ਨਡਾਲਾ, 5 ਦਸੰਬਰ (ਰਘਬਿੰਦਰ ਸਿੰਘ)-ਬਲਾਕ ਸੰਮਤੀ ਚੋਣਾਂ ਵਿਚ ਕਾਂਗਰਸੀ ਉਮੀਦਵਾਰਾਂ ਦੇ ਪੰਜ ਜ਼ੋਨਾਂ ਤੋਂ ਪੇਪਰ ਰੱਦ ਹੋਣ ਤੇ ਜਿੱਥੇ ਅੱਜ ਵਿਧਾਇਕ ਸੁਖਪਾਲ ਸਿੰਘ ਖਹਿਰਾ ਨੇ ਸਰਕਾਰ ਖ਼ਿਲਾਫ਼ ਰੱਜ ਕੇ ਭੜਾਸ ਕੱਢੀ ਉੱਥੇ ਉਨਾਂ ਸਟੇਟ ਇਲੈੱਕਸ਼ਨ ਕਮਿਸ਼ਨ ਰਾਜ ਕਮਲ ਨੂੰ ਸ਼ਿਕਾਇਤ ਕਰਦਿਆਂ ਇੱਕ ਪੱਤਰ ਵੀ ਲਿਖਿਆ ਜਿਸ ਵਿਚ ਉਨਾਂ ਲਿਖਿਆ ਕਿ ਮੈਨੂੰ ਇਹ ਸ਼ਿਕਾਇਤ ਕਰਨ ਲਈ ਮਜਬੂਰ ਹੋਣਾ ਪੈ ਰਿਹਾ ਹੈ ਕਿ ਭੁਲੱਥ ਦੇ ਆਰ ਓ ਅਤੇ ਏ ਆਰ ਓ ਨੇ ਸਿਆਸੀ ਦਬਾਅ ਹੇਠ ਆ ਕੇ ਕਾਂਗਰਸ ਪਾਰਟੀ ਦੇ ਉਮੀਦਵਾਰਾਂ ਦੇ 5 ਨੋਮੀਨੇਸ਼ਨ ਪੇਪਰ ਰੱਦ ਕਰ ਦਿੱਤੇ ਹਨ ਜਿਨਾਂ ਵਿਚ ਪੂਰਨ ਸਿੰਘ- ਜ਼ੋਨ 17 ਲੱਖਣ ਕੇ ਪੱਡੇ, ਜੋਬਨ ਸਿੰਘ ਅਤੇ ਗੁਰਜੀਤ ਸਿੰਘ, ਉਮੀਦਵਾਰ-ਜ਼ੋਨ 18 ਚੱਕੋਕੀ, ਹਰਦੇਵ ਸਿੰਘ ਅਤੇ ਕਮਲਜੀਤ ਕੌਰ ਉਮੀਦਵਾਰ-ਜ਼ੋਨ 10 ਨੰਗਲ ਲੁਬਾਣਾ, ਰਜਿੰਦਰ ਕੌਰ ਉਮੀਦਵਾਰ-ਜ਼ੋਨ 21 ਪੱਡੇ ਬੇਟ ਸ਼ਾਮਿਲ ਹਨ ਖਹਿਰਾ ਨੇ ਸ਼ਿਕਾਇਤ ਕਰਦਿਆਂ ਲਿਖਿਆ ਉਪਰੋਕਤ ਅਧਿਕਾਰੀਆਂ ਨੇ ਸ਼ਾਮ 5:30 ਵਜੇ ਸੂਚੀ ਤਾਂ ਲਗਾ ਦਿੱਤੀ ਪਰ ਦਫ਼ਤਰ ਤੋਂ ਨੋਮੀਨੇਸ਼ਨ ਰੱਦ ਕਰਨ ਸਬੰਧੀ ਕਿਸੇ ਹੁਕਮ ਜਾਂ ਕਾਰਨ ਦੱਸੇ ਬਿਨਾ ਚੋਰਾਂ ਵਾਂਗ ਨਿਕਲ ਗਏ, ਜਦੋਂ ਮੈਂ ਇਹ ਸ਼ਿਕਾਇਤ ਕਰ ਰਿਹਾ ਹਾਂ, ਉਸ ਸਮੇਂ ਤਕ ਆਰ.ਓ.-ਕਮ-ਏ.ਡੀ.ਸੀ. ਕਪੂਰਥਲਾ ਨੇ ਅਜੇ ਤੱਕ ਭੁਲੱਥ ਹਲਕੇ ਨਾਲ ਸੰਬੰਧਿਤ ਜ਼ਿਲਾ ਪ੍ਰੀਸ਼ਦ ਦੇ 3 ਜ਼ੋਨਾਂ ਦੀ ਉਮੀਦਵਾਰਾਂ ਦੀ ਸੂਚੀ ਵੀ ਜਾਰੀ ਨਹੀਂ ਕੀਤੀ | ਤੇ ਮੈਂ ਬੇਨਤੀ ਕਰਦਾ ਹਾਂ ਕਿ ਤੁਸੀਂ ਸਬੰਧਿਤ ਆਰ ਓ ਨੂੰ ਤੁਰੰਤ ਆਦੇਸ਼ ਕਰੋ ਕਿ ਉਹ ਸਾਨੂੰ ਰੱਦਗੀ ਦੇ ਹੁਕਮ ਜਾਰੀ ਕਰਨ, ਤਾਂ ਜੋ ਅਸੀਂ ਪੰਜਾਬ ਅਤੇ ਹਰਿਆਣਾ ਦੇ ਮਾਣਯੋਗ ਹਾਈ ਕੋਰਟ ਦਾ ਰੁੱਖ ਕਰ ਸਕੀਏ | ਮੈਂ ਤੁਹਾਡੇ ਤੁਰੰਤ ਜਵਾਬ ਦੀ ਉਡੀਕ ਕਰ ਰਿਹਾ ਹਾਂ ਤਾਂ ਜੋ ਅਸੀਂ ਸਮੇਂ ਸਿਰ ਇਨਸਾਫ਼ ਲਈ ਅਦਾਲਤ ਜਾ ਸਕੀਏ |
