ਪਠਾਨਕੋਟ, 25 ਦਸੰਬਰ (ਸੰਧੂ)- ਸਾਹਿਬਜ਼ਾਦਿਆਂ ਦੀ ਮਹਾਨ ਸ਼ਹਾਦਤ ਨੂੰ ਸ਼ਰਧਾਂਜਲੀ ਦਿੰਦੇ ਹੋਏ ਸਿਟੀ ਰੇਲਵੇ ਦੇ ਪਾਵਰ ਹਾਊਸ ਨੇ ਸ਼ਰਧਾ ਤੇ ਸੇਵਾ ਨਾਲ ਦੁੱਧ ਦਾ ਲੰਗਰ ਲਗਾਇਆ | ਇਹ ਸਮਾਗਮ ਸਿੱਖ ਇਤਿਹਾਸ ਵਿਚ ਅਮਰ ਕੁਰਬਾਨੀ ਨੂੰ ਸਮਰਪਿਤ ਸੀ ਤੇ ਵੱਡੀ ਗਿਣਤੀ ਵਿਚ ਸ਼ਰਧਾਲੂਆਂ ਅਤੇ ਰਾਹਗੀਰਾਂ ਨੇ ਲੰਗਰ ਵਿਚ ਹਿੱਸਾ ਲਿਆ | ਪਾਵਰ ਹਾਊਸ ਦੇ ਕਰਮਚਾਰੀਆਂ ਤੇ ਅਧਿਕਾਰੀਆਂ ਨੇ ਲੰਗਰ ਸੇਵਾ ਵਿਚ ਉਤਸ਼ਾਹ ਨਾਲ ਹਿੱਸਾ ਲਿਆ | ਸ਼ਿਵ ਦੱਤ, ਰਵੀ ਕੁਮਾਰ (ਐੱਸ.ਐੱਸ.ਈ.), ਹਰਲਾਲ ਮੀਨਾ (ਜੇ.ਈ.), ਸੁਰੇਸ਼ ਮਹਾਜਨ, ਰਾਜੇਸ਼ ਅਹੂਜਾ, ਸਤਬੀਰ ਸਿੰਘ, ਜੋਗੇਸ਼, ਕੁਲਭੂਸ਼ਣ, ਬਲਦੇਵ ਸਿੰਘ, ਅਮਨ ਤੇ ਜਤਿੰਦਰ ਲੰਗਰ ਸੇਵਾ ਦੌਰਾਨ ਵਿਸ਼ੇਸ਼ ਤੌਰ 'ਤੇ ਮੌਜੂਦ ਸਨ ਤੇ ਸ਼ਰਧਾ ਨਾਲ ਸੰਗਤ ਦੀ ਸੇਵਾ ਕੀਤੀ | ਰੇਲਵੇ ਕਰਮਚਾਰੀਆਂ ਨੇ ਦੱਸਿਆ ਕਿ ਸਾਹਿਬਜ਼ਾਦਿਆਂ ਨੇ ਛੋਟੀ ਉਮਰ ਵਿਚ ਧਰਮ ਤੇ ਮਨੁੱਖਤਾ ਦੀ ਰੱਖਿਆ ਲਈ ਇਕ ਬੇ-ਮਿਸਾਲ ਕੁਰਬਾਨੀ ਦਿੱਤੀ, ਜੋ ਅੱਜ ਵੀ ਸਮਾਜ ਨੂੰ ਸੱਚ, ਹਿੰਮਤ ਤੇ ਕੁਰਬਾਨੀ ਲਈ ਯਤਨ ਕਰਨ ਲਈ ਪ੍ਰੇਰਿਤ ਕਰਦੀ ਹੈ | ਅੰਤ 'ਚ ਕਾਮਰੇਡ ਸ਼ਿਵਦੱਤ ਨੂੰ ਇਕ ਤਸਵੀਰ ਦੇ ਕੇ ਸਨਮਾਨਿਤ ਕੀਤਾ ਗਿਆ |
