ਐੱਸ. ਏ. ਐੱਸ. ਨਗਰ, 17 ਅਕਤੂਬਰ (ਕਪਿਲ ਵਧਵਾ)-ਮੁਹਾਲੀ ਸਥਿਤ ਵਿਸ਼ੇਸ਼ ਸੀ. ਬੀ. ਆਈ. ਅਦਾਲਤ ਨੇ 1 ਲੱਖ ਰੁਪਏ ਦੀ ਰਿਸ਼ਵਤ ਲੈਣ ਦੇ ਮਾਮਲੇ ਵਿਚ ਗਿ੍ਫ਼ਤਾਰ ਕੀਤੇ ਗਏ ਕਲਰਕ ਨੂੰ ਰੈਗੂਗਰ ਜ਼ਮਾਨਤ ਦੇ ਦਿੱਤੀ ਗਈ ਹੈ | ਪ੍ਰਾਪਤ ਜਾਣਕਾਰੀ ਅਨੁਸਾਰ 1 ਸਤੰਬਰ ਨੂੰ ਸ਼ਿਕਾਇਤਕਰਤਾ ਨੇ ਪੁਲਿਸ ਨੂੰ ਲਿਖਤੀ ਸ਼ਿਕਾਇਤ ਦਿੱਤੀ ਸੀ ਕਿ ਏਅਰ ਫੋਰਸ ਥਾਣੇ ਦੀ ਮੈਸ ਵਿਖੇ ਤਾਇਨਾਤ ਵਿਕਾਸ ਕੁਮਾਰ (ਸਹਾਇਕ ਗੈਰੀਸਨ ਇੰਜ.) ਨੇ ਆਪਣੇ ਕਲਰਕ ਨਰਿੰਦਰ ਕੁਮਾਰ ਜ਼ਰੀਏ ਪਾਣੀ ਸਪਲਾਈ ਦੇ ਕੰਟਰੈਕਟ ਨੂੰ ਖ਼ਤਮ ਕਰਨ ਦੀ ਸਮਾਂ-ਸੀਮਾ ਨੂੰ ਵਧਾਉਣ ਅਤੇ ਬਕਾਇਆ ਬਿੱਲ ਰਾਸ਼ੀ ਦਾ ਭੁਗਤਾਨ ਕਰਨ ਦੇ ਬਦਲੇ 1 ਲੱਖ ਰੁ. ਰਿਸ਼ਵਤ ਵਜੋਂ ਮੰਗ ਕੀਤੀ ਸੀ | ਸ਼ੁਰੂਆਤੀ ਜਾਂਚ ਪੂਰੀ ਹੋਣ ਉਪਰੰਤ ਸੀ. ਬੀ. ਆਈ. ਦੇ ਅਧਿਕਾਰੀਆਂ ਨੇ ਇਕ ਨਿਯਮਿਤ ਕੇਸ ਦਰਜ ਕਰਕੇ 15 ਸਤੰਬਰ ਨੂੰ ਇਕ ਜਾਅਲ ਵਿਛਾਇਆ ਸੀ, ਜਿਸ ਦੌਰਾਨ ਅਧਿਕਾਰੀਆਂ ਨੇ ਨਰਿੰਦਰ ਕੁਮਾਰ ਨੂੰ ਰਿਸ਼ਵਤ ਲੈਂਦਿਆਂ ਕਾਬੂ ਕਰ ਲਿਆ ਅਤੇ ਉਕਤ ਰਕਮ ਨੂੰ ਉਸ ਦੀ ਅਲਮਾਰੀ ਤੋਂ ਬਰਾਮਦ ਕੀਤੀ | ਉਸੇ ਵਕਤ ਕਲਰਕ ਨਰਿੰਦਰ ਕੁਮਾਰ ਸਮੇਤ ਵਿਕਾਸ ਕੁਮਾਰ ਨੂੰ ਗਿ੍ਫ਼ਤਾਰ ਕਰ ਲਿਆ ਗਿਆ | ਇਸ ਮਾਮਲੇ ਵਿਚ ਅਦਾਲਤ ਨੇ ਬੁੱਧਵਾਰ ਨੂੰ ਸਹਾਇਕ ਇੰਜ. ਵਿਕਾਸ ਕੁਮਾਰ ਨੂੰ ਜ਼ਮਾਨਤ ਦੇ ਦਿੱਤੀ ਸੀ, ਜਿਸ ਤੋਂ ਬਾਅਦ ਅੱਜ ਕਲਰਕ ਨਰਿੰਦਰ ਕੁਮਾਰ ਉਰਫ਼ ਨਰਿੰਦਰ ਨੂੰ 50 ਹਜ਼ਾਰ ਰੁ. ਦਾ ਜ਼ਮਾਨਤੀ ਮੁਚੱਲਕਾ ਭਰਨ 'ਤੇ ਰਿਹਾਅ ਕਰਨ ਦੇ ਹੁਕਮ ਸੁਣਾਏ ਗਏ |
