ਗੜ੍ਹਸ਼ੰਕਰ, 11 ਮਈ (ਧਾਲੀਵਾਲ)-ਕਣਕ ਦੀ ਫਸਲ ਦੀ ਕਟਾਈ ਤੋਂ ਬਾਅਦ ਖੇਤਾਂ ਨੂੰ ਠੰਢਾ ਕਰਨ ਦੇ ਨਾਂਅ 'ਤੇ ਖੇਤਾਂ 'ਚ ਮਣਾਂ ਮੂੰਹੀ ਪਾਣੀ ਛੱਡਣਾਂ ਬੇਤੁੱਕਾ ਹੀ ਨਹੀਂ ਸਗੋਂ ਨਾਜਾਇਜ਼ ਹੈ, ਜਿਸ ਨਾਲ ਕਿਸਾਨ ਖੁਦ ਆਪਣਾ ਹੀ ਨੁਕਸਾਨ ਕਰ ਰਹੇ ਹਨ | ਇਹ ਪ੍ਰਗਟਾਵਾ ਸੇਵਾ-ਮੁਕਤ ਖੇਤੀਬਾੜੀ ਅਫਸਰ ਤੇ ਵਾਤਾਵਰਨ ਪ੍ਰੇਮੀ ਡਾ. ਹਰਵਿੰਦਰ ਸਿੰਘ ਬਾਠ ਵਲੋਂ ਕੀਤਾ | ਉਨ੍ਹਾਂ ਕਿਹਾ ਕਿ ਜਿਸ ਖੇਤ ਵਿਚ ਕਿਸਾਨ ਨੇ ਅਜੇ ਕਿਸੇ ਵੀ ਫਸਲ ਦੀ ਬਿਜਾਈ ਨਹੀਂ ਕਰਨੀ, ਉਸ ਖੇਤ 'ਚ ਹਾਲੇ ਰੌਣੀ ਲਈ ਪਾਣੀ ਛੱਡਣ ਦੀ ਲੋੜ ਨਹੀਂ | ਉਨ੍ਹਾਂ ਕਿਹਾ ਕਿ ਅਗਰ ਕਿਸੇ ਖੇਤ ਵਿਚ ਫਸਲ ਦੀ ਬਿਜਾਈ ਨਹੀਂ ਕਰਨੀ ਤਾਂ ਉਸ ਖੇਤ ਨੂੰ ਸਮੇਂ ਤੋਂ ਪਹਿਲਾ ਵਾਹੁਣ ਭਾਵ ਵੱਡ ਪੁੱਟਣ ਦਾ ਕੋਈ ਫਾਇਦਾ ਨਹੀਂ ਹੋਵੇਗਾ |
