20-03-26

 ਅਖ਼ਬਾਰ ਪੜ੍ਹੋ ਅਤੇ ਰੇਡੀਓ ਸੁਣੋ
ਅੱਜ ਦੇ ਆਧੁਨਿਕ ਜ਼ਮਾਨੇ 'ਚ ਮੋਬਾਈਲ ਅਤੇ ਹੋਰ ਬੇਲੋੜੇ ਆਧੁਨਿਕ ਰੁਝੇਵਿਆਂ ਚ ਰੁੱਝੀ ਪੀੜ੍ਹੀ ਨੂੰ ਅਖਬਾਰਾਂ ਅਤੇ ਰੇਡੀਓ ਨਾਲ ਜੁੜਨ ਅਤੇ ਪੜ੍ਹਨ ਦੀ ਲੋੜਹੈ। ਪੁਰਾਣੇ ਸਮਿਆਂ ਵਿਚ ਪਿੰਡ ਦੀ ਸਾਂਝੀ ਥਾਂ 'ਤੇ ਰੇਡੀਓ ਸੁਣਨ ਨੂੰ ਮਿਲਦਾ ਹੁੰਦਾ ਸੀ। ਰਲ ਮਿਲ ਕੇ ਲੋਕ ਅਖ਼ਬਾਰ ਪੜ੍ਹਦੇ ਅਤੇ ਰੇਡੀਓ ਸੁਣ ਕੇ ਆਪਣਾ ਦੁੱਖ ਸੁੱਖ ਸਾਝਾਂ ਕਰਦੇ ਹੁੰਦੇ ਸਨ। ਜਿਥੋਂ ਕਾਬਿਲੇ ਤਾਰੀਫ ਅਤੇ ਕਾਬਿਲੇਗੌਰ ਸੁਝਾਅ ਮਿਲਦੇ ਸਨ। ਮੈਂ ਬਹੁਤ ਵਿਅਕਤੀਆਂ ਨੂੰ ਰੇਡੀਓ ਅਤੇ ਅਖ਼ਬਾਰ ਨਾਲ ਜੋੜਿਆ ਹੈ। ਜੋ ਕਹਿੰਦੇ ਹਨ।ਤੁਸੀਂ ਸਾਡਾ ਇਕੱਲਾਪਣ ਦੂਰ ਕਰ ਘਰ ਵਿਚ ਰੌਣਕ ਦੇ ਨਾਲ ਨਾਲ ਵਧੀਆ ਗੱਲਾਂ ਨਾਲ ਜਾਣ-ਪਛਾਣ ਕਰਵਾਉਣ ਵਿਚ ਯੋਗਦਾਨ ਪਾਇਆ ਹੈ।

-ਐੱਸ.ਮੀਲੂ 'ਫਰੌਰ'

ਖ਼ਬਰਾਂ ਤੋਂ ਬੇਖ਼ਬਰ ਨਾ ਹੋਵੋ

ਅੱਜ ਦੀ ਦੁਨੀਆ ਬਹੁਤ ਤੇਜ਼ੀ ਨਾਲ ਬਦਲ ਰਹੀ ਹੈ। ਹਰ ਪਲ ਕੁਝ ਨਵਾਂ ਹੋ ਰਿਹਾ ਹੈ ਕਿਸੇ ਦੇਸ਼ ਵਿਚ ਇਨਸਾਫ਼ ਦੀ ਲੜਾਈ, ਕਿਤੇ ਵਿਗਿਆਨ ਦੀ ਵੱਡੀ ਖੋਜ, ਕਿਤੇ ਮਨੁੱਖਤਾ ਲਈ ਚੁਣੌਤੀ। ਅਜਿਹੇ ਵਿਚ ਦੁਨੀਆ ਦੀਆਂ ਖ਼ਬਰਾਂ ਤੋਂ ਬੇਖ਼ਬਰ ਰਹਿਣਾ, ਆਪਣੇ ਹੱਕਾਂ, ਫ਼ਰਜ਼ਾਂ ਅਤੇ ਮੌਕਿਆਂ ਤੋਂ ਦੂਰ ਰਹਿਣ ਵਾਂਗ ਹੈ। ਖ਼ਬਰਾਂ ਸਿਰਫ਼ ਸਨਸਨੀ ਨਹੀਂ ਹੁੰਦੀਆਂ ਇਹ ਸਮਾਜ ਦਾ ਦਰਪਣ ਹੁੰਦੀਆਂ ਨੇ। ਜਦੋਂ ਅਸੀਂ ਸਹੀ ਜਾਣਕਾਰੀ ਨਾਲ ਜੁੜੇ ਰਹਿੰਦੇ ਹਾਂ, ਤਾਂ ਸੱਚ-ਝੂਠ ਦੀ ਪਛਾਣ ਕਰ ਸਕਦੇ ਹਾਂ। ਜਾਗਰੂਕ ਇਨਸਾਨ ਹੀ ਸਹੀ ਫੈਸਲੇ ਲੈਂਦਾ ਹੈ ਚਾਹੇ ਉਹ ਵੋਟ ਪਾਉਣ ਦੀ ਗੱਲ ਹੋਵੇ, ਸਮਾਜਿਕ ਮਸਲਿਆਂ 'ਤੇ ਆਵਾਜ਼ ਚੁੱਕਣੀ ਹੋਵੇ ਜਾਂ ਆਪਣੀ ਜ਼ਿੰਦਗੀ ਦੀ ਦਿਸ਼ਾ ਚੁਣਨੀ ਹੋਵੇ। ਦੁਨੀਆ ਦੀਆਂ ਖ਼ਬਰਾਂ ਸਾਨੂੰ ਹੋਰਾਂ ਦੇ ਦੁੱਖ ਦਰਦ ਨਾਲ ਜੋੜਦੀਆਂ ਹਨ। ਕਿਸੇ ਹੋਰ ਦੇਸ਼ ਵਿਚ ਆਈ ਮੁਸੀਬਤ ਸਾਨੂੰ ਮਨੁੱਖਤਾ ਸਿਖਾਉਂਦੀ ਹੈ, ਤੇ ਕਿਸੇ ਦੀ ਕਾਮਯਾਬੀ ਸਾਨੂੰ ਹੌਂਸਲਾ ਦਿੰਦੀ ਹੈ। ਇਹੀ ਜਾਗਰੂਕਤਾ ਸਾਨੂੰ ਸੰਵੇਦਨਸ਼ੀਲ, ਸਮਝਦਾਰ ਅਤੇ ਜ਼ਿੰਮੇਵਾਰ ਨਾਗਰਿਕ ਬਣਾਉਂਦੀ ਹੈ।

-ਮੰਜੂ ਰਾਇਕਾ
ਭਿੰਡਰਾਂ ਸੰਗਰੂਰ।

ਆਨਲਾਈਨ ਵਪਾਰ

ਅੱਜ ਦੇ ਡਿਜੀਟਲ ਯੁਗ ਵਿਚ ਆਨਲਾਈਨ ਸ਼ਾਪਿੰਗ ਦਿਨੋ ਦਿਨ ਵਧ ਰਹੀ ਹੈ। ਆਨਲਾਈਨ ਸ਼ਾਪਿੰਗ ਕਰਨ ਨਾਲ ਸਮੇਂ ਦੀ ਬੱਚਤ ਹੁੰਦੀ ਹੈ। ਵੱਖ-ਵੱਖ ਸਾਈਟਾਂ 'ਤੇ ਸਮਾਨ ਦੀ ਕੀਮਤ ਦੇਖ ਕੇ ਤੁਲਨਾ ਕਰ ਸਕਦੇ ਹਾਂ ਤੇ ਸਸਤਾ ਸਮਾਨ ਚੁਣ ਸਕਦੇ ਹਾਂ। ਆਨਲਾਈਨ ਸ਼ਾਪਿੰਗਨੇ ਛੋਟੇ ਵਪਾਰੀਆਂ ਨੂੰ ਆਪਣੇ ਉਤਪਾਦ ਸਿਰਫ ਗਾਹਕ ਤੱਕ ਨਹੀਂ ਬਲਕਿ ਦੇਸ਼ ਅਤੇ ਵਿਦੇਸ਼ ਤੱਕ ਪਹੁੰਚਾਉਣ ਦਾ ਮੌਕਾ ਦਿੱਤਾ ਹੈ। ਆਨਲਾਈਨ ਸ਼ਾਪਿੰਗ ਇੰਟਰਨੈੱਟ ਨਾਲ ਵਸਤੂ ਨੂੰ ਵੇਚਣ ਅਤੇ ਖਰੀਦਣ ਦਾ ਸੌਖਾ ਸਾਧਨ ਹੈ। ਆਨਲਾਈਨ ਖੇਤਰ ਵਿਕਰੀ ਦਾ ਮੁਕਾਬਲਾ ਕਰਨ ਲਈ ਛੋਟੇ ਕਾਰੋਬਾਰੀਆਂ ਨੂੰ ਸੁਧਾਰ ਕਰਨਾ ਚਾਹੀਦਾ ਹੈ। ਉਹ ਆਨਲਾਈਨ ਪਲੇਟਫਾਰਮਾਂ ਰਾਹੀਂ ਗਾਹਕਾਂ ਨਾਲ ਸਿੱਧਾ ਸੰਪਰਕ, ਗਾਹਕਾਂ ਦੀ ਰਾਏ ਅਤੇ ਮੰਗਾਂ ਬਾਰੇ ਜਾਣਕਾਰੀ ਪ੍ਰਾਪਤ ਕਰ ਸਕਦੇ ਹਨ। ਆਨਲਾਈਨ ਵਪਾਰ ਛੋਟੇ ਕਾਰੋਬਾਰਾਂ ਦੇ ਵਾਤਾਵਰਨ ਨੂੰ ਬਦਲ ਰਿਹਾ ਹੈ ਅਤੇ ਨਵੇਂ ਮੌਕੇ ਪ੍ਰਦਾਨ ਕਰ ਰਿਹਾ ਹੈ।

-ਕਮਲਦੀਪ ਕੌਰ,
ਨੌਧਰਾਣੀ (ਮਲੇਰਕੋਟਲਾ)

ਨਿਆਂਪਾਲਿਕਾ ਵਿਚ ਭ੍ਰਿਸ਼ਟਾਚਾਰ

ਐੱਨ ਸੀ ਈ ਆਰ ਟੀ ਦੁਆਰਾ ਅੱਠਵੀਂ ਜਮਾਤ ਦੀ ਸਮਾਜਿਕ ਵਿਗਿਆਨ ਦੀ ਨਵੀਂ ਪ੍ਰਕਾਸ਼ਿਤ ਪਾਠ ਪੁਸਤਕ ਵਿਚ ਨਿਆਂਪਾਲਿਕਾ ਵਿਚ ਭ੍ਰਿਸ਼ਟਾਚਾਰ ਦਾ ਵਿਸ਼ਾ ਸ਼ਾਮਿਲ ਹੋਣਾ ਆਮ ਲੋਕਾਂ ਨੂੰ ਚਿੰਤਾ, ਬੁੱਧੀਜੀਵੀਆਂ ਨੂੰ ਚਿੰਤਨ ਅਤੇ ਲੋਕਾਂ ਦੇ ਨਿਆਂਪਾਲਿਕਾ ਵਿਚ ਬਣੇ ਵਿਸ਼ਵਾਸ ਨੂੰ ਕਮਜ਼ੋਰ ਕਰਦਾ ਹੈ। ਭਾਰਤ ਦੇ ਚੀਫ਼ ਜਸਟਿਸ ਦੁਆਰਾ ਇਸ ਪੁਸਤਕ ਨੂੰ ਹਟਾਉਣ ਦੇ ਨਿਰਦੇਸ਼ ਨਾਲ ਬਜ਼ਾਰ 'ਚੋਂ ਪੁਸਤਕ ਹਟਾਉਣ ਦੀਆਂ ਤਿਆਰੀਆਂ ਚੱਲ ਰਹੀਆਂ ਹਨ। ਪਰੰਤੂ ਸਵਾਲ ਤਾਂ ਇਹ ਪੈਦਾ ਹੁੰਦਾ ਹੈ ਕਿ ਆਖ਼ਿਰ ਅਜਿਹਾ ਵਿਸ਼ਾ ਸ਼ਾਮਿਲ ਕਰਨ ਦੀ ਲੋੜ ਹੀ ਕਿਉਂ ਪਈ, ਕੀ ਸਚਮੁੱਚ ਸਾਡੀ ਨਿਆਂਪਾਲਿਕਾ ਭ੍ਰਿਸ਼ਟਾਚਾਰ ਮੁਕਤ ਹੈ? ਇਸ ਸਵਾਲ ਦਾ ਜਵਾਬ ਦੇਣਾ ਸੌਖਾ ਪ੍ਰੰਤੂ ਮੂੰਹੋਂ ਕਹਿਣਾ ਬਹੁਤ ਔਖਾ ਹੈ, ਜਵਾਬ ਸਾਨੂੰ ਪਤਾ ਹੈ ਪਰੰਤੂ ਅੰਦਰੋ ਅੰਦਰੀ ਪੈਦਾ ਹੁੰਦਾ ਤੌਖਲਾ ਜਵਾਬ ਦੇਣ ਤੋਂ ਮਨ੍ਹਾਂ ਕਰਦਾ ਹੋਇਆ ਹੱਥ ਘੁੱਟਦਾ ਹੈ। ਇੱਕ ਪ੍ਰਸਿੱਧ ਕਥਨ ਅਨੁਸਾਰ ਨਿਆਂ ਮਿਲਣ ਵਿਚ ਦੇਰੀ ਹੋਣਾ ਵੀ ਅਨਿਆਂ ਹੈ। ਆਮ ਆਦਮੀ ਨੂੰ ਕੇਵਲ ਸ਼ੱਕ ਦੇ ਆਧਾਰ 'ਤੇ ਗ੍ਰਿਫ਼ਤਾਰ ਕਰਕੇ ਸਾਲਾਂ ਬੱਧੀ ਜੇਲ੍ਹ ਵਿਚ ਰੱਖਣਾ ਨਿਆਂ ਦੀ ਦੇਵੀ ਨੂੰ ਅੰਗੂਠਾ ਦਿਖਾਉਣਾ ਹੈ। ਸਮਾਜਿਕ ਕਾਰਕੁੰਨਾਂ ਨੂੰ ਆਪਣੇ ਹੱਕਾਂ ਖ਼ਾਤਰ ਆਵਾਜ਼ ਬੁਲੰਦ ਕਰਨ ਤੇ ਬਿਨਾਂ ਕਿਸੇ ਦੋਸ਼ ਦੇ ਦੇਸ਼ ਧ੍ਰੋਹ ਦਾ ਖਿਤਾਬ ਦੇ ਕੇ ਜੇਲ੍ਹ ਵਿਚ ਡੱਕਣਾ ਅਤੇ ਜ਼ਮਾਨਤ ਵੀ ਨਾ ਦੇਣਾ ਕਿੱਥੋਂ ਦਾ ਨਿਆਂ ਹੈ? ਅਦਾਲਤਾਂ ਵਿਚ ਲੰਮੇ ਸਮੇਂ ਤੋਂ ਲਟਕਦੇ ਪਏ ਕੇਸਾਂ ਦਾ ਨਿਪਟਾਰਾ ਕਦੋਂ ਹੋਵੇਗਾ? ਨਿਆਂਪਾਲਿਕਾ ਵਿਚ ਭ੍ਰਿਸ਼ਟਾਚਾਰ ਦਾ ਮਾਮਲਾ ਇਹ ਸ਼ਾਹਦੀ ਭਰਦਾ ਹੈ ਕਿ ਦੇਸ਼ ਦੇ ਵਿਚ ਭ੍ਰਿਸ਼ਟਾਚਾਰ ਦਾ ਬੋਲਬਾਲਾ ਜਾਰੀ ਹੈ। ਬੱਚੇ ਇਸ ਬਾਰੇ ਜਾਣਨਾ ਕੋਈ ਮਾੜੀ ਗੱਲ ਨਹੀਂ ਉਹ ਵੀ ਦੇਸ਼ ਦਾ ਭਵਿੱਖ ਹਨ, ਉਨ੍ਹਾਂ ਨੂੰ ਵੀ ਪਤਾ ਹੋਣਾ ਚਾਹੀਦਾ ਹੈ ਕਿ ਦੁਨੀਆ ਦੇ ਸਭ ਤੋਂ ਵੱਡੇ ਲੋਕਤੰਤਰ ਦੀ ਨਿਆਂ ਪ੍ਰਣਾਲੀ ਕਿਸ ਤਰ੍ਹਾਂ ਕੰਮ ਕਰਦੀ ਹੈ।

-ਰਜਵਿੰਦਰ ਪਾਲ ਸ਼ਰਮਾ
ਪਿੰਡ ਕਾਲਝਰਾਣੀ (ਬਠਿੰਡਾ)