ਪੈਨਸ਼ਨਰ, ਮੁਲਾਜ਼ਮ ਵਿਰੋਧੀ ਮਾਨ ਸਰਕਾਰ ਨੂੰ 2027 ਦੀਆਂ ਚੋਣਾਂ ਵਿਚ ਮੂੰਹ ਦੀ ਖਾਣੀ ਪਵੇਗੀ- ਫ਼ਤਿਹ ਚੱਕ, ਲਾਲਪੁਰਾ

ਤਰਨ ਤਾਰਨ, 10 ਅਗਸਤ (ਇਕਬਾਲ ਸਿੰਘ ਸੋਢੀ)- ਮੁਲਾਜ਼ਮ ਅਤੇ ਪੈਨਸ਼ਨਰ ਦੀ ਚੰਡੀਗੜ੍ਹ ਵਿਖੇ ਸੰਪੰਨ ਹੋਈ ਮਹਾਂ ਰੈਲੀ ਅਤੇ ਵਿਸ਼ਾਲ ਰੋਸ ਪ੍ਰਦਰਸ਼ਨ ਅਤੇ ਮਾਨ ਸਰਕਾਰ ਦੀ ਨੀਤੀ ਅਤੇ ਨੀਅਤ ਬਾਰੇ ਵਿਚਾਰ ਚਰਚਾ ਉਪਰੰਤ ਪੈਨਸ਼ਨਰਜ ਐਂਡ ਸੀਨੀਅਰ ਸਿਟੀਜਨਜ ਵੈਲਫੇਅਰ ਐਸੋਸੀਏਸ਼ਨ ਤਰਨ ਤਾਰਨ ਦੇ ਪ੍ਰਧਾਨ ਅਜੀਤ ਸਿੰਘ ਫ਼ਤਿਹ ਚੱਕ ਨੇ ਸੀਨੀਅਰ ਮੀਤ ਪ੍ਰਧਾਨ ਸ਼ਮੀਰ ਸਿੰਘ ਲਾਲਪੁਰਾ ਅਤੇ ਜਗਤਾਰ ਸਿੰਘ ਸਰਲੀ, ਤਹਿਸੀਲ ਪ੍ਰਧਾਨ ਧਰਮ ਸਿੰਘ ਖਡੂਰ ਸਾਹਿਬ, ਸੁਰਿੰਦਰ ਸਿੰਘ ਤਰਨ ਤਾਰਨ ਨਾਲ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਇਸ ਮਹਾਂ ਰੈਲੀ ਵਿਚ ਮੁਲਾਜ਼ਮਾਂ, ਪੈਨਸ਼ਨਰਾਂ, ਠੇਕੇ ’ਤੇ ਆਊਟ ਸੋਰਸ ਕਾਮਿਆਂ ਅਤੇ ਮਾਨਭੱਤਾ ਵਾਲੇ ਕਾਮਿਆਂ ਦਾ ਹਜ਼ਾਰਾਂ ਦੀ ਗਿਣਤੀ ਵਿਚ ਠਾਠਾਂ ਮਾਰਦਾ ਭਾਰੀ ਇਕੱਠ ਪੰਜਾਬ ਸਰਕਾਰ ਨੂੰ ਸੋਚਾਂ ਪਾ ਗਿਆ । ਸਰਕਾਰ ਦੇ ਸਤਾਏ ਅਣਗਿਣਤ ਲੋਕਾਂ ਦਾ ਇਹ ਭਾਰੀ ਇਕੱਠ ਇਹ ਸੁਣਾਉਣੀ ਕਰ ਗਿਆ ਕਿ ਸਰਕਾਰ ਨੇ ਕੁੱਟ ਕੇ ਵੇਖ ਲਿਆ, ਪਾਣੀ ਦੀਆਂ ਬੁਛਾੜਾ ਮਾਰ ਕੇ ਵੇਖ ਲਈਆਂ , ਅੱਥਰੂ ਗੈਸ ਛੱਡ ਕੇ ਵੇਖ ਕਈ, ਮੀਟਿੰਗਾਂ ਦੇ ਝੂਠੇ ਪੱਤਰ ਦੇ ਕੇ ਵੇਖ ਲਿਆ, ਪਰ ਜੁਝਾਰੂ ਯੋਧਿਆਂ ਦੇ ਹੌਂਸਲੇ ਫਿਰ ਵੀ ਬੁਲੰਦ ਹਨ ।