ਟੋਹਾਣਾ/ਜਾਖ਼ਲ, 14 ਫਰਵਰੀ (ਮਨਜੀਤ ਸਿੰਘ)-ਸੀ. ਆਈ. ਏ. ਟੋਹਾਣਾ ਟੀਮ ਨੇ ਆਪ੍ਰੇਸ਼ਨ ਜੀਵਨ ਜੋਤੀ ਤਹਿਤ ਨਸ਼ੀਲੇ ਪਦਾਰਥਾਂ ਵਿਰੁੱਧ ਕਾਰਵਾਈ ਕਰਕੇ ਇਕ ਦੋਸ਼ੀ ਨੂੰ ਨਸ਼ੀਲੇ ਪਦਾਰਥਾਂ ਦੀਆਂ ਗੋਲੀਆਂ ਦੀ ਵਪਾਰਕ ਮਾਤਰਾ ਸਮੇਤ ਗਿ੍ਫ਼ਤਾਰ ਕੀਤਾ | ਮੁਲਜ਼ਮ ਤੋਂ ਪੁੱਛਗਿੱਛ ਦੇ ਆਧਾਰ 'ਤੇ ਮੁੱਖ ਸਪਲਾਇਰ ਦੀਪਕ ਪੁੱਤਰ ਦਰਸ਼ਨ ਸਿੰਘ, ਵਾਰਡ ਨੰਬਰ 04, ਆਰੀਆ ਸਦਨ, ਸਫੀਦੋਂ, ਜ਼ਿਲ੍ਹਾ ਜੀਂਦ ਨੂੰ ਗਿ੍ਫ਼ਤਾਰ ਕੀਤਾ | ਦੋਵਾਂ ਮੁਲਜ਼ਮਾਂ ਨੂੰ ਅਦਾਲਤ ਵਿਚ ਪੇਸ਼ ਕੀਤਾ ਜਾਵੇਗਾ | ਸੀ. ਆਈ. ਏ. ਟੋਹਾਣਾ ਇੰਚਾਰਜ ਸਬ-ਇੰਸਪੈਕਟਰ ਅਸ਼ੋਕ ਕੁਮਾਰ ਨੇ ਦੱਸਿਆ ਕਿ 13.02.2026 ਨੂੰ ਪੁਲਿਸ ਟੀਮ ਟੋਹਾਣਾ ਖੇਤਰ ਦੇ ਨਰਵਾਣਾ ਟੀ-ਪੁਆਇੰਟ 'ਤੇ ਗਸ਼ਤ ਅਤੇ ਨਸ਼ੀਲੇ ਪਦਾਰਥਾਂ ਦੀ ਤਸਕਰੀ ਨੂੰ ਰੋਕਣ ਲਈ ਮੌਜੂਦ ਸੀ | ਇਸ ਦੌਰਾਨ ਭਰੋਸੇਯੋਗ ਖ਼ੁਫ਼ੀਆ ਜਾਣਕਾਰੀ ਮਿਲੀ ਕਿ ਨਾਰਾਇਣ ਦੱਤ ਉਰਫ਼ ਨਰਿੰਦਰ ਪੁੱਤਰ ਓਮ ਦੱਤ, ਵਾਸੀ ਪਿੰਡ ਕਬਰਚਾ, ਜ਼ਿਲ੍ਹਾ ਜੀਂਦ, ਲੋਹਾਖੇੜਾ ਵਿਚ ਨਹਿਰ ਦੇ ਪੁਲ ਕੋਲ ਨਸ਼ੀਲੀਆਂ ਗੋਲੀਆਂ ਵੇਚਣ ਦੇ ਇਰਾਦੇ ਨਾਲ ਖੜ੍ਹਾ ਸੀ | ਤੇਜ਼ੀ ਨਾਲ ਕਾਰਵਾਈ ਕਰਦੇ ਹੋਏ ਪੁਲਿਸ ਟੀਮ ਨੇ ਦੋਸ਼ੀ ਨੂੰ ਮੌਕੇ 'ਤੇ ਹੀ ਕਾਬੂ ਕਰ ਲਿਆ | ਤਲਾਸ਼ੀ ਦੌਰਾਨ ਦੋਸ਼ੀ ਦੇ ਕਬਜ਼ੇ 'ਚੋਂ ਅਲਪਰਾਜ਼ੋਲਮ ਦੀਆਂ 120 ਪੱਤੇ (1200 ਗੋਲੀਆਂ) ਬਰਾਮਦ ਕੀਤੀਆਂ ਗਈਆਂ, ਜਿਨ੍ਹਾਂ ਦਾ ਵਜ਼ਨ 263 ਗ੍ਰਾਮ ਸੀ | ਇਸ ਸੰਬੰਧ 'ਚ ਟੋਹਾਣਾ ਸਿਟੀ ਪੁਲਿਸ ਸਟੇਸ਼ਨ 'ਚ ਐਨ.ਡੀ.ਪੀ.ਐਸ. ਐਕਟ ਦੀ ਧਾਰਾ 22 ਸੀ/61/85 ਦੇ ਤਹਿਤ ਕੇਸ ਨੰਬਰ 54, ਮਿਤੀ 13.02.2026 ਦਰਜ ਕੀਤਾ ਗਿਆ ਹੈ |
