<h4>ਕਿਊ.ਐਸ. ਯੂਨੀਵਰਸਿਟੀ ਦਰਜਾਬੰਦੀ</h4> ਭਾਰਤ ਦੀਆਂ ਰਿਕਾਰਡ 54 ਸੰਸਥਾਵਾਂ ਸੂਚੀ 'ਚ ਸ਼ਾਮਿਲ

ਆਈ.ਆਈ.ਟੀ. ਦਿੱਲੀ ਦਾ ਸਭ ਤੋਂ ਉੱਚਾ ਸਥਾਨ
ਨਵੀਂ ਦਿੱਲੀ, 19 ਜੂਨ (ਪੀ.ਟੀ.ਆਈ.)-ਕਿਊ.ਐਸ. ਵਰਲਡ ਯੂਨੀਵਰਸਿਟੀ ਦਰਜਾਬੰਦੀ 2026 ਜਾਰੀ ਕੀਤੀ ਗਈ ਹੈ | ਇਸ ਸਾਲ ਦੀ ਦਰਜਾਬੰਦੀ 'ਚ ਭਾਰਤੀ ਯੂਨੀਵਰਸਿਟੀਆਂ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ ਹੈ | ਲਗਭਗ 50 ਫ਼ੀਸਦੀ ਭਾਰਤੀ ਸੰਸਥਾਵਾਂ ਦੀ ਦਰਜਾਬੰਦੀ 'ਚ ਸੁਧਾਰ ਦੇਖਣ ਨੂੰ ਮਿਲਿਆ ਹੈ, ਜੋ ਕਿ ਦੇਸ਼ ਦੀ ਉੱਚ ਸਿੱਖਿਆ ਪ੍ਰਣਾਲੀ ਲਈ ਇਕ ਵੱਡੀ ਪ੍ਰਾਪਤੀ ਮੰਨਿਆ ਜਾਂਦਾ ਹੈ | ਆਈ.ਆਈ.ਟੀ. ਦਿੱਲੀ ਨੇ ਇਸ ਸਾਲ ਸਭ ਤੋਂ ਵੱਡੀ ਛਾਲ ਮਾਰੀ ਹੈ | ਇਹ ਸੰਸਥਾ ਹੁਣ ਗਲੋਬਲ ਰੈਂਕਿੰਗ 'ਚ 123ਵੇਂ ਸਥਾਨ 'ਤੇ ਪਹੁੰਚ ਗਈ ਹੈ | ਇਹ ਰੁਜ਼ਗਾਰ ਨਤੀਜਿਆਂ (50ਵਾਂ ਸਥਾਨ), ਹਵਾਲਿਆਂ (86ਵਾਂ ਸਥਾਨ), ਸਥਿਰਤਾ (172ਵਾਂ ਸਥਾਨ) ਤੇ ਅਕਾਦਮਿਕ ਪ੍ਰਤਿਸ਼ਠਾ (142ਵੇਂ ਸਥਾਨ) 'ਚ ਸ਼ਾਨਦਾਰ ਨਤੀਜਿਆਂ ਦੇ ਕਾਰਨ ਹੈ | ਇਸ ਸਾਲ ਦਰਜਾਬੰਦੀ 'ਚ 8 ਨਵੇਂ ਸੰਸਥਾਨ ਸ਼ਾਮਿਲ ਹੋਣ ਦੇ ਨਾਲ ਭਾਰਤ ਦੀਆਂ ਹੁਣ 54 ਸੰਸਥਾਵਾਂ ਇਸ ਸੂਚੀ 'ਚ ਸ਼ਾਮਿਲ ਹੋ ਗਈਆਂ ਹਨ, ਜਿਸ ਨਾਲ ਇਹ ਸਿਰਫ਼ ਅਮਰੀਕਾ (192 ਸੰਸਥਾਵਾਂ), ਯੂਕੇ (90 ਸੰਸਥਾਵਾਂ) ਅਤੇ ਮੇਨਲੈਂਡ ਚੀਨ (72 ਸੰਸਥਾਵਾਂ) ਤੋਂ ਬਾਅਦ ਚੌਥਾ ਸਭ ਤੋਂ ਵੱਧ ਪ੍ਰਤੀਨਿਧਤਾ ਵਾਲਾ ਦੇਸ਼ ਬਣ ਗਿਆ ਹੈ | ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਕਿਹਾ ਕਿ ਇਹ ਦਰਜਾਬੰਦੀ ਭਾਰਤ ਦੇ ਸਿੱਖਿਆ ਖੇਤਰ ਲਈ ਵੱਡੀ ਖ਼ਬਰ ਲੈ ਕੇ ਆਈ ਹੈ | ਉਨ੍ਹਾਂ ਕਿਹਾ ਕਿ ਸਾਡੀ ਸਰਕਾਰ ਭਾਰਤ ਦੇ ਨੌਜਵਾਨਾਂ ਦੇ ਫਾਇਦੇ ਲਈ ਖੋਜ ਤੇ ਨਵੀਨਤਾ ਵਾਤਾਵਰਨ ਪ੍ਰਣਾਲੀਆਂ ਨੂੰ ਅੱਗੇ ਵਧਾਉਣ ਲਈ ਵਚਨਬੱਧ ਹੈ | ਕੇਂਦਰੀ ਸਿੱਖਿਆ ਮੰਤਰੀ ਧਰਮਿੰਦਰ ਪ੍ਰਧਾਨ ਨੇ ਵੀ ਦਰਜਾਬੰਦੀ 'ਚ ਭਾਰਤ ਦੇ ਪ੍ਰਦਰਸ਼ਨ ਦੀ ਸ਼ਲਾਘਾ ਕਰਦੇ ਹੋਏ ਕਿਹਾ ਕਿ ਦੇਸ਼ ਨੇ ਇਕ ਨਵਾਂ ਉੱਚਾ ਸਥਾਨ ਹਾਸਿਲ ਕੀਤਾ ਹੈ | ਜ਼ਿਕਰਯੋਗ ਹੈ ਕਿ ਲੰਡਨ-ਅਧਾਰਤ ਗਲੋਬਲ ਉੱਚ ਸਿੱਖਿਆ ਵਿਸ਼ਲੇਸ਼ਣ ਫਰਮ ਕਵਾਕਵੇਰੇਲੀ ਸਾਇਮੰਡਸ ਵਲੋਂ ਹਰ ਸਾਲ ਪ੍ਰਕਾਸ਼ਿਤ ਕੀਤੀ ਜਾਣ ਵਾਲੀ ਕਿਊ.ਐਸ. ਵਿਸ਼ਵ ਯੂਨੀਵਰਸਿਟੀ ਦਰਜਾਬੰਦੀ, ਅਕਾਦਮਿਕ ਪ੍ਰਤਿਸ਼ਠਾ, ਫੈਕਲਟੀ-ਵਿਦਿਆਰਥੀ ਅਨੁਪਾਤ, ਖੋਜ ਪ੍ਰਭਾਵ, ਅੰਤਰਰਾਸ਼ਟਰੀ ਵਿਦਿਆਰਥੀ ਵਿਭਿੰਨਤਾ ਅਤੇ ਗ੍ਰੈਜੂਏਟ ਰੁਜ਼ਗਾਰਯੋਗਤਾ ਸਮੇਤ ਕਈ ਪ੍ਰਦਰਸ਼ਨ ਸੂਚਕਾਂ ਦੇ ਆਧਾਰ 'ਤੇ ਯੂਨੀਵਰਸਿਟੀਆਂ ਦਾ ਮੁਲਾਂਕਣ ਕਰਦੀ ਹੈ | ਕਿਊ.ਐਸ. ਅਧਿਕਾਰੀਆਂ ਨੇ ਨੋਟ ਕੀਤਾ ਕਿ ਸਿਰਫ਼ ਇਕ ਦਹਾਕੇ 'ਚ ਭਾਰਤ ਦੀਆਂ ਦਰਜਾਬੰਦੀ ਵਾਲੀਆਂ ਯੂਨੀਵਰਸਿਟੀਆਂ 11 ਤੋਂ 54 ਹੋ ਗਈਆਂ ਹਨ | ਇਸ ਸਾਲ ਦੀ ਕਿਊ.ਐਸ. ਵਰਲਡ ਯੂਨੀਵਰਸਿਟੀ ਦਰਜਾਬੰਦੀ 'ਚ ਭਾਰਤ ਦੀ ਸ਼ਾਨਦਾਰ ਪ੍ਰਗਤੀ ਨਾ ਸਿਰਫ਼ ਇਸਦੇ ਪ੍ਰਮੁੱਖ ਸੰਸਥਾਨਾਂ ਦੇ ਵਧਦੇ ਵਿਸ਼ਵਵਿਆਪੀ ਕੱਦ ਨੂੰ ਦਰਸਾਉਂਦੀ ਹੈ, ਸਗੋਂ ਇਸਦੇ ਉੱਚ ਸਿੱਖਿਆ ਦੇ ਦਿ੍ਸ਼ ਦੀ ਵਧਦੀ ਚੌੜਾਈ ਤੇ ਇੱਛਾ ਨੂੰ ਵੀ ਦਰਸਾਉਂਦੀ ਹੈ |