16-02-26
ਮਹੱਤਵਪੂਰਨ ਸਮਾਂ
ਸਕੂਲਾਂ ਦੇ ਬੱਚਿਆਂ ਲਈ ਇਹ ਸਮਾਂ ਬਹੁਤ ਮਹੱਤਵਪੂਰਨ ਹੈ, ਕਿਉਂਕਿ ਇਸ ਮਹੀਨੇ ਦੇ ਅਖ਼ੀਰ ਤੋਂ ਲੈ ਕੇ ਮਾਰਚ ਤੱਕ ਬੱਚਿਆਂ ਦੇ ਪੱਕੇ ਪੇਪਰ ਹੋਣੇ ਹਨ। ਚਾਹੇ ਉਹ ਬੋਰਡ ਦੇ ਹੋਣ ਜਾਂ ਸਕੂਲਾਂ ਵਲੋਂ ਲਏ ਜਾਣ ਵਾਲੇ ਪੱਕੇ ਪੇਪਰ ਹੋਣ।
ਬੱਚਿਆਂ ਨੂੰ ਇਹ ਸੋਚ ਕੇ ਕਿ ਇਹ ਸਮਾਂ ਹੀ ਮਹੱਤਵਪੂਰਨ ਸਮਾਂ ਹੈ ਮੋਬਾਈਲ ਅਤੇ ਟੈਲੀਵਿਜ਼ਨ ਛੱਡ ਕੇ ਆਪਣੀਆਂ ਕਿਤਾਬਾਂ ਵਲ ਧਿਆਨ ਦੇਣਾ ਚਾਹੀਦਾ ਹੈ। ਜੇਕਰ ਬੱਚਿਆਂ ਨੇ ਆਪਣੀ ਕਿਤਾਬ ਪੂਰੇ ਸਾਲ ਵਿਚ ਇਕ ਵਾਰ ਵੀ ਪੜ੍ਹੀ ਹੈ ਤਾਂ ਇਸ ਸਮੇਂ ਉਸ ਕਿਤਾਬ 'ਤੇ ਦਿੱਤਾ ਗਿਆ ਥੋੜਾ ਜਿਹਾ ਵੀ ਧਿਆਨ ਉਨ੍ਹਾਂ ਨੂੰ ਨਾ ਸਿਰਫ਼ ਪ੍ਰੀਖਿਆ ਤੋਂ ਪਾਸ ਕਰਵਾਵੇਗਾ ਬਲਕਿ ਉਨ੍ਹਾਂ ਨੂੰ ਪ੍ਰੀਖਿਆ ਵਿਚੋਂ ਅੱਵਲ ਵੀ ਲਿਆ ਦੇਵੇਗਾ। ਜੇਕਰ ਉਨ੍ਹਾਂ ਨੂੰ ਪੂਰਾ ਸਾਲ ਕਿਤਾਬ ਵਲ ਕੋਈ ਧਿਆਨ ਨਹੀਂ ਦਿੱਤਾ ਹੋਇਆ ਤਾਂ ਵੀ ਇਹ ਸਮਾਂ ਬਹੁਤ ਮਹੱਤਵਪੂਰਨ ਹੈ ਕਿਉਂਕਿ ਅਜੇ ਵੀ ਡੁੱਲ੍ਹੇ ਬੇਰਾਂ ਦਾ ਕੁਝ ਵਿਗੜਿਆ ਨਹੀਂ ਹੈ। ਬਸ ਸਮਾਂ ਰਹਿੰਦਿਆਂ ਕਿਤਾਬਾਂ ਨੂੰ ਚੰਗੀ ਤਰ੍ਹਾਂ ਪੜ੍ਹੋ, ਸਕੂਲ ਵਿਚ ਟੀਚਰ ਨੇ ਜੋ ਕੁਝ ਪੂਰਾ ਸਾਲ ਕਰਵਾਇਆ ਹੈ ਉਸ ਨੂੰ ਰਿਵਾਈਜ਼ ਕਰੋ ਇਹ ਥੋੜ੍ਹੇ ਦਿਨਾਂ ਦੀ ਮਿਹਨਤ ਹੀ ਤੁਹਾਨੂੰ ਤਰੱਕੀ ਵਲ ਲੈ ਕੇ ਜਾਵੇਗੀ।
-ਅਸ਼ੀਸ਼ ਸ਼ਰਮਾ
ਜਲੰਧਰ।
ਦੁੱਧ ਦਾ ਗੋਰਖਧੰਦਾ
5 ਫਰਵਰੀ 2026 ਨੂੰ ਰੋਜ਼ਾਨਾ ਅਜੀਤ ਦੇ ਐਡੀਟੋਰੀਅਲ ਪੰਨੇ 'ਤੇ ਲੇਖਕ ਮਨਜਿੰਦਰ ਸਿੰਘ ਸਰੌਦ ਵਲੋਂ ਲਿਖੇ ਗਏ ਲੇਖ 'ਦੁੱਧ ਦਾ ਗੋਰਖਧੰਦਾ ਨਿਗਲ ਰਿਹੈ ਜ਼ਿੰਦਗੀਆਂ' ਪੜ੍ਹਿਆ ਜੋ ਕਿ ਬਹੁਤ ਹੀ ਜਾਣਕਾਰੀ ਭਰਪੂਰ ਤੇ ਅਸਲ ਸਚਾਈ ਨੂੰ ਬਿਆਨ ਕਰਦਾ ਹੈ। ਪੰਜਾਬ ਅੰਦਰ ਪੈਦਾ ਹੋ ਰਹੇ ਦੁੱਧ ਤੋਂ ਇਸ ਦੀ ਖ਼ਪਤ ਜ਼ਿਆਦਾ ਹੋਣ 'ਤੇ ਲੇਖਕ ਨੇ ਚਿੰਤਾ ਪ੍ਰਗਟਾਈ ਹੈ ਕਿ ਇਸ ਦੀ ਪੂਰਤੀ ਫਿਰ ਕਿੱਥੋਂ ਹੁੰਦੀ ਹੈ। ਦੁੱਧ ਇਕ ਛੋਟੇ ਬੱਚੇ ਤੋਂ ਲੈ ਕੇ ਬਜ਼ੁਰਗਾਂ ਤੱਕ ਹਰੇਕ ਦੀ ਮੁੱਖ ਲੋੜ ਹੈ। ਪਰ ਮੁਨਾਫ਼ਾਖੋਰਾਂ ਵਲੋਂ ਆਪਣੇ ਹਿੱਤਾਂ ਨੂੰ ਧਿਆਨ 'ਚ ਰੱਖਦਿਆ ਹੋਏ ਨਕਲੀ ਦੁੱਧ ਦਾ ਵੱਡੇ ਪੱਧਰ 'ਤੇ ਵਪਾਰ ਕੀਤਾ ਜਾ ਰਿਹਾ ਹੈ। ਜੋ ਕਿ ਲੋਕਾਂ ਦੀ ਸਿਹਤ ਨਾਲ ਵੱਡਾ ਖਿਲਵਾੜ ਹੈ। ਨਕਲੀ ਦੁੱਧ ਦੇ ਕਾਰੋਬਾਰੀਆਂ ਖ਼ਿਲਾਫ਼ ਸੰਬੰਧਿਤ ਵਿਭਾਗ ਗੰਭੀਰ ਨਾ ਹੋਣ 'ਤੇ ਵੀ ਲੇਖਕ ਨੇ ਚਿੰਤਾ ਪ੍ਰਗਟਾਈ ਹੈ। ਸਰਕਾਰਾਂ ਵਲੋਂ ਦੁੱਧ ਦਾ ਗੋਰਖਧੰਦਾ ਕਰਨ ਵਾਲਿਆ ਖ਼ਿਲਾਫ਼ ਸਖ਼ਤ ਤੋਂ ਸਖ਼ਤ ਕਾਰਵਾਈ ਕਰਨੀ ਚਾਹੀਦੀ ਹੈ ਤਾਂ ਜੋ ਲੋਕਾਂ ਦੀਆਂ ਕੀਮਤੀ ਜਿੰਦਗੀਆਂ ਨਾਲ ਕੋਈ ਖ਼ਿਲਵਾੜ ਨਾ ਹੋਵੇ।
-ਇੰਜੀ : ਲਖਵਿੰਦਰ ਪਾਲ ਗਰਗ
ਘਰਾਚੋਂ, ਸੰਗਰੂਰ।
ਵਧ ਰਹੀ ਅਸਹਿਣਸ਼ੀਲਤਾ
ਹਾਲ ਹੀ ਵਿਚ ਤਰਨ ਤਾਰਨ ਦੇ ਇਕ ਲਾਅ ਕਾਲਜ ਵਿਚ ਪਹਿਲੇ ਸਾਲ ਦੇ ਵਿਦਿਆਰਥੀ ਨੇ ਇਕਤਰਫ਼ਾ ਪਿਆਰ 'ਚ ਆਪਣੇ ਨਾਲ ਪੜ੍ਹਦੀ ਇਕ ਲੜਕੀ ਦੇ ਸਿਰ ਵਿਚ ਗੋਲੀ ਮਾਰ ਕੇ ਉਸ ਦੀ ਹੱਤਿਆ ਕਰਨ ਤੋਂ ਬਾਅਦ ਆਪਣੇ ਸਿਰ 'ਚ ਗੋਲੀ ਮਾਰ ਕੇ ਖੁਦਕੁਸ਼ੀ ਕਰਨ ਦੀ ਕੋਸ਼ਿਸ਼ ਕੀਤੀ। ਇਹ ਲੜਕਾ ਕੁਝ ਦਿਨ ਪਹਿਲਾਂ ਕੁੜੀ ਦੇ ਘਰ ਵੀ ਗਿਆ ਸੀ ਤੇ ਉਸ ਨੂੰ ਜਾਨੋਂ ਮਾਰਨ ਦੀ ਧਮਕੀ ਦਿੱਤੀ ਸੀ। ਵਿਚਾਰ ਕਰਨ ਵਾਲੀ ਗੱਲ ਇਹ ਹੈ ਕਿ ਬੱਚਾ ਕਲਾਸ ਰੂਮ ਵਿਚ ਕਿਸ ਤਰ੍ਹਾਂ ਪਿਸਤੌਲ ਲੈ ਕੇ ਚਲਾ ਗਿਆ। ਅਜਿਹੀ ਵਾਰਦਾਤ ਕਾਲਜ ਦੀ ਸੁਰੱਖਿਆ ਪ੍ਰਬੰਧਾਂ ਦੀ ਪੋਲ ਖੋਲ੍ਹ ਰਹੀ ਹੈ। ਨੈਤਿਕ ਕਦਰਾਂ ਕੀਮਤਾਂ ਦਾ ਘਾਣ ਹੋ ਰਿਹਾ ਹੈ। ਆਖਿਰ ਬੱਚੇ ਕਿਉਂ ਅਜਿਹੀਆਂ ਘਿਨਾਉਣੀਆਂ ਹਰਕਤਾਂ ਨੂੰ ਅੰਜਾਮ ਦੇ ਰਹੇ ਹਨ? ਬੱਚਿਆਂ ਨੂੰ ਆਪਣੇ ਮਾਂ ਪਿਓ ਦਾ ਡਰ ਕਿਉਂ ਨਹੀਂ ਰਿਹਾ? ਕਿਉਂ ਮਾਂ ਪਿਓ ਆਪਣੇ ਬੱਚਿਆਂ ਬਾਰੇ ਨਹੀਂ ਦੇਖਦੇ ਕਿ ਉਨ੍ਹਾਂ ਦੀ ਸੰਗਤ ਕਿਹੋ ਜਿਹੀ ਹੈ? ਕਾਲਜ ਦੀ ਹਦੂਦ ਅੰਦਰ ਇਹ ਭਾਣਾ ਕਿਸ ਤਰ੍ਹਾਂ ਵਰਤ ਗਿਆ। ਕਾਲਜ ਪ੍ਰਬੰਧਾਂ ਦੀ ਵਿਵਸਥਾ 'ਤੇ ਸਵਾਲੀਆ ਚਿੰਨ੍ਹ ਖੜ੍ਹੇ ਕਰ ਗਿਆ? ਬੱਚਿਆਂ ਨੂੰ ਚੰਗੇ ਸੰਸਕਾਰ ਦੇਣਾ ਅਧਿਆਪਕਾਂ ਅਤੇ ਮਾਪਿਆਂ ਦਾ ਮੁੱਢਲਾ ਫਰਜ਼ ਹੈ।
-ਸੰਜੀਵ ਸਿੰਘ ਸੈਣੀ
ਮੁਹਾਲੀ।
ਦਰਦਨਾਕ ਹਾਦਸਾ
1 ਫਰਵਰੀ ਨੂੰ ਫਗਵਾੜੇ ਲਾਗੇ ਵਾਪਰੇ ਸੜਕ ਹਾਦਸੇ 'ਚ ਤਿੰਨ ਨੌਜਵਾਨ ਵਿਦਿਆਰਥੀ ਮਾਰੇ ਗਏ ਹਨ। ਇਹ ਹਾਦਸਾ ਟ੍ਰੈਫਿਕ ਨਿਯਮਾਂ ਦੀ ਪਾਲਣਾ ਨਾ ਕਰਨ, ਤੇਜ਼ ਰਫ਼ਤਾਰ ਅਤੇ ਕਾਹਲੀ ਕਾਰਨ ਨੈਸ਼ਨਲ ਹਾਈਵੇ 'ਤੇ ਫਗਵਾੜਾ ਨੇੜੇ ਵਾਪਰਿਆ ਹੈ। ਬੇਕਾਬੂ ਕਾਰ ਦੀ ਡਿਵਾਈਡਰ ਪਾਰ ਕਰ ਕੇ ਸਾਹਮਣੇ ਤੋਂ ਆ ਰਹੇ ਵਾਹਨ ਨਾਲ ਟੱਕਰ ਐਨੀ ਜ਼ਬਰਦਸਤ ਹੋਈ ਕਿ ਕਾਰ ਬਿਲਕੁਲ ਤਬਾਹ ਹੋ ਗਈ ਅਤੇ ਤਿੰਨੇ ਨੌਜਵਾਨਾਂ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ। ਡਰਾਈਵਿੰਗ ਕਰਦੇ ਸਮੇਂ ਨੌਜਵਾਨਾਂ ਨੂੰ ਜੋਸ਼ ਦੀ ਬਜਾਏ ਹੋਸ਼ ਵਿਚ ਰਹਿਣਾ ਚਾਹੀਦਾ ਹੈ।
ਸੜਕਾਂ 'ਤੇ ਪੀਲੀ, ਚਿੱਟੀ ਪੱਟੀ ਦਾ ਨਾ ਹੋਣਾ, ਡੂੰਘੇ ਖੱਡੇ ਹੋਣਾ, ਰਿਫਲੈਕਟਰਾਂ ਦਾ ਨਾ ਹੋਣਾ, ਸੜਕਾਂ 'ਤੇ ਲਾਈਟਾਂ ਦਾ ਪ੍ਰਬੰਧ ਨਾ ਹੋਣਾ, ਸਪੀਡ ਬਰੇਕਰ ਦੀ ਇੰਡੀਕੇਸ਼ਨ ਦਾ ਨਾਂ ਹੋਣਾ, ਜ਼ਿਆਦਾ ਸਪੀਡ, ਡਿੱਪਰ ਦੀ ਵਰਤੋਂ ਨਾ ਕਰਨੀ, ਲਾਪਰਵਾਹੀ ਨਾਲ ਡਰਾਈਵਿੰਗ ਤੇ ਨਸ਼ਿਆਂ ਦੀ ਵਰਤੋਂ ਹਾਦਸਿਆਂ ਦੇ ਕਾਰਨ ਹੋ ਸਕਦੇ ਹਨ। ਨੈਸ਼ਨਲ ਹਾਈਵੇ ਅਥਾਰਟੀ ਨੂੰ ਸੜਕਾਂ ਤੇ ਸੁਚਾਰੂ ਰੂਪ ਨਾਲ ਵਾਹਨਾਂ ਦੀ ਸੁਰੱਖਿਆ ਲਈ ਟ੍ਰੈਫਿਕ ਪੁਲਿਸ ਦੇ ਨਾਲ-ਨਾਲ ਸਾਨੂੰ ਸਾਰਿਆਂ ਨੂੰ ਪੂਰਨ ਸਹਿਯੋਗ ਦੇਣਾ ਚਾਹੀਦਾ ਹੈ ਤਾਂ ਕਿ ਨਿੱਤ ਵਾਪਰਦੇ ਹਾਦਸਿਆਂ ਨੂੰ ਠੱਲ੍ਹ ਪਾਈ ਜਾ ਸਕੇ।
-ਮੇਜਰ ਸਿੰਘ ਨਾਭਾ।
ਸਕੂਲੀ ਵਿਦਿਆਰਥੀਆਂ ਦੇ ਦੁੱਖ
3 ਫਰਵਰੀ ਨੂੰ ਪਹਿਲੇ ਪੰਨੇ ਉੱਪਰ ਸਕੂਲੀ ਬੱਚਿਆਂ 'ਤੇ ਬਸਤਿਆਂ ਦੇ ਬੋਝ ਸੰਬੰਧੀ ਨੀਤੀ ਸਿਰਫ਼ ਕਾਗਜ਼ਾਂ ਤੱਕ ਸੀਮਤ' ਸਿਰਲੇਖ ਹੇਠ ਨਰਪਿੰਦਰ ਸਿੰਘ ਧਾਲੀਵਾਲ ਦੀ ਖ਼ਬਰ ਪੜ੍ਹੀ। ਪੱਤਰਕਾਰ ਨੇ ਨਵੀਂ ਸਿੱਖਿਆ ਨੀਤੀ 2020 ਅਤੇ ਸਕੂਲ ਬੈਗ ਨੀਤੀ 2020 ਵਿਚ ਦਰਜ ਨੁਕਤਿਆਂ ਨੂੰ ਖੁੱਲ੍ਹ ਕੇ ਪ੍ਰਗਟਾਉਂਦਿਆਂ ਬੱਚਿਆਂ ਦੇ ਦੁੱਖਾਂ ਨੂੰ ਉਭਾਰਨ ਦੀ ਸਫਲ ਕੋਸ਼ਿਸ਼ ਕੀਤੀ ਹੈ। ਢਾਈ ਤਿੰਨ ਸਾਲ ਦੇ ਬੱਚੇ ਨੂੰ ਕਕਰੈਚ ਸਕੂਲ ਲਾ ਦਿੱਤਾ ਜਾਂਦਾ ਹੈ।
ਸਵੇਰ ਸਕੂਲਾਂ ਦੀਆਂ ਵੈਨਾਂ ਅਤੇ ਛੋਟੇ ਆਟੋ ਵਿਚ ਅੱਧ ਸੁੱਤੇ ਜਾਂਦੇ ਬੱਚੇ ਮਾਪਿਆਂ ਵਲੋਂ ਬੱਚਿਆਂ ਉੱਪਰ ਕੀਤੀ ਜਾਂਦੀ ਧੱਕੇਸ਼ਾਹੀ ਨੂੰ ਦਰਸਾਉਂਦਾ ਹੈ। ਸਕੂਲ ਤੋਂ ਆਉਣ ਤੋਂ ਬਾਅਦ ਉਨ੍ਹਾਂ ਨੂੰ ਟਿਊਸ਼ਨ ਭੇਜਿਆ ਜਾਂਦਾ ਹੈ। ਦੇਖਿਆ ਜਾਵੇ ਤਾਂ ਜਿੰਨਾ ਟਾਈਮ ਇਕ ਨੌਕਰੀਪੇਸ਼ਾ ਵਿਅਕਤੀ ਘਰੋਂ ਬਾਹਰ ਰਹਿੰਦਾ ਹੈ, ਤਕਰੀਬਨ ਉਤਨਾ ਸਮਾਂ ਹੀ ਬੱਚੇ ਬੈਨਾਂ, ਸਕੂਲਾਂ ਅਤੇ ਟਿਊਸ਼ਨਾਂ ਵਿਚ ਲਗਾ ਰਹੇ ਹਨ। ਸਭ ਤੋਂ ਵੱਡਾ ਮੁੱਦਾ ਬੱਚਿਆਂ ਦੇ ਬੈਗ ਦਾ ਭਾਰ ਬੱਚਿਆਂ ਦੇ ਭਾਰ ਦੇ ਬਰਾਬਰ ਜਾਂ ਉਸ ਤੋਂ ਵੱਧ ਹੁੰਦਾ ਹੈ। ਇਕੱਲਾ ਬੱਚਾ ਪੜ੍ਹਨਾ ਤਾਂ ਦੂਰ ਰਿਹਾ ਬੈਗ ਚੁੱਕ ਕੇ ਵੈਨ ਵਿਚ ਨਹੀਂ ਚੜ੍ਹ ਸਕਦਾ। ਇਸ ਮਾਮਲੇ ਸੰਬੰਧੀ ਗੰਭੀਰਤਾ ਨਾਲ ਵਿਚਾਰ ਕਰਨਾ ਸਮੇਂ ਦੀ ਲੋੜ ਹੈ।
-ਫ਼ਤਿਹਵੀਰ ਸਿੰਘ
ਮੁਲਤਾਨੀਆ ਰੋਡ, ਬਠਿੰਡਾ।