ਨਵੀਂ ਦਿੱਲੀ, 15 ਮਈ (ਡਾ. ਬਲਵਿੰਦਰ ਸਿੰਘ ਸੋਢੀ)- ਕੇਂਦਰ ਸਰਕਾਰ ਦੇ ਦੁਆਰਾ ਪੈਟਰੋਲ ਤੇ ਡੀਜ਼ਲ ਦੀ ਬੱਚਤ ਕਰਨ ਪ੍ਰਤੀ ਕੀਤੀ ਅਪੀਲ ਦਾ ਲੋਕਾਂ 'ਤੇ ਵੀ ਅਸਰ ਹੋ ਰਿਹਾ ਹੈ | ਕੁਝ ਲੋਕਾਂ ਨੇ ਆਪਣੀਆਂ ਨਿੱਜੀ ਗੱਡੀਆਂ ਨੂੰ ਛੱਡ ਕੇ ਪਬਲਿਕ ਟਰਾਂਸਪੋਰਟ ਰਾਹੀਂ ਸਫ਼ਰ ਕਰਨਾ ਸ਼ੁਰੂ ਕਰ ਦਿੱਤਾ ਹੈ | ਖਾਸ ਕਰਕੇ ਮੈਟਰੋ ਰੇਲ ਦੇ ਵਿਚ ਸਫ਼ਰ ਕਰਨ ਵਾਲੇ ਯਾਤਰੀਆਂ ਦੀ ਪਹਿਲਾਂ ਦੇ ਨਾਲੋਂ ਜ਼ਿਆਦਾ ਗਿਣਤੀ ਹੋ ਗਈ ਹੈ | ਡੀ. ਟੀ. ਸੀ. ਦੀਆਂ ਜੋ ਏ. ਸੀ. ਬੱਸਾਂ ਚਲ ਰਹੀਆਂ ਹਨ ਉਸ ਵਿਚ ਵੀ ਲੋਕਾਂ ਨੇ ਸਫ਼ਰ ਕਰਨਾ ਛੱਡ ਦਿੱਤਾ ਹੈ | ਇਸ ਤਰ੍ਹਾਂ ਹੋਣ 'ਤੇ ਹੁਣ ਦਿੱਲੀ ਦੀਆਂ ਸੜਕਾਂ 'ਤੇ ਆਵਾਜਾਈ ਦੇ ਵਿਚ ਵੀ ਕੁਝ ਫ਼ਰਕ ਪਿਆ ਹੈ ਕਿਉਂਕਿ ਟਰੈਫਿਕ ਜਾਮ ਦੀ ਸਥਿਤੀ ਪੈਦਾ ਨਾ ਹੋਣ 'ਤੇ ਲੋਕਾਂ ਦਾ ਸਮਾਂ ਵੀ ਬੱਚ ਰਿਹਾ ਹੈ ਅਤੇ ਨਾਲ ਹੀ ਪੈਸੇ ਦੀ ਵੀ ਬੱਚਤ ਹੋ ਰਹੀ ਹੈ | ਦਿੱਲੀ ਦੇ ਵਿਚ ਵਿਸ਼ੇਸ਼ ਕਰਕੇ ਕਾਰਾਂ ਦੀ ਏਨੀ ਗਿਣਤੀ ਹੈ ਕਿ ਇਨ੍ਹਾਂ ਨੂੰ ਸਰਕਾਰੀ ਦਫ਼ਤਰਾਂ, ਨਿੱਜੀ ਕੰਪਨੀਆਂ ਤੇ ਹੋਰ ਪਬਲਿਕ ਥਾਵਾਂ 'ਤੇ ਖੜ੍ਹਾਉਣ ਦੇ ਲਈ ਥਾਂ ਨਹੀਂ ਹੈ, ਜਿਸ ਕਰਕੇ ਗੱਡੀਆਂ ਸੜਕਾਂ 'ਤੇ ਖੜ੍ਹੀਆਂ ਕੀਤੀਆਂ ਜਾ ਰਹੀਆਂ ਹਨ | ਓਧਰ ਦੂਸਰੇ ਪਾਸੇ ਟਰੈਫਿਕ ਪੁਲਿਸ ਅਜਿਹੀਆਂ ਗੱਡੀਆਂ ਦੇ ਚਾਲਾਨ ਵੀ ਕਰ ਰਹੀ ਹੈ |
