ਅਬੋਹਰ, 5 ਜੂਨ (ਖ਼ਾਲਸਾ)-ਅਬੋਹਰ ਦੇ ਲਾਜਪਤ ਨਗਰ ਦੇ ਵਾਸੀਆਂ ਵਲੋਂ ਇਕ ਮੀਟਿੰਗ ਸਿੱਧੀ ਵਿਣਾਇਕ ਮੰਦਰ ਵਿਚ ਪ੍ਰੋਫੈਸਰ ਅਸ਼ੋਕ ਸਚਦੇਵਾ ਦੀ ਅਗਵਾਈ ਹੇਠ ਹੋਈ ਜਿਸ ਵਿਚ ਮੁਹੱਲੇ ਦੇ ਵਿਕਾਸ ਅਤੇ ਸਮੱਸਿਆਵਾਂ ਦੇ ਹੱਲ ਸੰਬੰਧੀ ਇਕ ਸੰਸਥਾ ਦਾ ਗਠਨ ਕੀਤਾ ਗਿਆ | ਜਿਸ ਦਾ ਨਾਮ ਲਾਜਪਤ ਨਗਰ ਸੁਧਾਰ ਸਭਾ ਰੱਖਿਆ ਗਿਆ | ਸਭਾ ਦਾ ਮੁੱਖ ਉਦੇਸ਼ ਲਾਜਪਤ ਨਗਰ ਵਿਚ ਲੰਬੇ ਸਮੇਂ ਤੋਂ ਚਲੀਆਂ ਆ ਰਹੀਆਂ ਵੱਖ-ਵੱਖ ਸਮੱਸਿਆਵਾਂ ਦੇ ਹੱਲ ਦੇ ਲਈ ਕੋਸ਼ਿਸ਼ ਕਰਨਾ ਅਤੇ ਸੰਬੰਧਿਤ ਵਿਭਾਗਾਂ ਦੇ ਸਾਹਮਣੇ ਮੁਹੱਲਾ ਵਾਸੀਆਂ ਦੀ ਆਵਾਜ਼ ਬੁਲੰਦ ਕਰਨਾ ਹੋਵੇਗਾ | ਇਸ ਵਿਚ ਸੁਰਿੰਦਰ ਨਾਗਪਾਲ ਨੂੰ ਕੋਆਰਡੀਨੇਟਰ ਅਤੇ ਗੁਲਸ਼ਨ ਭਾਟੀਆ ਨੂੰ ਸਹਾਇਕ ਕੋਆਰਡੀਨੇਟਰ ਬਣਾਇਆ ਗਿਆ ਜਦ ਕਿ 10 ਮੈਂਬਰੀ ਕਮੇਟੀ ਵਿਚ ਪ੍ਰਵੀਨ ਚਾਵਲਾ, ਅਸ਼ੋਕ ਕੁਮਾਰ ਵਾਟਸ, ਸਤੀਸ਼ ਕੁਮਾਰ ਵਾਟਸ, ਡਿੰਕੀ ਮੁੰਜਾਲ, ਰਾਕੇਸ਼ ਗੁੰਬਰ, ਅਨਿਲ ਚਾਵਲਾ, ਅੰਸ਼ੂ ਤਿੰਨਾ, ਨਰੇਸ਼ ਗੁਪਤਾ, ਰਾਜੇਸ਼ ਕਾਲੜਾ ਅਤੇ ਸੁਮਿਤ ਨੂੰ ਸ਼ਾਮਲ ਕੀਤਾ ਗਿਆ | ਇਸ ਦੌਰਾਨ ਵਾਰਡ ਦੇ ਨਵੇਂ ਬਣੇ ਕੌਂਸਲਰ ਯਾਦਵਿੰਦਰ ਸਿੰਘ ਬਰਾੜ ਨੇ ਵੀ ਵਿਸ਼ੇਸ਼ ਤੌਰ 'ਤੇ ਹਾਜ਼ਰੀ ਭਰੀ | ਉਨ੍ਹਾਂ ਲਾਜਪਤ ਨਗਰ ਦੇ ਵਾਸੀਆਂ ਵਲੋਂ ਚੋਣ ਵਿਚ ਜੇਤੂ ਬਣਾਉਣ ਲਈ ਧੰਨਵਾਦ ਕੀਤਾ ਅਤੇ ਮੁਹੱਲੇ ਦੀਆਂ ਸਮੱਸਿਆਵਾਂ ਜਲਦ ਹੱਲ ਕਰਵਾਉਣ ਦਾ ਵਿਸ਼ਵਾਸ ਵੀ ਦਵਾਇਆ |
