ਅੰਮ੍ਰਿਤਸਰ, 18 ਜੁਲਾਈ (ਸੁਰਿੰਦਰ ਕੋਛੜ)-ਫਰਾਂਸ ਪਾਕਿਸਤਾਨ ਦੇ ਕਰਾਚੀ ਸ਼ਹਿਰ ਵਿਚਲਾ ਆਪਣਾ ਕੌਂਸਲੇਟ ਪੱਕੇ ਤੌਰ ‘ਤੇ ਬੰਦ ਕਰ ਰਿਹਾ ਹੈ। ਇਹ ਫ਼ੈਸਲਾ ਬਜਟ ‘ਚ ਕਟੌਤੀ ਅਤੇ ਦੁਨੀਆ ਭਰ ਵਿਚ ਆਪਣੇ ਕੂਟਨੀਤਕ ਨੈੱਟਵਰਕ ਨੂੰ ਘਟਾਉਣ ਦੀ ਨੀਤੀ ਦੇ ਹਿੱਸੇ ਵਜੋਂ ਲਿਆ ਗਿਆ ਹੈ। ਕਰਾਚੀ ‘ਚ ਫਰਾਂਸੀਸੀ ਕੌਂਸਲ ਜਨਰਲ ਅਲੈਕਸਿਸ ਸ਼ਾਟਿੰਸਕੀ ਨੇ ਕਿਹਾ ਕਿ ਕੌਂਸਲੇਟ ਬੰਦ ਹੋਣ ਤੋਂ ਬਾਅਦ ਵੀ ਇਸਲਾਮਾਬਾਦ ‘ਚ ਫਰਾਂਸੀਸੀ ਦੂਤਾਵਾਸ ਰਾਹੀਂ ਪਾਕਿ ਨਾਲ ਸੰਬੰਧ ਪਹਿਲਾਂ ਵਾਂਗ ਜਾਰੀ ਰਹਿਣਗੇ ਅਤੇ ਖੇਤਰ ਲਈ ਸਾਰੀਆਂ ਵੀਜ਼ਾ ਅਰਜ਼ੀਆਂ ਅਤੇ ਅਧਿਕਾਰਤ ਕੌਂਸਲਰ ਸੇਵਾਵਾਂ ਨੂੰ ਇਸਲਾਮਾਬਾਦ ‘ਚ ਫਰਾਂਸੀਸੀ ਦੂਤਾਵਾਸ ਦੁਆਰਾ ਸਿੱਧੇ ਤੌਰ ‘ਤੇ ਸੰਭਾਲਿਆ ਜਾਵੇਗਾ। ਉਨ੍ਹਾਂ ਇਹ ਵੀ ਕਿਹਾ ਕਿ ਅਲਾਇੰਸ ਫ੍ਰਾਂਸਾਈਜ਼ (ਫ੍ਰੈਂਚ ਕਲਚਰਲ ਸੈਂਟਰ) ਅਤੇ ਪਾਕਿਸਤਾਨ-ਫਰਾਂਸ ਬਿਜ਼ਨਸ ਅਲਾਇੰਸ ਕਰਾਚੀ ‘ਚ ਆਪਣੀਆਂ ਗਤੀਵਿਧੀਆਂ ਜਾਰੀ ਰੱਖਣਗੇ।
