ਅੱਜ ਪਾਪਾ ਘਰ ਦੀ ਆਰਥਿਕਤਾ ਨੂੰ ਲੈ ਕੇ ਬਹੁਤ ਚਿੰਤਤ ਜਿਹਾ ਲੱਗ ਰਿਹਾ ਸੀ। ਉਸ ਨੇ ਘਰ ਦੇ ਸਾਰੇ ਜੀਆਂ ਨੂੰ ਬਿਠਾ ਕੇ ਕਈ ਹੁਕਮ ਦੇਣ ਵਾਂਗ ਗੱਲਾਂ ਕਹੀਆਂ।
'ਗੱਲ ਸੁਣ ਲੋ ਭਾਈ ਮੇਰੀ ਘਰ ਦੇ ਸਾਰੇ ਜੀਅ, ਆਪੋ-ਆਪਣੇ ਖਰਚ ਘਟਾ ਲਵੋ (ਨੂੰਹਾਂ ਵੱਲ ਮੂੰਹ ਕਰਕੇ) ਨਵੇਂ ਕੱਪੜੇ ਖਰੀਦਣੇ ਬੰਦ ਕਰ ਦਿਓ, ਆਹ ਸੋਨਾ-ਸਾਨਾ ਵੀ ਨਵਾਂ ਨਾ ਲਵੋ ਹੁਣ, (ਆਪਣੇ ਪੁੱਤਰਾਂ ਨੂੰ) ਆਪਣੀਆਂ ਪਾਰਟੀਆਂ 'ਤੇ ਰੋਕ ਲਾਓ ਤੁਸੀਂ ਵੀ, ਨਿੱਤ ਤੀਏ ਦਿਨ ਕਦੇ ਕਿਤੇ, ਕਦੇ ਕਿਤੇ ਹੋਟਲਾਂ 'ਚ ਤੁਰੇ ਫਿਰਦੇ ਓ, (ਆਪਣਿਆਂ ਪੋਤਰਿਆਂ ਨੂੰ) ਨਾਲੇ ਤੁਸੀਂ ਵੀ ਬੰਦੇ ਬਣ ਜਾਓ ਓਏ, ਮੋਟਰਸਾਈਕਲ, ਜੀਪਾਂ ਘੱਟ ਕੱਢੋ ਬਾਹਰ ਤੇਲ ਬਚਾਓ (ਘਰਵਾਲੀ ਨੂੰ) ਤੂੰ ਵੀ ਜ਼ਰਾ ਤੜਕਾ-ਤੁੜਕਾ ਘੱਟ ਕਰਦੇ, ਸਬਜ਼ੀ ਇਕ ਟਾਈਮ ਬਣਾਓ, ਹਰ ਕੰਮ 'ਚ ਬੱਚਤ ਕਰੋ ਘਰ ਦੀ ਹਾਲਤ ਠੀਕ ਨਹੀਂ ਚੱਲ ਰਹੀ।
ਸਾਰੇ ਹੈਰਾਨ ਸਨ ਕਿ ਪਾਪਾ ਨੇ ਪਹਿਲਾਂ ਕਦੇ ਇਹੋ ਜਿਹੀਆਂ ਗੱਲਾਂ ਨਹੀਂ ਕਹੀਆਂ।
ਘਰ ਦੇ ਸਾਰੇ ਮੈਂਬਰਾਂ ਦੇ ਉਦੋਂ ਮੂੰਹ ਟੱਢੇ ਰਹਿ ਗਏ ਜਦੋਂ ਸਾਰੀਆਂ ਗੱਲਾਂ ਸਮਝਾ ਕੇ ਪਾਪਾ ਆਪ ਸਫਾਰੀ ਨੂੰ ਸੈਲਫ਼ ਮਾਰ ਆਪਣੇ ਜੋਟੀਦਾਰਾਂ ਨਾਲ ਸ਼ਿਮਲੇ ਦੇ ਟੂਰ 'ਤੇ ਨਿਕਲ ਗਿਆ।
-787/10, ਪ੍ਰੇਮ ਨਗਰ, ਹਰਦੋਛੰਨੀ ਰੋਡ, ਗੁਰਦਾਸਪੁਰ। ਮੋਬਾਈਲ : 99888-11681
