ਸਮਾਰੋਹ ਵਾਲੀ ਵਿਸ਼ੇਸ਼ ਕਿੱਟ ਸਮੇਂ ਸਿਰ ਨਾ ਪਹੁੰਚਣ ਕਾਰਨ ਲਿਆ ਫ਼ੈਸਲਾ
ਨਾਗੋਆ, 19 ਸਤੰਬਰ (ਪੀ. ਟੀ. ਆਈ.)-ਤਜ਼ਰਬੇਕਾਰ ਕਬੱਡੀ ਖਿਡਾਰੀ ਪਵਨ ਸਹਿਰਾਵਤ ਨੇ ਇੱਥੇ ਏਸ਼ਿਆਈ ਖੇਡਾਂ ਦੇ ਉਦਘਾਟਨੀ ਸਮਾਰੋਹ ਲਈ ਭਾਰਤ ਦੇ ਝੰਡਾ-ਬਰਦਾਰ ਵਜੋਂ ਤਜਿੰਦਰਪਾਲ ਸਿੰਘ ਤੂਰ ਦੀ ਥਾਂ ਲਈ ਹੈ। ਇਸ ਦਾ ਕਾਰਨ ਇਹ ਹੈ ਕਿ ਮਸ਼ਹੂਰ ਸ਼ਾਟ-ਪੁੱਟ ਖਿਡਾਰੀ (ਤੂਰ) ਕੋਲ ਆਪਣੇ ਸਾਮਾਨ ਵਿਚ ਸਮਾਰੋਹ ਵਾਲੀ ਵਿਸ਼ੇਸ਼ ਕਿੱਟ ਮੌਜੂਦ ਨਹੀਂ ਹੈ, ਜਿਸ ਕਾਰਨ ਉਹ ਇਸ ਸ਼ਾਨਦਾਰ ਸਮਾਗਮ ਵਿਚ ਸ਼ਾਮਿਲ ਨਹੀਂ ਹੋ ਸਕਣਗੇ।ਤੂਰ ਨੇ ਸਮਾਰੋਹ ਦੌਰਾਨ ਰਾਸ਼ਟਰੀ ਦਲ ਦੀ ਅਗਵਾਈ ਕਰਨ ਲਈ ਨਿਸ਼ਾਨੇਬਾਜ਼ੀ ਦੀ ਮਾਹਰ ਮਨੂ ਭਾਕਰ ਨਾਲ ਸ਼ਾਮਿਲ ਹੋਣਾ ਸੀ।‘ਸ਼ੈੱਫ-ਦ-ਮਿਸ਼ਨ’ ਸਹਿਦੇਵ ਯਾਦਵ ਨੇ ਦੱਸਿਆ ਕਿ 30 ਸਾਲਾ ਸਹਿਰਾਵਤ, ਜੋ ਪਿਛਲੀਆਂ ਏਸ਼ੀਆਈ ਖੇਡਾਂ ਵਿਚ ਸੋਨ ਤਗਮਾ ਜਿੱਤਣ ਵਾਲੀ ਭਾਰਤੀ ਪੁਰਸ਼ ਕਬੱਡੀ ਟੀਮ ਦਾ ਹਿੱਸਾ ਸਨ, ਜੋ ਹੁਣ ਤੂਰ ਦੀ ਥਾਂ ਲੈਣਗੇ। ਤੂਰ ਨੇ ਦੱਸਿਆ ਕਿ ਮੈਨੂੰ ਦੱਸਿਆ ਗਿਆ ਹੈ ਕਿ ਮੇਰੀ ਸਮਾਰੋਹ ਵਾਲੀ ਕਿੱਟ ਦੁਪਹਿਰ 3 ਵਜੇ (ਨਾਗੋਆ) ਹਵਾਈ ਅੱਡੇ ‘ਤੇ ਪਹੁੰਚੇਗੀ। ਹਵਾਈ ਅੱਡੇ ਤੋਂ ਸਮੇਂ ਸਿਰ ਆਪਣੀ (ਸਮਾਰੋਹ ਵਾਲੀ) ਕਿੱਟ ਲੈ ਕੇ ਉਦਘਾਟਨੀ ਸਮਾਰੋਹ ਵਾਲੀ ਥਾਂ ‘ਤੇ ਪਹੁੰਚਣਾ ਬਹੁਤ ਮੁਸ਼ਕਲ ਹੋਵੇਗਾ। ਇਸ ਲਈ, ਮੈਂ ਆਈ.ਓ.ਏ. (ਭਾਰਤੀ ਉਲੰਪਿਕ ਸੰਘ) ਨੂੰ ਦੱਸ ਦਿੱਤਾ ਹੈ ਕਿ ਮੈਂ ਉਦਘਾਟਨੀ ਸਮਾਰੋਹ ਲਈ ਨਹੀਂ ਆ ਰਿਹਾ ਹਾਂ।
