ਪਾਕਿ ’ਚ ਮਾਰੇ ਗਏ ਹਿੰਦੂ ਡਾਕਟਰ ਦੇ ਮਾਮਲੇ ’ਚ ਚਚੇਰਾ ਭਰਾ ਗ੍ਰਿਫ਼ਤਾਰ

ਅੰਮ੍ਰਿਤਸਰ, 16 ਜੁਲਾਈ (ਸੁਰਿੰਦਰ ਕੋਛੜ)-ਪਾਕਿਸਤਾਨ ਦੇ ਸੂਬਾ ਸਿੰਧ ਦੇ ਇਕ ਬੈਂਕ ਦੇ ਬਾਹਰ ਹਮਲਾਵਰਾਂ ਵਲੋਂ ਆਕਾਸ਼ ਕੁਮਾਰ (28 ਸਾਲ) ਨਾਮੀ ਹਿੰਦੂ ਡਾਕਟਰ ਦੀ ਗੋਲੀਆਂ ਮਾਰ ਕੇ ਬੀਤੇ ਦਿਨੀਂ ਕੀਤੀ ਹੱਤਿਆ ਦੇ ਮਾਮਲੇ ’ਚ ਹੈਦਰਾਬਾਦ ਪੁਲਿਸ ਨੇ ਤਿੰਨ ਸ਼ੱਕੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਪੁਲਿਸ ਨੇ ਡਾ: ਆਕਾਸ਼ ਕੁਮਾਰ ਦੇ ਕਤਲ ਦੇ ਸੰਬੰਧ ’ਚ ਗ੍ਰਿਫ਼ਤਾਰ ਕੀਤੇ ਤਿੰਨ ਸ਼ੱਕੀਆਂ ਤੋਂ ਪੁੱਛਗਿੱਛ ਬਾਅਦ ਖ਼ੁਲਾਸਾ ਕੀਤਾ ਕਿ ਗਰੋਹ ਦੀ ਅਗਵਾਈ ਅਸਲਮ ਉਰਫ਼ ਬਾਬਾ ਕਰ ਰਿਹਾ ਸੀ । ਅਸਲਮ ਨੇ ਸਾਥੀਆਂ ਨਾਲ ਅਪਰਾਧ ਨੂੰ ਅੰਜਾਮ ਦੇਣ ਤੋਂ ਪਹਿਲਾਂ ਡਾ: ਆਕਾਸ਼ ਦੀ ਕਾਰ ਦਾ ਪਿੱਛਾ ਕੀਤਾ ਤੇ ਉਨ੍ਹਾਂ ਨੇ ਲੁੱਟੇ 25 ਲੱਖ ਪਾਕਿਸਤਾਨੀ ਰੁਪਏ ਘਟਨਾ ਤੋਂ ਤੁਰੰਤ ਬਾਅਦ ਆਪਸ ’ਚ ਵੰਡ ਲਏ । ਇਸ ਰਕਮ ’ਚੋਂ 70 ਹਜ਼ਾਰ ਪਾਕਿਸਤਾਨੀ ਰੁਪਏ ਮ੍ਰਿਤਕ ਦੇ ਭਰਾ ਰਾਮ ਚੰਦ ਦੇ ਖਾਤੇ ’ਚ ਭੇਜੇ ਗਏ । ਰਾਮ ਚੰਦ ਨੇ ਪੁੱਛਗਿੱਛ ਦੌਰਾਨ ਮੰਨਿਆ ਕਿ ਗਰੋਹ ਇਸ ਮਹੀਨੇ ਦੌਰਾਨ ਬੈਂਕ ਨਾਲ ਸੰਬੰਧਿਤ ਤਿੰਨ ਡਕੈਤੀਆਂ ’ਚ ਸ਼ਾਮਿਲ ਰਿਹਾ ਹੈ।