ਜ਼ਿਲ੍ਹਾ ਭਾਜਪਾ ਦਫ਼ਤਰ 'ਚ ਅਣਪਛਾਤੇ ਵਿਅਕਤੀਆਂ ਨੇ ਕਰਮਚਾਰੀ 'ਤੇ ਸਿਆਹੀ ਸੁੱਟੀ

ਬਟਾਲਾ, 11 ਮਈ (ਰਾਕੇਸ਼ ਰੇਖੀ)-ਕੁਝ ਅਣਪਛਾਤੇ ਵਿਅਕਤੀ ਬਟਾਲਾ ਭਾਜਪਾ ਦਫ਼ਤਰ ਵਿਚ ਦਾਖਲ ਹੋਏ ਅਤੇ ਉੱਥੇ ਬੈਠੇ ਇਕ ਵਿਅਕਤੀ 'ਤੇ ਸਿਆਹੀ ਸੁੱਟ ਦਿੱਤੀ | ਭਾਜਪਾ ਜ਼ਿਲ੍ਹਾ ਪ੍ਰਧਾਨ ਹਰਸਿਮਰਨ ਸਿੰਘ ਹੀਰਾ ਵਾਲੀਆ ਉਸ ਸਮੇਂ ਆਪਣੇ ਦਫ਼ਤਰ ਵਿਚ ਮੌਜੂਦ ਨਹੀਂ ਸਨ | ਉਨ੍ਹਾਂ ਪੰਜਾਬ ਵਿਚ ਈ.ਡੀ. ਦੇ ਛਾਪਿਆਂ ਲਈ ਭਾਜਪਾ ਨੂੰ ਧਮਕੀ ਦਿੱਤੀ ਤੇ ਫਿਰ ਭੱਦੀ ਸ਼ਬਦਾਵਲੀ ਵਰਤੀ | ਦਫ਼ਤਰ ਵਿਚ ਬੈਠੇ ਸੰਦੀਪ ਗੁਪਤਾ ਨੇ ਕਿਹਾ ਕਿ ਉਹ ਜ਼ਿਲ੍ਹਾ ਭਾਜਪਾ ਪ੍ਰਧਾਨ ਹੀਰਾ ਵਾਲੀਆ ਦੇ ਦਫ਼ਤਰ ਵਿਚ ਕੰਮ ਕਰਦਾ ਹੈ | ਸੋਮਵਾਰ ਨੂੰ 20 ਤੋਂ 25 ਅਣਪਛਾਤੇ ਵਿਅਕਤੀ ਅਚਾਨਕ ਦਫ਼ਤਰ ਵਿਚ ਦਾਖਲ ਹੋਏ ਤੇ ਪ੍ਰਧਾਨ ਹੀਰਾ ਵਾਲੀਆ ਨੂੰ ਭੱਦੀ ਸ਼ਬਦਾਵਲੀ ਵਰਤੀ ਤੇ ਪੁੱਛਿਆ ਉਹ ਕਿੱਥੇ ਹੈ | ਉਸ ਨੇ ਦੱਸਿਆ ਕਿ ਪ੍ਰਧਾਨ ਵਾਲੀਆ ਚੰਡੀਗੜ੍ਹ ਗਏ ਹੋਏ ਹਨ | ਬਾਅਦ 'ਚ ਵਿਅਕਤੀਆਂ ਨੇ ਧਮਕੀ ਦਿੱਤੀ ਕਿ ਜੇਕਰ ਭਾਜਪਾ ਨੇ ਪੰਜਾਬ ਵਿਚ ਈ.ਡੀ. ਦੇ ਛਾਪੇ ਨਹੀਂ ਰੋਕੇ ਤਾਂ ਉਨ੍ਹਾਂ ਨੂੰ ਗੰਭੀਰ ਨਤੀਜੇ ਭੁਗਤਣੇ ਪੈਣਗੇ | ਇਹ ਕਹਿ ਕਿ ਉਨ੍ਹਾਂ ਆਦਮੀਆਂ ਨੇ ਉਸ 'ਤੇ ਸਿਆਹੀ ਦੀ ਇਕ ਬੋਤਲ ਡੋਲ੍ਹ ਦਿੱਤੀ | ਇਸ ਸਬੰਧੀ ਪ੍ਰਧਾਨ ਹੀਰਾ ਵਾਲੀਆ ਨੇ ਕਿਹਾ ਕਿ ਉਹ ਇਸ ਦੀ ਸਖ਼ਤ ਨਿੰਦਾ ਕਰਦੇ ਹਨ | ਸੀਨੀਅਰ 'ਆਪ' ਆਗੂ ਅਤੇ ਬਟਾਲਾ ਨਗਰ ਸੁਧਾਰ ਟਰੱਸਟ ਦੇ ਚੇਅਰਮੈਨ ਯਸ਼ਪਾਲ ਚੌਹਾਨ ਨੇ ਕਿਹਾ ਕਿ ਅਜਿਹਾ ਘਿਨਾਉਣਾ ਕੰਮ ਆਮ ਆਦਮੀ ਪਾਰਟੀ ਦੇ ਵਰਕਰ ਨਹੀਂ ਕਰ ਸਕਦੇ ਤੇ ਨਾ ਹੀ ਇਸ ਬਾਰੇ ਸੋਚਿਆ ਵੀ ਜਾਣਾ ਚਾਹੀਦਾ ਹੈ |