ਬੈਂਗਲੁਰੂ, 30 ਅਗਸਤ (ਪੀ.ਟੀ.ਆਈ.)-ਭਾਰਤ ਦੇ ਟੈਸਟ ਕਪਤਾਨ ਤੇ ਟੀ-20 ਉਪ-ਕਪਤਾਨ ਸ਼ੁਭਮਨ ਗਿੱਲ ਆਉਣ ਵਾਲੇ ਏਸ਼ੀਆ ਕੱਪ ਲਈ ਦੁਬਈ ਜਾਣ ਤੋਂ ਪਹਿਲਾਂ ਫਿਟਨੈਸ ਮੁਲਾਂਕਣ ਤੇ ਤਿਆਰੀਆਂ ਲਈ ਇੱਥੇ ਬੀ.ਸੀ.ਸੀ.ਆਈ ਸੈਂਟਰ ਆਫ਼ ਐਕਸੀਲੈਂਸ (ਸੀ.ਓ.ਈ.) ਪਹੁੰਚੇ ਹਨ | ਏਸ਼ੀਆ ਕੱਪ ਲਈ ਭਾਰਤੀ ਟੀਮ 'ਚ ਜਗ੍ਹਾ ਬਣਾਉਣ ਵਾਲੇ ਖਿਡਾਰੀ 9 ਸਤੰਬਰ ਨੂੰ ਮੇਜ਼ਬਾਨ ਯੂ.ਏ.ਈ. ਵਿਰੁੱਧ ਟੂਰਨਾਮੈਂਟ ਦੇ ਉਦਘਾਟਨੀ ਮੈਚ ਤੋਂ ਪਹਿਲਾਂ 4 ਸਤੰਬਰ ਨੂੰ ਦੁਬਈ 'ਚ ਇਕੱਠੇ ਹੋਣ ਵਾਲੇ ਹਨ | ਸੀਨੀਅਰ ਬੱਲੇਬਾਜ਼ ਰੋਹਿਤ ਸ਼ਰਮਾ ਤੇ ਤੇਜ਼ ਗੇਂਦਬਾਜ਼ ਮੁਹੰਮਦ ਸਿਰਾਜ ਵੀ ਫਿਟਨੈਸ ਮੁਲਾਂਕਣ ਲਈ ਸੀ.ਓ.ਈ. ਪਹੁੰਚੇ ਹਨ¢ ਐਤਵਾਰ ਤੋਂ ਫਿਟਨੈਸ ਜਾਂਚ ਸ਼ੁਰੂ ਹੋਣ ਦੀ ਸੰਭਾਵਨਾ ਹੈ ਤੇ ਸਾਰਿਆਂ ਦੀਆਂ ਨਜ਼ਰਾਂ ਵਨਡੇ ਕਪਤਾਨ ਰੋਹਿਤ 'ਤੇ ਹੋਣਗੀਆਂ, ਜੋ ਪਹਿਲਾਂ ਹੀ ਟੀ-20 ਅਤੇ ਟੈਸਟ ਕ੍ਰਿਕਟ ਤੋਂ ਸੰਨਿਆਸ ਲੈ ਚੁੱਕਾ ਹੈ | 38 ਸਾਲਾ ਖਿਡਾਰੀ ਦੇ ਅਕਤੂਬਰ 'ਚ ਇਕ ਰੋਜ਼ਾ ਲੜੀ ਲਈ ਆਸਟ੍ਰੇਲੀਆ ਦਾ ਦੌਰਾ ਕਰਨ ਦੀ ਸੰਭਾਵਨਾ ਹੈ ਪਰ ਇਹ ਦੇਖਣਾ ਬਾਕੀ ਹੈ ਕਿ ਉਹ 30 ਸਤੰਬਰ, 3 ਅਕਤੂਬਰ ਤੇ 5 ਅਕਤੂਬਰ ਨੂੰ ਕਾਨਪੁਰ 'ਚ ਆਸਟ੍ਰੇਲੀਆ 'ਏ' ਵਿਰੁੱਧ ਹੋਣ ਵਾਲੇ ਇਕ ਰੋਜ਼ਾ ਮੈਚ ਖੇਡਦਾ ਹੈ ਜਾਂ ਨਹੀਂ | ਆਸਟ੍ਰੇਲੀਆ ਵਿਰੁੱਧ ਇਕ ਰੋਜ਼ਾ ਲੜੀ ਦੇ ਮੈਚ 19, 23 ਅਤੇ 25 ਅਕਤੂਬਰ ਨੂੰ ਖੇਡੇ ਜਾਣਗੇ | ਗਿੱਲ ਤੋਂ ਇਲਾਵਾ, ਵਿਕਟਕੀਪਰ-ਬੱਲੇਬਾਜ਼ ਜਿਤੇਸ਼ ਸ਼ਰਮਾ ਵੀ ਟੂਰਨਾਮੈਂਟ ਤੋਂ ਪਹਿਲਾਂ ਦੀਆਂ ਤਿਆਰੀਆਂ ਲਈ ਸੀ.ਓ.ਈ. ਪਹੁੰਚ ਗਏ ਹਨ | ਜਾਣਕਾਰੀ ਅਨੁਸਾਰ ਮੁੱਖ ਤੇਜ਼ ਗੇਂਦਬਾਜ਼ ਜਸਪ੍ਰੀਤ ਬੁਮਰਾਹ, ਵਾਸ਼ਿੰਗਟਨ ਸੁੰਦਰ, ਯਸ਼ਸਵੀ ਜੈਸਵਾਲ ਤੇ ਸ਼ਾਰਦੁਲ ਠਾਕੁਰ ਵੀ ਸੀ.ਓ.ਈ. ਪਹੁੰਚਣ ਲਈ ਤਿਆਰ ਹਨ |
