਰੰਤ ਬਹਾਲ ਕਰਨਾ ਚਾਹੀਦਾ ਹੈ। ਅਜਿਹੇ ਬੇਲੋੜੇ ਵਿਵਾਦ ਤੋਂ ਗੁਰੇਜ਼ ਕਰਨਾ ਚਾਹੀਦਾ ਹੈ ਕਿਉਂਕਿ ਰਾਹੁਲ ਗਾਂਧੀ ਕਈ ਵਾਰ ਸ੍ਰੀ ਹਰਮੰਦਰ ਸਾਹਿਬ ਉੱਤੇ ਹਮਲੇ ਨੂੰ ਲੈ ਕੇ ਦੁੱਖ ਜਤਾਉਂਦੇ ਹੋਏ ਮੁਆਫ਼ੀ ਮੰਗ ਚੁੱਕੇ ਹਨ। ਸਾਨੂੰ ਇੰਦਰਾ ਗਾਂਧੀ ਦੀ ਗ਼ਲਤੀ ਦੀ ਸਜ਼ਾ ਰਾਹੁਲ ਗਾਂਧੀ ਨੂੰ ਨਹੀਂ ਦੇਣੀ ਚਾਹੀਦੀ।

-ਲੈਕਚਰਾਰ ਅਜੀਤ ਖੰਨਾ
ਐਮ.ਏ., ਐੱਮ.ਫਿਲ., ਐੱਮ.ਜੇ.ਐੱਮ.ਸੀ.ਬੀ.ਐੱਡ.।

ਬਿਮਾਰੀਆਂ ਤੋਂ ਬਚਣ ਲਈ ਯੋਗ ਜ਼ਰੂਰੀ
ਜੀਵਨ ਨੂੰ ਸਫ਼ਲ ਬਣਾਉਣ ਲਈ ਸਭ ਤੋਂ ਪਹਿਲਾਂ ਸਰੀਰ ਨੂੰ ਤਾਕਤਵਰ ਤੇ ਨਿਰੋਗ ਬਣਾਉਣਾ ਬਹੁਤ ਜ਼ਰੂਰੀ ਹੈ, ਜਿਸ ਲਈ ਸਾਡੇ ਵਡੇਰਿਆਂ ਨੇ ਯੋਗ ਆਸਨਾਂ ਦਾ ਮਾਰਗ ਲੱਭਿਆ ਸੀ। ਯੋਗ ਕਰਨ ਨਾਲ ਗੁੱਸੇ ਦੀ ਭਾਵਨਾ ਖ਼ਤਮ ਹੋ ਜਾਂਦੀ ਹੈ। ਮਨ ਵਿਚ ਵਧੀਆ ਅਤੇ ਸਕਾਰਾਤਮਕ ਵਿਚਾਰ ਆਉਂਦੇ ਹਨ। ਤੁਸੀਂ ਖ਼ੁਸ਼ ਰਹਿਣ ਲੱਗਦੇ ਹੋ। ਯੋਗ ਤੁਹਾਨੂੰ ਬਾਹਰੋਂ ਹੀ ਨਹੀਂ ਅੰਦਰੋਂ ਵੀ ਬਦਲ ਦਿੰਦਾ ਹੈ।
ਰੋਜ਼ਾਨਾ ਯੋਗ ਕਰਨ ਨਾਲ ਰੀੜ੍ਹ ਦੀ ਹੱਡੀ ਮਜ਼ਬੂਤ ਤੇ ਲਚਕੀਲੀ ਹੋ ਜਾਂਦੀ ਹੈ। ਤ੍ਰਿਕੋਣ ਆਸਨ ਕਰਨ ਨਾਲ ਰੀੜ੍ਹ ਦੀ ਹੱਡੀ ਨਾਲ ਦੀਆਂ ਮਾਸਪੇਸ਼ੀਆਂ ਮਜ਼ਬੂਤ ਹੁੰਦੀਆਂ ਹਨ ਤਾੜ ਆਸਨ ਨਾਲ ਰੀੜ੍ਹ ਦੀ ਟਰੈਕਸ਼ਨ ਕਰਨ ਨਾਲ ਰੀੜ੍ਹ ਦਾ ਉਪਰੀ ਹਿੱਸਾ ਲਚਕੀਲਾ ਰਹਿੰਦਾ ਹੈ। ਸਰੀਰ ਦਾ ਖ਼ੂਨ ਵਧੀਆ ਦੌਰਾ ਕਰਨ ਲੱਗ ਪੈਂਦਾ ਹੈ। ਯੋਗ ਨਾਲ ਚਿਹਰੇ ਦੀ ਤਾਜ਼ਗੀ ਅਤੇ ਚਮਕ ਬਰਕਰਾਰ ਰਹਿੰਦੀ ਹੈ।

-ਵਨੀਤਾ ਬਜਾਜ
ਯੋਗਾ ਟ੍ਰੇਨਰ, ਫ਼ਿਰੋਜ਼ਪੁਰ।