ਐੱਸ. ਏ. ਐੱਸ. ਨਗਰ, 31 ਮਈ (ਨਰਿੰਦਰ ਸਿੰਘ ਝਾਂਮਪੁਰ)-ਪੁੱਡਾ ਦੇ ਬੁਲਾਰੇ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਪੁੱਡਾ ਤੇ ਹੋਰ ਵਿਸ਼ੇਸ਼ ਅਥਾਰਟੀਆਂ ਨੇ ਅੱਜ 1 ਜੂਨ ਤੋਂ ਵੱਖ-ਵੱਖ ਪ੍ਰਾਪਰਟੀਆਂ ਦੀ ਈ-ਨਿਲਾਮੀ ਲਈ ਤਿਆਰੀ ਪੂਰੀ ਕਰ ਲਈ ਹੈ | ਵੱਖ-ਵੱਖ ਪ੍ਰਾਪਰਟੀਆਂ ਲਈ ਆਪਣੀ ਕਿਸਮਤ ਅਜਮਾਉਣ ਲਈ ਬੋਲੀਕਾਰਾਂ ਕੋਲ 10 ਦਿਨਾਂ ਦਾ ਸਮਾਂ ਹੋਵੇਗਾ ਤੇ ਇਹ ਈ-ਨਿਲਾਮੀ 10 ਜੂਨ ਨੂੰ ਖ਼ਤਮ ਹੋਵੇਗੀ | ਉਨ੍ਹਾਂ ਦੱਸਿਆ ਕਿ ਈ-ਨਿਲਾਮੀ ਵਿਚ ਸੰਸਥਾਗਤ, ਉਦਯੋਗਿਕ, ਵਪਾਰਕ ਅਤੇ ਰਿਹਾਇਸ਼ੀ ਪ੍ਰਾਪਰਟੀਆਂ ਬੋਲੀ ਲਈ ਉਪਲੱਬਧ ਹੋਣਗੀਆਂ | ਬੋਲੀਕਾਰ ਮੁਹਾਲੀ, ਲੁਧਿਆਣਾ, ਅੰਮਿ੍ਤਸਰ ਅਤੇ ਬਠਿੰਡਾ ਵਿਖੇ ਸਥਿਤ ਵੱਡੀਆਂ ਵਪਾਰਕ ਚੰਕ ਸਾਈਟਾਂ ਲਈ ਬੋਲੀ ਦੇਣ ਤੋਂ ਇਲਾਵਾ ਬਟਾਲਾ ਦੀ ਸਕੂਲ ਸਾਈਟ ਅਤੇ ਲੁਧਿਆਣਾ ਤੇ ਜਲੰਧਰ ਸਥਿਤ ਹੋਟਲ ਸਾਈਟਾਂ ਲਈ ਵੀ ਬੋਲੀ ਦੇ ਸਕਣਗੇ | ਇਸ ਤੋਂ ਇਲਾਵਾ ਗਮਾਡਾ ਵਲੋਂ ਸੰਸਥਾਗਤ ਸਾਈਟਾਂ ਜਿਨ੍ਹਾਂ ਵਿਚ ਹੋਟਲ, ਸਕੂਲ, ਪੈਟਰੋਲ ਪੰਪ ਆਦਿ ਸ਼ਾਮਿਲ ਹਨ, ਸਮੇਤ ਵਪਾਰਕ ਸਾਈਟਾਂ ਜਿਵੇਂ ਕਿ ਐਸ. ਸੀ. ਓ., ਬੂਥ, ਦੁਕਾਨਾਂ ਅਤੇ ਰਿਹਾਇਸ਼ੀ ਪਲਾਟਾਂ ਨੂੰ ਵੀ ਨਿਲਾਮ ਕਰਨ ਦਾ ਫ਼ੈਸਲਾ ਲਿਆ ਗਿਆ ਹੈ |
