ਹਰੀਕੇ ਹੈੱਡ ਵਰਕਸ 'ਤੇ ਪਹੁੰਚਿਆ ਰਾਵੀ-ਬਿਆਸ ਜਲ ਟਿ੍ਬਿਊਨਲ

ਮੱਖੂ, 17 ਮਈ (ਕੁਲਵਿੰਦਰ ਸਿੰਘ ਸੰਧੂ)-ਸੁਪਰੀਮ ਕੋਰਟ ਦੇ ਸਾਬਕਾ ਜੱਜ ਵਨੀਤ ਸਰਾਂ ਦੀ ਅਗਵਾਈ ਹੇਠ ਰਾਵੀ-ਬਿਆਸ ਜਲ ਟਿ੍ਬਿਊਨਲ ਨੇ ਆਪਣੇ ਦੋ ਦਿਨਾਂ ਪੰਜਾਬ ਦੌਰੇ ਦੌਰਾਨ ਅੱਜ ਹਰੀਕੇ ਹੈੱਡ ਵਰਕਸ ਮੱਖੂ ਦਾ ਦੌਰਾ ਕੀਤਾ | ਟਿ੍ਬਿਊਨਲ ਦੀ ਤਿੰਨ ਮੈਂਬਰੀ ਟੀਮ ਵਿੱਚ ਜਸਟਿਸ ਸੁਮਨ ਸ਼ਿਆਮ ਅਤੇ ਸਾਬਕਾ ਜਸਟਿਸ ਪੀ. ਨਵੀਨ ਰਾਓ ਵੀ ਸ਼ਾਮਿਲ ਸਨ | ਟੀਮ ਨੇ ਇੱਥੇ ਦਰਿਆਈ ਪਾਣੀ ਦੀ ਆਮਦ, ਵੰਡ, ਨਹਿਰੀ ਪ੍ਰਣਾਲੀ ਅਤੇ ਸਰਹੱਦੀ ਖੇਤਰਾਂ ਵਿੱਚ ਪਾਣੀ ਦੀ ਮੌਜੂਦਾ ਸਥਿਤੀ ਦਾ ਗੰਭੀਰਤਾ ਨਾਲ ਜਾਇਜ਼ਾ ਲਿਆ | ਪੰਜਾਬ ਸਰਕਾਰ ਦੇ ਜਲ ਸਰੋਤ ਵਿਭਾਗ ਦੇ ਸੀਨੀਅਰ ਅਧਿਕਾਰੀਆਂ ਨੇ ਟਿ੍ਬਿਊਨਲ ਨੂੰ ਹਰੀਕੇ ਬੈਰਾਜ, ਫੀਡਰਾਂ ਅਤੇ ਨਹਿਰਾਂ ਸਬੰਧੀ ਤਕਨੀਕੀ ਜਾਣਕਾਰੀ ਦੇਣ ਦੇ ਨਾਲ ਮੌਜੂਦਾ ਚੁਨੌਤੀਆਂ ਬਾਰੇ ਵੀ ਜਾਣੂ ਕਰਵਾਇਆ |