6 ਮਹੀਨੇ ਪਹਿਲਾਂ ਓਮਾਨ ਗਈ ਕੁੜੀ ਦੀ ਮੌਤ, ਪਰਿਵਾਰ ਨੇ ਹੱਤਿਆ ਦਾ ਲਾਇਆ ਦੋਸ਼

ਅ

ਅਜੀਤ ਡੈਸਕ 01-05-2026

ਜਲੰਧਰ, 30 ਅਪ੍ਰੈਲ (ਜਤਿੰਦਰ ਪੰਮੀ)- 6 ਮਹੀਨੇ ਪਹਿਲਾਂ ਓਮਾਨ ਗਈ ਕੁੜੀ ਦੀ ਉੱਥੇ ਮੌਤ ਹੋਣ ਦਾ ਮਾਮਲਾ ਸਾਹਮਣੇ ਆਇਆ ਹੈ | ਮਿ੍ਤਕਾ ਦੀ ਪਛਾਣ ਅੰਕਿਤਾ ਪੁੱਤਰੀ ਕੁਲਵੰਤ ਵਾਸੀ 433 ਆਬਾਦਪੁਰਾ ਹਾਲ ਵਾਸੀ ਮਕਾਨ ਨੰਬਰ 435 ਵਾਸੀ ਮੋਤਾ ਸਿੰਘ ਨਗਰ ਵਜੋਂ ਹੋਈ ਹੈ, ਜਿਸ ਦੀ ਪਰਿਵਾਰ ਨੂੰ ਲੰਘੀ 24 ਅਪ੍ਰੈਲ ਨੂੰ ਉੱਥੇ ਮੌਤ ਹੋਣ ਦੀ ਸੂਚਨਾ ਮਿਲੀ ਸੀ | ਮਿ੍ਤਕਾ ਦੇ ਪਰਿਵਾਰਕ ਮੈਂਬਰਾਂ ਨੇ ਇਸ ਨੂੰ ਹੱਤਿਆ ਦੱਸਦਿਆਂ ਟ੍ਰੈਵਲ ਏਜੰਟ ਖ਼ਿਲਾਫ਼ ਪੁਲਿਸ ਕਮਿਸ਼ਨਰ ਕੋਲ ਸ਼ਿਕਾਇਤ ਦਿੱਤੀ ਹੈ | ਇਸ ਦੇ ਨਾਲ ਪੀੜਤ ਪਰਿਵਾਰ ਨੇ ਪ੍ਰਸ਼ਾਸਨ ਤੇ ਸਰਕਾਰ ਨੂੰ ਆਪਣੀ ਧੀ ਦੀ ਮਿ੍ਤਕ ਦੇਹ ਭਾਰਤ ਲਿਆਉਣ ਦੀ ਫਰਿਆਦ ਕੀਤੀ ਹੈ | ਓਧਰ ਪੁਲਿਸ ਕਮਿਸ਼ਨਰ ਨੇ ਟ੍ਰੈਵਲ ਏਜੰਟ ਨੂੰ ਭਲਕੇ ਆਪਣੇ ਦਫਤਰ ਪੇਸ਼ ਹੋਣ ਲਈ ਸੱਦ ਲਿਆ ਹੈ | ਇਸ ਸੰਬੰਧੀ ਮੋਤਾ ਸਿੰਘ ਨਗਰ ਵਿਖੇ ਕੋਠੀ ਨੰਬਰ 435 'ਚ ਕੇਅਰ ਟੇਕਰ ਵਜੋਂ ਰਹਿ ਰਹੀ ਮਿ੍ਤਕਾ ਦੀ ਮਾਂ ਮੋਨਿਕਾ ਤੇ ਉਸ ਦੇ ਰਿਸ਼ਤੇਦਾਰਾਂ ਨੇ ਦੱਸਿਆ ਕਿ ਉਨ੍ਹਾਂ ਨੇ ਆਪਣੀ ਧੀ ਅੰਕਿਤਾ ਨੂੰ ਪਿਛਲੇ ਸਾਲ 2 ਅਕਤੂਬਰ ਨੂੰ ਟ੍ਰੈਵਲ ਏਜੰਟ ਜਸਕਰਨ ਸਿੰਘ ਰਾਹੀਂ 71,000 ਰੁਪਏ ਦੇ ਕੇ ਵਿਜ਼ਟਰ ਵੀਜ਼ਾ 'ਤੇ ਓਮਾਨ ਭੇਜਿਆ ਸੀ | ਉਥੇ ਜਾ ਕੇ ਉਸ ਨੂੰ ਜਿਸ ਜਗ੍ਹਾ ਕੰਮ 'ਤੇ ਰਖਵਾਇਆ ਗਿਆ ਸੀ, ਉਨ੍ਹਾਂ ਵਲੋਂ ਅੰਕਿਤਾ ਦਾ ਪਾਸਪੋਸਟ ਖੋਹ ਲਿਆ ਗਿਆ | ਅੰਕਿਤਾ ਦੀ ਮਾਂ ਨੇ ਦੱਸਿਆ ਕਿ ਉਸ ਦੀ ਧੀ ਨੇ ਰੋਂਦੇ ਹੋਏ ਦੱਸਿਆ ਕਿ ਜਿੱਥੇ ਉਹ ਕੰਮ ਕਰਦੀ ਹੈ, ਉਥੇ ਉਸ ਨੂੰ ਤਸੀਹੇ ਦਿੱਤੇ ਜਾ ਰਹੇ ਹਨ ਤੇ ਕੁੱਟਮਾਰ ਕੀਤੀ ਜਾਂਦੀ ਹੈ | ਮੋਨਿਕਾ ਨੇ ਦੱਸਿਆ ਕਿ ਉਨ੍ਹਾਂ ਨੇ ਇਸ ਬਾਰੇ ਟ੍ਰੈਵਲ ਏਜੰਟ ਨੂੰ ਵੀ ਜਾਣੂ ਕਰਵਾਇਆ ਪਰ ਉਹ ਲਾਰੇ ਲਾਉਂਦਾ ਰਿਹਾ | 22 ਅਪ੍ਰੈਲ ਨੂੰ ਉਸ ਦੀ ਆਪਣੀ ਧੀ ਨਾਲ ਆਖਰੀ ਵਾਰ ਫੋਨ 'ਤੇ ਗੱਲ ਹੋਈ ਸੀ ਅਤੇ 24 ਅਪ੍ਰੈਲ ਨੂੰ ਅੰਕਿਤਾ ਨਾਲ ਕੰਮ ਕਰਦੀ ਅੰਮਿ੍ਤਸਰ ਦੀ ਰਹਿਣ ਵਾਲੀ ਕੁੜੀ ਨੇ ਫੋਨ ਕਰਕੇ ਦੱਸਿਆ ਕਿ ਉਸ ਦੀ ਮੌਤ ਹੋ ਗਈ ਹੈ | ਉਸ ਉਪਰੰਤ ਉਨ੍ਹਾਂ ਨੇ ਟ੍ਰੈਵਲ ਏਜੰਟ ਜਸਕਰਨ ਸਿੰਘ ਤੇ ਓਮਾਨ ਰਹਿੰਦੇ ਏਜੰਟ ਨਾਲ ਸੰਪਰਕ ਕੀਤਾ ਤਾਂ ਉਨ੍ਹਾਂ ਵੀ ਇਹ ਦੱਸਿਆ ਕਿ ਅੰਕਿਤਾ ਨੇ ਖੁਦਕੁਸ਼ੀ ਕਰ ਲਈ ਸੀ ਤੇ ਉਸ ਦੀ ਮੌਤ ਹੋ ਚੁੱਕੀ ਹੈ | ਮਿ੍ਤਕਾ ਦੀ ਮਾਂ ਤੇ ਰਿਸ਼ਤੇਦਾਰਾਂ ਨੇ ਦੋਸ਼ ਲਾਇਆ ਕਿ ਅੰਕਿਤਾ ਨੇ ਖੁਦਕੁਸ਼ੀ ਨਹੀਂ ਕੀਤੀ ਬਲਕਿ ਉਸ ਦੀ ਤਸ਼ੱਦਦ ਕਰਕੇ ਹੱਤਿਆ ਕੀਤੀ ਗਈ ਹੈ | ਉਨ੍ਹਾਂ ਪੁਲਿਸ ਕਮਿਸ਼ਨਰ ਨੂੰ ਦਿੱਤੀ ਸ਼ਿਕਾਇਤ 'ਤੇ ਟ੍ਰੈਵਲ ਏਜੰਟ ਖ਼ਿਲਾਫ਼ ਕਾਰਵਾਈ ਕਰਨ ਤੇ ਉਨ੍ਹਾਂ ਦੀ ਧੀ ਦੀ ਮਿ੍ਤਕ ਦੇਹ ਵਾਪਸ ਲਿਆਉਣ ਲਈ ਫਰਿਆਦ ਕੀਤੀ ਹੈ |
ਪੁਲਿਸ ਕਮਿਸ਼ਨਰ ਨੇ ਬੁਲਾਇਆ ਹੈ, ਜਾਂਚ 'ਚ ਹੋਵਾਂਗਾ ਸ਼ਾਮਿਲ
ਓਧਰ ਇਸ ਸੰਬੰਧੀ ਜਦੋਂ ਟ੍ਰੈਵਲ ਏਜੰਟ ਜਸਕਰਨ ਸਿੰਘ ਨਾਲ ਸੰਪਰਕ ਕੀਤਾ ਤਾਂ ਉਨ੍ਹਾਂ ਕਿਹਾ ਕਿ ਉਸ ਨੇ ਅੰਕਿਤਾ ਨੂੰ ਇਥੋਂ ਪਹਿਲਾਂ ਵਿਜ਼ਟਰ ਵੀਜ਼ੇ 'ਤੇ ਉਮਾਨ ਭੇਜਿਆ ਸੀ | ਉਥੇ ਪੁੱਜਣ 'ਤੇ ਉਸ ਦਾ ਵਰਕ ਵੀਜ਼ਾ ਲਵਾ ਦਿੱਤਾ ਸੀ ਅਤੇ ਉਸ ਨੂੰ ਕਿਸੇ ਦੇ ਘਰ 'ਚ ਕੰਮ 'ਤੇ ਰਖਵਾਇਆ ਗਿਆ ਸੀ | ਜਸਕਰਨ ਨੇ ਕਿਹਾ ਕਿ ਅੰਕਿਤਾ ਦੇ ਪਰਿਵਾਰ ਨੇ ਉਸ ਤੋਂ ਬਾਅਦ ਕਦੇ ਵੀ ਉਸ ਨਾਲ ਸੰਪਰਕ ਨਹੀਂ ਕੀਤਾ | ਹੁਣ ਜਦੋਂ ਉਸ ਦੀ ਮੌਤ ਹੋ ਗਈ ਹੈ ਤਾਂ ਉਸ ਵਿਰੁੱਧ ਝੂਠੀ ਸ਼ਿਕਾਇਤ ਦਰਜ ਕਰਵਾਈ ਹੈ | ਟ੍ਰੈਵਲ ਏਜੰਟ ਨੇ ਕਿਹਾ ਕਿ ਪੁਲਿਸ ਕਮਿਸ਼ਨਰ ਦਫਤਰ ਤੋਂ 1 ਮਈ ਨੂੰ ਪੇਸ਼ ਹੋਣ ਵਾਸਤੇ ਫੋਨ ਆਇਆ ਸੀ ਤੇ ਉਹ ਉਥੇ ਜਾ ਕੇ ਆਪਣੀ ਸਫਾਈ ਪੇਸ਼ ਕਰੇਗਾ | ਜਸਕਰਨ ਸਿੰਘ ਨੇ ਕਿਹਾ ਕਿ ਮਿ੍ਤਕਾ ਦੇ ਪਰਿਵਾਰ ਵਲੋਂ ਅੰਕਿਤਾ ਦੀ ਮੌਤ ਬਾਰੇ ਦੱਸਣ ਉਪਰੰਤ ਉਸ ਨੇ ਓਮਾਨ ਰਹਿੰਦੇ ਏਜੰਟ ਨਾਲ ਗੱਲ ਕੀਤੀ ਤਾਂ ਉਸ ਨੇ ਮਿ੍ਤਕ ਦੇਹ ਭਾਰਤ ਭੇਜਣ ਲਈ ਮਿ੍ਤਕਾ ਦੇ ਪਿਤਾ ਦਾ ਆਧਾਰ ਕਾਰਡ ਮੰਗਿਆ ਸੀ, ਜੋ ਕਿ 4-5 ਦਿਨਾਂ ਬਾਅਦ ਦਿੱਤਾ ਹੈ | ਉਸ ਨੇ ਕਿਹਾ ਕਿ ਉਸ ਦਾ ਇਸ ਵਿਚ ਦੋਸ਼ ਨਹੀਂ ਹੈ ਫਿਰ ਵੀ ਮਨੁੱਖਤਾ ਦੇ ਆਧਾਰ 'ਤੇ ਉਹ ਅੰਕਿਤਾ ਦੀ ਮਿ੍ਤਕ ਦੇਹ ਭਾਰਤ ਲਿਆਉਣ ਲਈ ਖਰਚਾ ਕਰਨ ਵਾਸਤੇ ਤਿਆਰ ਹੈ |

6 ਮਹੀਨੇ ਪਹਿਲਾਂ ਓਮਾਨ ਗਈ ਕੁੜੀ ਦੀ ਮੌਤ, ਪਰਿਵਾਰ ਨੇ ਹੱਤਿਆ ਦਾ ਲਾਇਆ ਦੋਸ਼

Subscribers Only Story

ਸੰਬੰਧਿਤ ਖ਼ਬਰਾਂ