ਚੰਡੀਗੜ੍ਹ, 28 ਫਰਵਰੀ (ਅਜੀਤ ਬਿਊਰੋ)-ਭਾਰਤੀ ਜਨਤਾ ਪਾਰਟੀ ਦੇ ਸੂਬਾ ਪ੍ਰਧਾਨ ਸੁਨੀਲ ਜਾਖੜ ਨੇ ਕਿਹਾ ਹੈ ਕਿ ਜਿਸ ਤਰ੍ਹਾਂ ਕਾਂਗਰਸ ਆਗੂ ਰਾਹੁਲ ਗਾਂਧੀ ਨੂੰ ਪੰਜਾਬ ਆ ਕੇ ਆਪਣੇ ਆਗੂਆਂ ਨੂੰ ਜਨਤਕ ਤੌਰ 'ਤੇ ਨਸੀਹਤ ਦੇਣ ਲਈ ਮਜਬੂਰ ਹੋਣਾ ਪਿਆ ਹੈ, ਇਹ ਸਿੱਧ ਕਰਦਾ ਹੈ ਕਿ ਕਾਂਗਰਸ ਦੀ ਹਾਈਕਮਾਨ ਆਪਣਾ ਪ੍ਰਭਾਵ ਗਵਾ ਚੁੱਕੀ ਹੈ ਅਤੇ ਸੂਬਾ ਲੀਡਰਸ਼ਿਪ ਆਪ ਮੁਹਾਰੀ ਹੋਈ ਪਈ ਹੈ | ਸੁਨੀਲ ਜਾਖੜ ਨੇ ਕਿਹਾ ਕਿ ਜੋ ਗੱਲ ਬੰਦ ਕਮਰੇ ਵਿਚ ਸਮਝਾਈ ਜਾ ਸਕਦੀ ਸੀ, ਉਸ ਦੇ ਲਈ ਕਾਂਗਰਸ ਨੂੰ ਰੈਲੀ ਕਰਨੀ ਪਈ ਅਤੇ ਜਨਤਕ ਤੌਰ 'ਤੇ ਆਪਣੇ ਸੂਬਾ ਆਗੂਆਂ ਦੀ ਕਲਾਸ ਲਗਾਉਣ ਪਈ | ਦੂਜੇ ਪਾਸੇ, ਅੱਜ ਸੈਲਰ ਐਸੋਸੀਏਸ਼ਨ ਦੇ ਨੁਮਾਇੰਦਿਆਂ ਨੇ ਭਾਜਪਾ ਪ੍ਰਧਾਨ ਸੁਨੀਲ ਜਾਖੜ ਨੂੰ ਮਿਲ ਕੇ ਉਨ੍ਹਾਂ ਦਾ ਧੰਨਵਾਦ ਕੀਤਾ, ਜਿਨ੍ਹਾਂ ਨੇ ਐਸੋਸੀਏਸ਼ਨ ਦੇ ਨਾਲ ਜਾ ਕੇ ਕੇਂਦਰੀ ਫੂਡ ਸਪਲਾਈ ਮੰਤਰੀ ਪ੍ਰਹਿਲਾਦ ਜੋਸ਼ੀ ਕੋਲ ਫੋਰਟੀਫਾਈਡ ਰਾਈਸ ਦਾ ਮੁੱਦਾ ਚੁੱਕਿਆ ਸੀ | ਰੰਜਮ ਕਮਰਾ ਕਨਵੀਨਰ ਪੰਜਾਬ ਭਾਜਪਾ ਸੈੱਲ, ਰੋਹਿਤ ਅੱਗਰਵਾਲ (ਰਾਸ਼ਟਰੀ ਸ਼ੈਲਰ ਸੰਘ ਦੇ ਪ੍ਰਧਾਨ) ਕਰਨਲ ਇੰਦਰਪਾਲ ਸਿੰਘ ਢਾਲੀਵਾਲ (ਚੇਅਰਮੈਨ) ਸੋਨੂ ਗਰਗ (ਜਨਰਲ ਸਕੱਤਰ) ਸਾਹਿਲ ਮੋਦੀ (ਮੈਂਬਰ) ਰੋਹਿਤ ਕਪੂਰ ਪਵਨ ਕੁਮਾਰ (ਖਰੜ) ਆਦਿ ਨੇ ਭਾਜਪਾ ਸੂਬਾ ਪ੍ਰਧਾਨ ਦਾ ਧੰਨਵਾਦ ਕਰਦਿਆਂ ਕਿਹਾ ਕਿ ਸੁਨੀਲ ਜਾਖੜ ਦੀ ਪਹਿਲ ਕਦਮੀ ਦੇ ਨਾਲ ਹੀ ਉਨ੍ਹਾਂ ਦਾ ਇਹ ਮਸਲਾ ਹੱਲ ਹੋਇਆ ਹੈ |
