ਓਸਲੋ, 5 ਜੂਨ (ਏਜੰਸੀ)-ਗ੍ਰੈਂਡਮਾਸਟਰ ਆਰ ਪ੍ਰਾਗਿਆਨਾਨੰਦ ਨੇ ਵੱਕਾਰੀ ਨਾਰਵੇ ਸ਼ਤਰੰਜ ਦਾ ਖ਼ਿਤਾਬ ਜਿੱਤ ਕੇ ਇਤਿਹਾਸ ਰਚ ਦਿੱਤਾ | ਸ਼ੁੱਕਰਵਾਰ ਨੂੰ ਹੋਏ ਮੁਕਾਬਲੇ 'ਚ ਪ੍ਰਗਿਆਨਾਨੰਦ ਨੇ ਜਰਮਨੀ ਦੇ ਵਿਨਸੈਂਟ ਕੀਮਰ ਨੂੰ ਹਰਾ ਕੇ ਖ਼ਿਤਾਬ ਆਪਣੇ ਨਾਂਅ ਕੀਤਾ | ਪ੍ਰਗਿਆਨਾਨੰਦ ਨੇ ਦਿਨ ਦੀ ਸ਼ੁਰੂਆਤ 15 ਅੰਕਾਂ ਨਾਲ ਤੀਸਰੇ ਸਥਾਨ 'ਤੇ ਕੀਤੀ ਸੀ | ਉਸ ਨੇ ਸਭ ਤੋਂ ਅਹਿਮ ਸਮੇਂ 'ਤੇ ਸ਼ਾਨਦਾਰ ਖੇਡ ਦਾ ਪ੍ਰਦਰਸ਼ਨ ਕੀਤਾ ਅਤੇ ਜਿੱਤ ਪ੍ਰਾਪਤ ਕਰਕੇ ਪੂਰੇ ਤਿੰਨ ਅੰਕ ਪ੍ਰਾਪਤ ਕੀਤੇ | ਅਜਿਹਾ ਕਰਕੇ ਚੇਨਈ ਦੇ 20 ਸਾਲ ਦੇ ਖਿਡਾਰੀ ਨੇ ਉਹ ਖ਼ਿਤਾਬ ਆਪਣੇ ਨਾਂਅ ਕਰ ਲਿਆ ਜੋ 2013 ਵਿਚ ਟੂਰਨਾਮੈਂਟ ਸ਼ੁਰੂ ਹੋਣ ਦੇ ਬਾਅਦ ਤੋਂ ਭਾਰਤੀ ਸ਼ਤਰੰਜ ਦੇ ਦਿੱਗਜ ਵਿਸ਼ਵਨਾਥਨ ਆਨੰਦ ਅਤੇ ਮੌਜੂਦਾ ਵਿਸ਼ਵ ਚੈਂਪੀਅਨ ਡੀ. ਗੁਕੇਸ਼ ਵੀ ਨਹੀਂ ਪ੍ਰਾਪਤ ਕਰ ਸਕੇ | ਨਾਰਵੇ ਸ਼ਤਰੰਜ 'ਚ ਦੂਸਰੀ ਵਾਰ ਹਿੱਸਾ ਲੈ ਰਹੇ ਪ੍ਰਗਿਆਨਾਨੰਦ ਦੀ ਸ਼ੁਰੂਆਤ ਕੁੱਝ ਮੱਠੀ ਸੀ ਪਰ ਟੂਰਨਾਮੈਂਟ ਦੇ ਦੂਸਰੇ ਅੱਧ 'ਚ ਉਸ ਨੇ ਆਪਣੀ ਲੈਅ ਪ੍ਰਾਪਤ ਕਰ ਲਈ ਅਤੇ ਸੱਤ ਵਾਰ ਦੇ ਚੈਂਪੀਅਨ ਅਤੇ ਵਿਸ਼ਵ ਦੇ ਨੰਬਰ ਇਕ ਮੈਗਨਸ ਕਾਰਲਸਨ ਨੂੰ ਦੋ ਵਾਰ ਹਰਾਇਆ |
