ਜੈਤੋ, 17 ਨਵੰਬਰ (ਗੁਰਚਰਨ ਸਿੰਘ ਗਾਬੜੀਆ)-ਸ਼ਿਵਾਲਿਕ ਪਬਲਿਕ ਸਕੂਲ ਜੈਤੋ ਵਲੋਂ ਵਿਦਿਆਰਥੀਆਂ ਦਾ ਪਿਛਲੇ ਦਿਨੀਂ ਰਾਜਸਥਾਨ ਦੇ ਸ਼ਹਿਰ ਜੈਸਲਮੇਰ ਤੇ ਆਸ-ਪਾਸ ਦੇ ਸਥਾਨਾਂ ਦਾ ਤਿੰਨ ਰੋਜ਼ਾ ਵਿੱਦਿਆਕ ਫੇਰਾ ਲਗਾਇਆ ਗਿਆ | ਬੱਚਿਆਂ ਨੇ ਜੈਸਲਮੇਰ ਸ਼ਹਿਰ ਦੇ ਤਿੰਨ ਸਿਤਾਰਾ ਹੋਟਲ ਵਿਚ ਠਹਿਰਾ ਕੀਤਾ ਗਿਆ | ਪਹਿਲੇ ਦਿਨ ਵਿਦਿਆਰਥੀਆਂ ਨੂੰ ਸੋਨਾਰ ਕਿਲ੍ਹਾ ਅਤੇ ਪੱਟਵਾਂ ਦੀ ਹਵੇਲੀ ਦੀ ਸੈਰ ਕਰਾਈ ਗਈ | ਅਗਲੇ ਦਿਨ ਵਿਦਿਆਰਥੀਆਂ ਨੇ ਗੜ੍ਹੀਸਰ ਲੇਕ ਵਿਖੇ ਬੋਟਿੰਗ ਦਾ ਆਨੰਦ ਮਾਣਿਆ ਅਤੇ ਦੁਪਹਿਰ ਬਾਅਦ ਕੁਲਧਰਾ ਪਿੰਡ ਦੇਖਿਆ | ਸ਼ਾਮ ਸਮੇਂ ਜੀਪ ਡੈਜ਼ਰਟ ਸਫਾਰੀ ਅਤੇ ਊਠ ਦੀ ਸਵਾਰੀ ਦਾ ਆਨੰਦ ਮਾਣਿਆ | ਰਾਤ ਸਮੇਂ ਰਾਜਸਥਾਨੀ ਸੱਭਿਆਚਾਰਕ ਪ੍ਰੋਗਰਾਮ ਵੇਖਿਆ ਅਤੇ ਡੀਜੇ 'ਤੇ ਖੂਬ ਡਾਂਸ ਕੀਤਾ ਗਿਆ | ਰਾਤ ਦੇ ਸਮੇਂ ਡੈਜ਼ਰਟ ਦੇ ਤੰਬੂਆਂ ਵਿਚ ਰਾਤ ਗੁਜ਼ਾਰੀ ਗਈ | ਤੀਸਰੇ ਤੇ ਆਖਰੀ ਦਿਨ ਸਵੇਰ ਸਮੇਂ ਟਿੱਬਿਆਂ ਦੇ ਠੰਡੇ ਰੇਤ ਉੱਪਰ ਨੰਗੇ ਪੈਰੀ ਚੱਲਣ ਦਾ ਅਨੁਭਵ ਕੀਤਾ ਗਿਆ ਅਤੇ ਸਵੇਰ ਦੇ ਸੂਰਜ ਪ੍ਰਕਾਸ਼ ਦਾ ਅਦਭੁਤ ਨਜ਼ਾਰਾ ਵੇਖਿਆ ਗਿਆ | ਉਪਰੰਤ ਭਾਰਤ ਪਾਕਿਸਤਾਨ 1971 ਦੀ ਜੰਗ ਦੀ ਯਾਦਗਾਰ ਲੌਂਗੇਵਾਲਾ ਪੋਸਟ ਦੀ ਯਾਤਰਾ ਕੀਤੀ ਗਈ ਤੇ ਯੁੱਧ ਸਮਾਰਕ, ਹਥਿਆਰ, ਟੈਂਕ ਆਦਿ ਦੇਖਿਆ ਗਿਆ | ਇਸ ਤੋਂ ਬਾਅਦ ਭਾਰਤ ਪਾਕਿਸਤਾਨ ਸਰਹੱਦ ਉੱਪਰ ਸਥਿਤ ਤਨੌਟ ਮਾਤਾ ਦੇ ਮੰਦਰ ਦੇ ਦਰਸ਼ਨ ਕੀਤੇ ਗਏ | ਸ਼ਾਮ ਸਮੇਂ ਟੂਰ ਦੇ ਆਖਰੀ ਪੜਾਅ ਤੋਂ ਬਾਅਦ ਜੈਤੋ ਸ਼ਹਿਰ ਵੱਲ ਰਵਾਨਗੀ ਪਾਈ ਗਈ | ਵਿਦਿਆਰਥੀਆਂ ਤੇ ਉਨ੍ਹਾਂ ਦੇ ਮਾਪਿਆਂ ਵਲੋਂ ਇਸ ਕਾਮਯਾਬ, ਗਿਆਨ ਤੇ ਰੋਮਾਂਚ ਭਰਪੂਰ ਟੂਰ ਲਈ ਪਿ੍ੰਸੀਪਲ ਸਰਬਜੀਤ ਸਿੰਘ ਦਾ ਧੰਨਵਾਦ ਕੀਤਾ | ਪਿ੍ੰਸੀਪਲ ਸਰਬਜੀਤ ਸਿੰਘ ਵਲੋਂ ਫੇਰੇ ਦੀ ਕਾਮਯਾਬੀ ਲਈ ਵਿਦਿਆਰਥੀਆਂ ਦੇ ਅਨੁਸ਼ਾਸਨ ਦੀ ਭਰਪੂਰ ਸ਼ਲਾਘਾ ਕੀਤੀ | ਇਸ ਮੌਕੇ ਸਕੂਲ ਦੀ ਪ੍ਰਬੰਧਕ ਕਮੇਟੀ ਦੇ ਚੇਅਰਮੈਨ ਅਸ਼ਵਨੀ ਕੁਮਾਰ ਗਰਗ, ਜਗਮੇਲ ਸਿੰਘ, ਗੌਰਵ ਗਰਗ ਅਤੇ ਦੀਪੀ ਗਰਗ ਆਦਿ ਹਾਜ਼ਰ ਸਨ |
