ਪਾਕਿ ਵਲੋਂ ਪਹਿਲੀ ਸਵਦੇਸ਼ੀ ਮਿਜ਼ਾਈਲ ‘ਫ਼ਾਅਜ਼’ ਦਾ ਪ੍ਰੀਖਣ

ਅੰਮ੍ਰਿਤਸਰ, 4 ਨਵੰਬਰ (ਸੁਰਿੰਦਰ ਕੋਛੜ)-ਪਾਕਿਸਤਾਨ ਨੇ ਆਪਣੇ ਦੇਸ਼ ’ਚ ਹੀ ਵਿਕਸਤ ਕੀਤੀ ਪਹਿਲੀ ਹਵਾ ਤੋਂ ਹਵਾ ’ਚ ਮਾਰ ਕਰਨ ਵਾਲੀ ਮਿਜ਼ਾਈਲ ‘ਫ਼ਾਅਜ਼’ ਦਾ ਉਡਾਣ ਪ੍ਰੀਖਣ ਕੀਤਾ ਹੈ। ਪਾਕਿਸਤਾਨੀ ਫ਼ੌਜ ਦੇ ਮੀਡੀਆ ਵਿੰਗ ਇੰਟਰ-ਸਰਵਿਸਿਜ਼ ਪਬਲਿਕ ਰਿਲੇਸ਼ਨਜ਼ (ਆਈ.ਐੱਸ.ਪੀ.ਆਰ.) ਅਨੁਸਾਰ ਆਧੁਨਿਕ ਟਰਮੀਨਲ ਗਾਈਡੈਂਸ ਸਿਸਟਮ ਨਾਲ ਲੈਸ ਇਹ ਮਿਜ਼ਾਈਲ ਦੂਰ ਖੜ੍ਹੇ ਦੁਸ਼ਮਣ ਦੇ ਹਵਾਈ ਟੀਚਿਆਂ ਨੂੰ ਨਿਸ਼ਾਨਾ ਬਣਾਉਣ ਦੇ ਸਮਰੱਥ ਹੈ । ਇਸ ਮਿਜ਼ਾਈਲ ਦੇ ਸ਼ਾਮਿਲ ਹੋਣ ਨਾਲ ਪਾਕਿਸਤਾਨ ਹਵਾਈ ਫ਼ੌਜ ਦੀ ਕਾਰਜਸ਼ੀਲ ਸਮਰੱਥਾ ਵਧੇਗੀ ਤੇ ਦੇਸ਼ ਦਾ ਰੱਖਿਆ ਢਾਂਚਾ ਮਜ਼ਬੂਤ ਹੋਵੇਗਾ । ਇਸ ਪ੍ਰੀਖਣ ਦੌਰਾਨ ਪਾਕਿਸਤਾਨੀ ਹਥਿਆਰਬੰਦ ਬਲਾਂ ਦੇ ਸੀਨੀਅਰ ਅਧਿਕਾਰੀ, ਵਿਗਿਆਨੀ ਤੇ ਇੰਜੀਨੀਅਰ ਮੌਜੂਦ ਸਨ । ਇਸ ਤੋਂ ਪਹਿਲਾਂ ਪਾਕਿਸਤਾਨੀ ਫ਼ੌਜ ਨੇ ਹਾਈਪਰਸੋਨਿਕ ਬੈਲਿਸਟਿਕ ਮਿਜ਼ਾਈਲ ‘ਫ਼ਤਹਿ-2 ਐਕਸਟੈਂਡਿਡ ਰੇਂਜ’ ਦਾ ਵੀ ਪ੍ਰੀਖਣ ਕੀਤਾ । ਆਈ. ਐੱਸ. ਪੀ. ਆਰ. ਮੁਤਾਬਿਕ ਇਹ ਹਥਿਆਰ ਪ੍ਰਣਾਲੀ ਆਧੁਨਿਕ ਨੈਵੀਗੇਸ਼ਨ ਤੇ ਐਵੀਓਨਿਕਸ ਨਾਲ ਲੈਸ ਹੈ । ਇਹ ਮਿਜ਼ਾਈਲ ਦੁਸ਼ਮਣ ਦੇ ਇਲਾਕੇ ’ਚ ਅੰਦਰ ਤੱਕ ਜਾ ਕੇ ਬੜੀ ਸਟੀਕਤਾ ਨਾਲ ਟੀਚੇ ’ਤੇ ਹਮਲਾ ਕਰਨ ਦੇ ਸਮਰੱਥ ਹੈ ।