ਮਕਸੂਦਾਂ 14 ਮਈ (ਸੌਰਵ ਮਹਿਤਾ)-ਸਕੂਲਾਂ ਦੇ ਬਾਹਰ ਲੱਗੀਆਂ ਰੇੜੀਆਂ 'ਤੇ ਹਰ ਰੋਜ਼ ਇੱਕ ਖਤਰਨਾਕ ਭੀੜ ਇਕੱਠੀ ਹੁੰਦੀ ਹੈ | ਇਹ ਭੀੜ ਕਿਸੇ ਮੇਲੇ ਦੀ ਨਹੀਂ, ਸਗੋਂ ਉਸ ਪੀੜ੍ਹੀ ਦੀ ਹੈ ਜੋ ਹੌਲੀ-ਹੌਲੀ ਸਵਾਦ ਦੇ ਨਾਮ 'ਤੇ ਆਪਣੀ ਸਿਹਤ ਬਰਬਾਦ ਕਰ ਰਹੀ ਹੈ | ਛੋਟੇ ਬੱਚਿਆਂ ਦੇ ਹੱਥਾਂ ਵਿੱਚ ਹੁਣ ਦੁੱਧ ਦਾ ਗਿਲਾਸ ਨਹੀਂ, ਮੈਦੇ ਨਾਲ ਭਰੀਆਂ ਪਲੇਟਾਂ ਦਿਖ ਰਹੀਆਂ ਹਨ | ਮੋਮੋਜ਼, ਬਰਗਰ, ਪੀਜ਼ੇ, ਫਰੈਂਚ ਫਰਾਈਜ਼ ਅਤੇ ਰੰਗੀਨ ਸੌਸਾਂ ਹੁਣ ਬੱਚਿਆਂ ਦੀ ਰੋਜ਼ਾਨਾ ਜ਼ਿੰਦਗੀ ਦਾ ਹਿੱਸਾ ਬਣ ਚੁੱਕੀਆਂ ਹਨ | ਜਲੰਧਰ ਸਮੇਤ ਪੰਜਾਬ ਦੇ ਕਈ ਸ਼ਹਿਰਾਂ ਵਿੱਚ ਸਕੂਲਾਂ ਦੇ ਬਾਹਰ ਵਿਕ ਰਹੇ ਖਾਣੇ ਦੀ ਹਕੀਕਤ ਚਿੰਤਾਜਨਕ ਬਣਦੀ ਜਾ ਰਹੀ ਹੈ | ਕਈ ਥਾਵਾਂ 'ਤੇ ਨਾ ਸਫਾਈ ਹੈ, ਨਾ ਮਿਆਰੀ ਸਮਾਨ ਅਤੇ ਨਾ ਹੀ ਕਿਸੇ ਕਿਸਮ ਦੀ ਜਾਂਚ | ਸਿਰਫ਼ 20-30 ਰੁਪਏ ਵਿੱਚ ਬੱਚਿਆਂ ਨੂੰ ਉਹ ਚੀਜ਼ਾਂ ਮਿਲ ਰਹੀਆਂ ਹਨ ਜੋ ਹੌਲੀ-ਹੌਲੀ ਉਨ੍ਹਾਂ ਦੇ ਸਰੀਰ ਨੂੰ ਅੰਦਰੋਂ ਕਮਜ਼ੋਰ ਕਰ ਰਹੀਆਂ ਹਨ | ਕਈ ਮਾਪੇ ਉਸ ਵੇਲੇ ਹੈਰਾਨ ਰਹਿ ਜਾਂਦੇ ਹਨ ਜਦੋਂ ਛੋਟੀ ਉਮਰ ਦੇ ਬੱਚਿਆਂ ਦੀਆਂ ਰਿਪੋਰਟਾਂ ਵਿੱਚ ਫੈਟੀ ਲੀਵਰ, ਵਧਿਆ ਕੋਲੈਸਟਰੋਲ ਅਤੇ ਮੋਟਾਪੇ ਵਰਗੀਆਂ ਸਮੱਸਿਆਵਾਂ ਸਾਹਮਣੇ ਆਉਂਦੀਆਂ ਹਨ | ਦੁੱਖ ਦੀ ਗੱਲ ਇਹ ਹੈ ਕਿ ਨਵੀਂ ਪੀੜ੍ਹੀ ਘਰ ਦੇ ਪੋਸ਼ਟਿਕ ਖਾਣੇ ਤੋਂ ਦੂਰ ਹੋ ਰਹੀ ਹੈ | ਦਾਲ, ਰੋਟੀ, ਦੁੱਧ ਅਤੇ ਫਲ ਹੁਣ 'ਬੋਰਿੰਗ' ਲੱਗਦੇ ਹਨ, ਜਦਕਿ ਤਲੀਆਂ ਅਤੇ ਚਟਪਟੀਆਂ ਚੀਜ਼ਾਂ 'ਫੈਸ਼ਨ' ਬਣ ਗਈਆਂ ਹਨ | ਬੱਚੇ ਮੈਦਾਨਾਂ ਤੋਂ ਦੂਰ ਅਤੇ ਰੇੜੀਆਂ ਦੇ ਨੇੜੇ ਹੋ ਰਹੇ ਹਨ | ਸਰੀਰਕ ਖੇਡਾਂ ਦੀ ਥਾਂ ਮੋਬਾਈਲ ਅਤੇ ਜੰਕ ਫੂਡ ਨੇ ਲੈ ਲਈ ਹੈ | ਨਤੀਜਾ ਇਹ ਨਿਕਲ ਰਿਹਾ ਹੈ ਕਿ ਛੋਟੀ ਉਮਰ ਵਿੱਚ ਹੀ ਬੱਚਿਆਂ ਦੀ ਸਟੈਮਿਨਾ ਅਤੇ ਤੰਦਰੁਸਤੀ ਘਟ ਰਹੀ ਹੈ | ਕਈ ਸਿਹਤ ਮਾਹਿਰ ਇਹ ਵੀ ਮੰਨਦੇ ਹਨ ਕਿ ਜੇ ਇਹੀ ਖਾਣ-ਪੀਣ ਦੀ ਆਦਤ ਰਹੀ ਤਾਂ ਆਉਣ ਵਾਲੇ ਸਮੇਂ ਵਿੱਚ ਨੌਜਵਾਨ ਪੀੜ੍ਹੀ ਨੂੰ ਹੋਰ ਗੰਭੀਰ ਸਿਹਤ ਸਮੱਸਿਆਵਾਂ ਦਾ ਸਾਹਮਣਾ ਕਰਨਾ ਪੈ ਸਕਦਾ ਹੈ | ਅੱਜ ਦਾ ਚਟਪਟਾ ਸਵਾਦ ਕੱਲ੍ਹ ਦੀ ਬਿਮਾਰੀ ਬਣ ਸਕਦਾ ਹੈ | ਇਹ ਸਿਰਫ਼ ਇੱਕ ਬਰਗਰ ਜਾਂ ਮੋਮੋਜ਼ ਦੀ ਗੱਲ ਨਹੀਂ, ਸਗੋਂ ਪੂਰੀ ਪੀੜ੍ਹੀ ਦੀ ਸਿਹਤ ਦਾ ਸਵਾਲ ਹੈ |
