ਨਵੀਂ ਦਿੱਲੀ, 30 ਅਗਸਤ (ਯੂ.ਐਨ.ਆਈ.)-ਗੂਗਲ ਨੇ ਦੁਨੀਆ ਭਰ ਦੇ 2.5 ਅਰਬ ਜੀਮੇਲ ਉਪਭੋਗਤਾਵਾਂ ਨੂੰ ਸਾਈਬਰ ਹਮਲਿਆਂ ਬਾਰੇ ਇਕ ਗੰਭੀਰ ਚੇਤਾਵਨੀ ਜਾਰੀ ਕੀਤੀ ਹੈ | ਕੰਪਨੀ ਨੇ ਉਪਭੋਗਤਾਵਾਂ ਨੂੰ ਆਪਣੇ ਪਾਸਵਰਡ ਤੁਰੰਤ ਅਪਡੇਟ ਕਰਨ ਤੇ 2-ਪੜਾਅ ਦੀ ਤਸਦੀਕ ਚਾਲੂ ਕਰਨ ਦੀ ਅਪੀਲ ਕੀਤੀ ਹੈ | ਹਾਲ ਹੀ 'ਚ ਹੈਕਿੰਗ ਦੇ ਮਾਮਲੇ ਵਧੇ ਹਨ, ਜਿਸ ਕਾਰਨ ਗੂਗਲ ਨੇ ਸੁਰੱਖਿਆ ਉਪਾਵਾਂ ਨੂੰ ਮਜ਼ਬੂਤ ਕਰਨ 'ਤੇ ਜ਼ੋਰ ਦਿੱਤਾ ਹੈ | ਮੀਡੀਆ ਰਿਪੋਰਟਾਂ ਦੇ ਅਨੁਸਾਰ, 'ਸ਼ਾਈਨੀਹੰਟਰਸ' ਨਾਮਕ ਇਕ ਹੈਕਿੰਗ ਸਮੂਹ 2020 ਤੋਂ ਸਰਗਰਮ ਹੈ | ਇਹ ਸਮੂਹ ਏ.ਟੀ.ਐਂਡ.ਟੀ., ਮਾਈਕ੍ਰੋਸਾਫਟ, ਸੈਂਟੇਂਡਰ ਤੇ ਟਿਕਟਮਾਸਟਰ ਵਰਗੀਆਂ ਵੱਡੀਆਂ ਕੰਪਨੀਆਂ 'ਚ ਡੇਟਾ ਉਲੰਘਣਾਵਾਂ ਨਾਲ ਜੁੜਿਆ ਹੋਇਆ ਹੈ | ਇਨ੍ਹਾਂ ਹੈਕਰਾਂ ਦਾ ਸਭ ਤੋਂ ਆਮ ਤਰੀਕਾ ਫਿਸ਼ਿੰਗ ਈਮੇਲ ਭੇਜਣਾ ਹੈ ਜਿਸ ਰਾਹੀਂ ਉਹ ਉਪਭੋਗਤਾਵਾਂ ਨੂੰ ਜਾਅਲੀ ਲੌਗਇਨ ਪੰਨਿਆਂ 'ਤੇ ਲੈ ਜਾਂਦੇ ਹਨ ਅਤੇ ਪਾਸਵਰਡ ਵਰਗੀ ਸੰਵੇਦਨਸ਼ੀਲ ਜਾਣਕਾਰੀ ਚੋਰੀ ਕਰਦੇ ਹਨ |
