01-12-2525

ਪਿੰਡਾਂ ਦਾ ਰੁਜ਼ਗਾਰ
ਅੱਜ ਸਾਡੇ ਪੰਜਾਬ ਨੂੰ ਜ਼ਰੂਰਤ ਹੈ ਕਿ ਪੰਜਾਬ ਦੇ ਨੌਜਵਾਨ ਖ਼ਾਸ ਕਰਕੇ ਪਿੰਡਾਂ ਦੇ ਨੌਜਵਾਨ ਜੋ ਕਿ ਬਾਹਰੀ ਦੇਸ਼ਾਂ ਨੂੰ ਦੌੜ ਲਗਾ ਰਹੇ ਹਨ, ਨੂੰ ਪੰਜਾਬ ਵਿਚ ਰੋਕਣ ਅਤੇ ਉਨ੍ਹਾਂ ਨੂੰ ਰੁਜ਼ਗਾਰ ਦੇਣ ਦੀ। ਇਸ ਬਾਰੇ ਸਰਕਾਰ ਨੂੰ ਪਿੰਡਾਂ ਵੱਲ ਵਧੇਰੇ ਧਿਆਨ ਦੇਣ ਦੀ ਲੋੜ ਹੈ, ਕਿਉਂਕਿ ਪਿੰਡਾਂ ਵਿਚ ਦਿਹਾੜੀਆਂ ਕਰਨ ਤੋਂ ਇਲਾਵਾ ਹੋਰ ਕੋਈ ਵੀ ਕੰਮ ਨਹੀਂ ਹੈ। ਇਸ ਲਈ ਉਨ੍ਹਾਂ ਨੂੰ ਕੰਮ ਕਾਰ, ਫੈਕਟਰੀਆਂ ਜਾਂ ਦੁਕਾਨਾਂ 'ਤੇ ਵੀ ਕੰਮ ਮਿਲ ਜਾਵੇ ਤਾਂ ਉਹ ਕਰ ਸਕਦੇ ਹਨ। ਇਥੇ ਉਨ੍ਹਾਂ ਦੀ ਸਭ ਤੋਂ ਵੱਡੀ ਸਮੱਸਿਆ ਇਹ ਹੈ ਕਿ ਬਹੁਤੇ ਪਿੰਡਾਂ ਦੀਆਂ ਤਾਂ ਸੜਕਾਂ ਵੀ ਠੀਕ ਨਹੀਂ ਹਨ, ਜੇਕਰ ਠੀਕ ਹਨ ਤੇ ਉਨ੍ਹਾਂ ਪਿੰਡਾਂ ਨੂੰ ਸ਼ਾਮ ਨੂੰ ਜਾਂ ਸਵੇਰੇ ਜਲਦੀ ਪਿੰਡਾਂ ਤੋਂ ਸ਼ਹਿਰ ਨੂੰ ਆਉਣ ਲਈ ਬੱਸਾਂ ਦਾ ਕੋਈ ਪ੍ਰਬੰਧ ਨਹੀਂ ਹੈ। ਇਸ ਲਈ ਸਭ ਤੋਂ ਪਹਿਲਾਂ ਪਿੰਡਾਂ ਦੇ ਨੌਜਵਾਨਾਂ ਨੂੰ ਲੱਖਾਂ ਰੁਪਏ ਖ਼ਰਚ ਕੇ ਆਪਣਾ ਵਾਹਨ ਖਰੀਦਣਾ ਪੈਂਦਾ ਹੈ ਤਾਂ ਜਾ ਕੇ ਉਨ੍ਹਾਂ ਨੂੰ ਕੋਈ ਨੌਕਰੀ ਨਸੀਬ ਹੁੰਦੀ ਹੈ ਕਿਉਂਕਿ ਫੈਕਟਰੀਆਂ, ਦੁਕਾਨਾਂ ਆਦਿ 'ਤੇ ਉਨ੍ਹਾਂ ਦੀ ਛੁੱਟੀ ਦੇਰ ਸ਼ਾਮ ਨੂੰ ਹੁੰਦੀ ਹੈ। ਸਾਡੀ ਸਰਕਾਰ ਨੂੰ ਮੰਗ ਹੈ ਕਿ ਪਿੰਡਾਂ ਨੂੰ ਦੇਰ ਸ਼ਾਮ ਤੱਕ ਬੱਸਾਂ ਮੁਹੱਈਆ ਕਰਵਾਈਆਂ ਜਾਣ ਤਾਂ ਜੋ ਨੌਜਵਾਨ ਸ਼ਹਿਰਾਂ ਵਿਚ ਆ ਕੇ ਆਪਣਾ ਕੋਈ ਕੰਮ ਕਾਰ ਕਰ ਸਕਣ।

-ਅਸ਼ੀਸ਼ ਸ਼ਰਮਾ
ਜਲੰਧਰ

ਜਾਂਚ ਦਾ ਵਿਸ਼ਾ
ਪਿਛਲੇ ਦਿਨੀਂ 'ਅਜੀਤ' 'ਚ ਪ੍ਰਕਾਸ਼ਿਤ ਖ਼ਬਰ (31 ਅਕਤੂਬਰ) ਮੁਨਿਆਰੀ ਦੀ ਦੁਕਾਨ 'ਚ ਨੋਟਾਂ ਵਾਲੇ ਹਾਰਾਂ ਸਮੇਤ 10 ਲੱਖ ਦੀ ਚੋਰੀ ਬਾਰੇ ਪੜ੍ਹਿਆ, ਇਸ ਚੋਰੀ ਨਾਲ ਬੈਂਕਾਂ ਤੇ ਨੋਟਾਂ ਵਾਲੇ ਹਾਰ ਬਣਾਉਣ ਵਾਲਿਆਂ ਵਿਚਕਾਰ ਮਿਲੀਭੁਗਤ ਹੋਣ ਦਾ ਸ਼ੱਕ ਪੈਂਦਾ ਹੈ। ਜਦੋਂ ਵੀ ਕੋਈ ਆਮ ਵਿਅਕਤੀ ਬੈਂਕ 'ਚੋਂ ਆਪਣੇ ਬੇਟੇ ਜਾਂ ਬੇਟੀ ਦੀ ਸ਼ਾਦੀ ਜਾਂ ਖੁਸ਼ੀ ਦੇ ਦੇ ਕਿਸੇ ਹੋਰ ਮੌਕੇ ਨਵੇਂ ਨੋਟਾਂ ਦੀ ਮੰਗ ਕਰਦਾ ਹੈ ਤਾਂ ਬੈਂਕਾਂ ਵਾਲੇ ਕੋਰੀ ਨਾਂਹ ਕਰ ਦਿੰਦੇ ਹਨ। ਜਦਕਿ ਇਹ ਹਾਰਾਂ ਵਾਲੇ ਮਹਿੰਗੇ ਭਾਅ 'ਤੇ ਨੋਟ ਵੇਚ ਦਿੰਦੇ ਹਨ। ਇਹ ਹਾਰਾਂ ਵਾਲੇ ਕਿਥੋਂ ਤੇ ਕਿਵੇਂ ਨਵੇਂ ਨੋਟ ਪ੍ਰਾਪਤ ਕਰਦੇ ਹਨ, ਇਹ ਜ਼ਰੂਰ ਕੋਈ ਘੁਟਾਲਾ ਹੈ। ਇਸ ਬਾਰੇ ਪੁਲਿਸ ਨੂੰ ਦੁਕਾਨਾਂ 'ਤੇ ਛਾਪੇ ਮਾਰ ਕੇ ਨੋਟ ਪ੍ਰਾਪਤੀ ਦੇ ਸਰੋਤਾਂ ਬਾਰੇ ਪਤਾ ਕਰਨਾ ਚਾਹੀਦਾ ਹੈ। ਦੂਸਰੀ ਗੱਲ ਨੋਟਾਂ ਦੇ ਹਾਰਾਂ ਨੂੰ ਬਣਾਉਣ ਵੇਲੇ ਪਿੰਨਾਂ ਦੀ ਵਰਤੋਂ ਕੀਤੀ ਜਾਂਦੀ ਹੈ ਜਿਸ ਕਾਰਨ ਨੋਟ ਖਰਾਬ ਹੋ ਜਾਂਦੇ ਹਨ। 15-20 ਸਾਲ ਪਹਿਲਾਂ ਨੋਟਾਂ ਨੂੰ ਪੇਪਰ ਬੈਂਡ ਦੇ ਨਿਰਦੇਸ਼ ਦਿੱਤੇ ਗਏ ਸਨ। ਕੀ ਹਾਰਾਂ ਨੂੰ ਬਣਾਉਣ ਵੇਲੇ ਪਿੰਨਾਂ ਦੀ ਵਰਤੋਂ ਕਰਨਾ ਠੀਕ ਹੈ।

-ਅਜੀਤ ਸਿੰਘ
ਤਲਵਾੜਾ ਟਾਊਨਸ਼ਿਪ, ਹੁਸ਼ਿਆਰਪੁਰ।

ਡੀ.ਏ.ਪੀ. ਦੀ ਘਾਟ
ਪੰਜਾਬ ਮੌਜੂਦਾ ਹਾੜ੍ਹੀ ਸੀਜ਼ਨ ਲਈ ਡੀਏਪੀ ਖਾਦ ਦੀ ਭਰੀ ਘਾਟ ਦਾ ਸਾਹਮਣਾ ਕਰ ਰਿਹਾ ਹੈ, ਜਿਸ ਨਾਲ ਕਣਕ ਦੇ ਝਾੜ 'ਤੇ ਪ੍ਰਭਾਵ ਪੈ ਸਕਦਾ ਹੈ ਅਤੇ ਕਿਸਾਨਾਂ ਲਈ ਵਿੱਤੀ ਤਣਾਅ ਪੈਦਾ ਹੋ ਸਕਦਾ ਹੈ। ਭਾਰਤੀ ਖੇਤੀਬਾੜੀ ਖੋਜ ਸੰਸਥਾ ਦੇ ਪ੍ਰਮੁੱਖ ਵਿਗਿਆਨੀ ਡਾ. ਰਾਜਬੀਰ ਯਾਦਵ ਸਮੇਤ ਮਾਹਰਾਂ ਦੇ ਹੱਲ ਤੇ ਸਿਫ਼ਾਰਸ਼ਾਂ ਪੇਸ਼ ਕੀਤੀਆਂ ਹਨ। ਜਦੋਂ ਕੁਝ ਤਰੀਕਿਆਂ ਦੀ ਵਰਤੋਂ ਕੀਤੀ ਜਾਂਦੀ ਹੈ ਤਾਂ ਪ੍ਰਦੂਸ਼ਣ ਵਰਗੇ ਮੁੱਦੇ ਘੱਟ ਜਾਂਦੇ ਹਨ ਅਤੇ ਪਾਣੀ ਦੀ ਬੱਚਤ ਹੁੰਦੀ ਹੈ। ਪੰਜਾਬ ਖੇਤੀਬਾੜੀ ਯੂਨੀਵਰਸਿਟੀ ਤੇ ਹੋਰ ਮਾਹਰ ਘਾਟ ਨੂੰ ਪੂਰਾ ਕਰਨ ਲਈ ਐਨ ਪੀ ਕੇ ਜਾਂ ਐਸ.ਐੱਸ.ਪੀ. ਪਲੱਸ ਯੂਰੀਆ ਵਰਗੀਆਂ ਵਿਕਲਪਕ ਖਾਦਾਂ ਦੀ ਸਿਫ਼ਾਰਸ਼ ਕਰਦੇ ਹਨ। ਚੀਨ ਤੋਂ ਬਾਅਦ ਭਾਰਤ ਦੁਨੀਆ ਦਾ ਦੂਜਾ ਸਭ ਤੋਂ ਵੱਡਾ ਕਣਕ ਉਤਪਾਦਕ ਹੈ।

-ਕੋਮਨਪ੍ਰੀਤ ਕੌਰ
ਪਿੰਡ ਸ਼ੇਰਗੜ੍ਹ ਚੀਮਾ (ਮਾਲੇਰਕੋਟਲਾ)

ਮੈਰਿਜ ਪੈਲਸਾਂ 'ਚ ਰਹੋ ਚੌਕਸ
ਪਿਛਲੇ ਮਹੀਨੇ ਤੋਂ ਵਿਆਹਾਂ ਦਾ ਸੀਜ਼ਨ ਸ਼ੁਰੂ ਹੋ ਜਾਂਦਾ ਹੈ ਜਿਸ ਦੌਰਾਨ ਲੋਕਾਂ ਵਲੋਂ ਆਪਣੇ ਘਰਾਂ ਤੇ ਵੱਡੇ-ਵੱਡੇ ਮੈਰਿਜ ਪੈਲੇਸਾਂ ਅੰਦਰ ਵਿਆਹ ਸਮਾਗਮਾਂ ਦੀਆਂ ਖ਼ੁਸ਼ੀਆਂ ਸਾਂਝੀਆਂ ਕੀਤੀਆਂ ਜਾਂਦੀਆਂ ਹਨ। ਮੈਰਿਜ ਪੈਲੇਸਾਂ ਅੰਦਰ ਹੋ ਰਹੇ ਸਮਾਗਮਾਂ ਦੌਰਾਨ ਵੱਡੇ ਪੱਧਰ 'ਤੇ ਹੋ ਰਹੀਆਂ ਚੋਰੀਆਂ ਪਿਛਲੇ ਕੁਝ ਸਮੇਂ ਤੋਂ ਚਰਚਾ ਦਾ ਵਿਸ਼ਾ ਬਣੀਆਂ ਹੋਈਆਂ ਹਨ, ਚੋਰ ਸੋਨਾ ਅਤੇ ਨਕਦੀ ਬੜੀ ਚਲਾਕੀ ਨਾਲ ਚੋਰੀ ਕਰਕੇ ਫਰਾਰ ਹੋ ਜਾਂਦੇ ਹਨ।
ਵਿਆਹ ਸਮਾਗਮ ਦੌਰਾਨ ਪਰਿਵਾਰਕ ਮੈਂਬਰ ਬਹੁਤ ਹੀ ਰੁੱਝੇ ਹੋਏ ਹੁੰਦੇ ਹਨ, ਜਿਸ ਦਾ ਚੁਸਤ ਲੋਕਾਂ ਵਲੋਂ ਪੂਰਾ ਲਾਭ ਉਠਾਇਆ ਜਾਂਦਾ ਹੈ। ਇਸ ਲਈ ਵਿਆਹ ਸਮਾਗਮਾਂ ਦੌਰਾਨ ਲੜਕੇ ਅਤੇ ਲੜਕੀ ਦੇ ਪਰਿਵਾਰ ਵਾਲਿਆਂ ਨੂੰ ਬਹੁਤ ਚੌਕਸ ਰਹਿਣ ਦੀ ਲੋੜ ਹੈ ਤਾਂ ਜੋ ਅਜਿਹੀਆਂ ਘਟਨਾਵਾਂ ਨਾ ਵਾਪਰ ਸਕਣ। ਵਿਆਹ ਸਮਾਗਮਾਂ ਦੌਰਾਨ ਮੈਰਿਜ ਪੈਲੇਸਾਂ ਅੰਦਰ ਦਾਖਿਲ ਹੋਣ ਦੇ ਮਾਪਦੰਡ ਵੀ ਥੋੜ੍ਹੇ ਸਖ਼ਤ ਹੋਣੇ ਜ਼ਰੂਰੀ ਹਨ ਤਾਂ ਜੋ ਅਜਿਹੀਆਂ ਘਟਨਾਵਾਂ ਤੋਂ ਬਚਿਆ ਜਾ ਸਕੇ।

-ਰਵਿੰਦਰ ਸਿੰਘ ਰੇਸ਼ਮ
ਪਿੰਡ ਨੱਥੂਮਾਜਰਾ (ਮਾਲੇਰਕੋਟਲਾ)

ਇਨਸਾਨੀਅਤ ਸ਼ਰਮਸਾਰ ਹੋਈ
ਪਿਛਲੇ ਦਿਨੀਂ ਜਲੰਧਰ ਵਿਖੇ ਇਕ ਨਾਬਾਲਗ ਲੜਕੀ ਨਾਲ ਜਬਰਜਨਾਹ ਕਰਨ ਤੋਂ ਬਾਅਦ ਉਸ ਦੀ ਹੱਤਿਆ ਕਰਨ ਦੀ ਵਾਪਰੀ ਦਿਲ ਕੰਬਾਊ ਘਟਨਾ ਨੇ ਪੂਰੀ ਇਨਸਾਨੀਅਤ ਨੂੰ ਸ਼ਰਮਸਾਰ ਕਰ ਦਿੱਤਾ ਹੈ। ਜਲੰਧਰ ਦੀ ਇਸ ਬੱਚੀ ਨੂੰ ਵੀ ਅਜਿਹੇ ਇਕ ਹਵਸੀ ਭੇੜੀਏ ਨੇ ਆਪਣਾ ਸ਼ਿਕਾਰ ਬਣਾ ਕੇ ਉਸ ਨੂੰ ਬੇਪੱਤ ਕਰਕੇ ਉਸ ਦੀ ਹੱਤਿਆ ਕਰ ਦਿੱਤੀ। ਪੀੜਤ ਲੜਕੀ ਦੋਸ਼ੀ ਦੀ ਬੇਟੀ ਦੀ ਦੋਸਤ ਸੀ ਅਤੇ ਉਸ ਦਾ ਇਨ੍ਹਾਂ ਦੇ ਘਰ ਆਉਣਾ-ਜਾਣਾ ਸੀ। ਬੰਦੇ ਨੂੰ ਇਹ ਵੀ ਸ਼ਰਮ ਨਹੀਂ ਆਈ ਕਿ ਇਹ ਮੇਰੀ ਬੇਟੀ ਵਰਗੀ ਹੈ। ਮੇਰੀ ਬੇਟੀ ਦੀ ਸਹੇਲੀ ਵੀ ਹੈ। ਵਿਸ਼ਵਾਸ ਕਰਕੇ ਸਾਡੇ ਘਰ ਆ ਜਾਂਦੀ ਹੈ। ਇਸ ਬੰਦੇ ਨੇ ਬਹੁਤ ਹੀ ਦਿਲ ਨੂੰ ਦੁੱਖ ਦੇਣ ਵਾਲੀ ਘਟੀਆ ਹਰਕਤ ਕੀਤੀ ਹੈ। ਸਾਡੀ ਸਰਕਾਰ ਅਤੇ ਪੁਲਿਸ ਪ੍ਰਸ਼ਾਸਨ ਨੂੰ ਬੇਨਤੀ ਹੈ ਕਿ ਦੋਸ਼ੀ ਨੂੰ ਕਾਨੂੰਨ ਮੁਤਾਬਿਕ ਅਜਿਹੀ ਮਿਸਾਲੀ ਸਜ਼ਾ ਦਿੱਤੀ ਜਾਵੇ ਜਿਸ ਨੂੰ ਦੇਖ ਕੇ ਹੋਰ ਕੋਈ ਵੀ ਦਰਿੰਦਾ ਅਜਿਹੀ ਘਟੀਆ ਹਰਕਤ ਕਰਨ ਦੀ ਜੁਅਰਤ ਨਾ ਕਰ ਸਕੇ। ਇਸ ਦੋਸ਼ੀ ਨੂੰ ਜਿੰਨੀ ਜਲਦੀ ਹੋ ਸਕੇ ਫਾਂਸੀ ਦੀ ਸਜ਼ਾ ਹੋਵੇ। ਫਿਰ ਤੋਂ ਪੰਜਾਬ ਅਤੇ ਦੇਸ਼ ਦੀ ਕਿਸੇ ਹੋਰ ਬੇਟੀ ਨਾਲ ਅਜਿਹੀ ਮੰਦਭਾਗੀ ਘਟਨਾ ਨਾ ਵਾਪਰ ਸਕੇ। ਇਸ ਘਟਨਾ ਨੇ ਇਨਸਾਨੀਅਤ ਦੇ ਮੱਥੇ 'ਤੇ ਕਲੰਕ ਲਗਾ ਦਿੱਤਾ ਹੈ।

-ਗੁਰਤੇਜ ਸਿੰਘ ਖੁਡਾਲ,
ਭਾਗੂ ਰੋਡ, ਬਠਿੰਡਾ।