ਨਵੀਂ ਦਿੱਲੀ, 18 ਜੂਨ (ਮਿਸਰਦੀਪ ਭਾਟੀਆ)-ਰਾਜਧਾਨੀ ਦਿੱਲੀ ਦੇ ਮਜਨੰੂ ਕਾ ਟਿੱਲਾ ਇਲਾਕੇ ਵਿਚ ਸਥਿਤ ਇਕ ਬਾਲ ਸੁਧਾਰ ਘਰ ਵਿਚ ਉਸ ਸਮੇਂ ਸਨਸਨੀ ਫੈਲ ਗਈ, ਜਦ ਇਕ ਨੌਜਵਾਨ ਦਾ ਕੁੱਟਮਾਰ ਕਰ ਕੇ ਕਤਲ ਕਰ ਦਿੱਤਾ ਗਿਆ | ਮਿ੍ਤਕ ਦੀ ਪਛਾਣ 17 ਸਾਲਾ ਕਰਣ ਵਜੋਂ ਹੋਈ ਹੈ | ਇਹ ਘਟਨਾ ਉਸ ਸਮੇਂ ਹੋਈ ਜਦੋਂ ਕੁੱਝ ਨੌਜਵਾਨ ਨਹਾਉਣ ਦੇ ਦੌਰਾਨ ਆਪਸ ਵਿਚ ਝਗੜ ਪਏ | ਪਹਿਲਾਂ ਮਾਮਲਾ ਮਾਮੂਲੀ ਵਿਵਾਦ ਲੱਗ ਰਿਹਾ ਸੀ ਪਰ ਦੇਖਦੇ ਹੀ ਦੇਖਦੇ ਹਿੰਸਾ ਵਿਚ ਬਦਲ ਗਿਆ | ਮੁਢਲੀ ਜਾਂਚ ਦੇ ਮੁਤਾਬਕ, ਬਾਲ ਸੁਧਾਰ ਘਰ ਦੇ ਬਾਥਰੂਮ ਵਿਚ ਨਹਾਉਣ ਨੂੰ ਲੈ ਕੇ ਦੋ ਨੌਜਵਾਨਾਂ ਦੇ ਵਿਚ ਬਹਿਸ ਹੋ ਗਈ ਸੀ | ਇਸ ਝਗੜੇ ਵਿਚ ਇਕ ਤੀਸਰਾ ਨੌਜਵਾਨ ਵੀ ਵਿਚ ਬਚਾਅ ਲਈ ਆਇਆ ਪਰ ਸਥਿਤੀ ਹੋਰ ਵਿਗੜ ਗਈ | ਚਸ਼ਮਦੀਦਾਂ ਦੇ ਅਨੁਸਾਰ ਉਸ ਨੌਜਵਾਨ ਨੇ ਹੀ ਵਿਚ ਬਚਾਅ ਕਰਨ ਦੇ ਬਾਅਦ ਕਰਣ 'ਤੇ ਅਚਾਨਕ ਹਮਲਾ ਕਰ ਦਿੱਤਾ ਅਤੇ ਉਸ ਦੀ ਬੇਰਹਿਮੀ ਨਾਲ ਕੁੱਟਮਾਰ ਕਰਨੀ ਸ਼ੁਰੂ ਕਰ ਦਿੱਤੀ | ਸੁਧਾਰ ਘਰ ਦੇ ਕਰਮਚਾਰੀਆਂ ਨੇ ਜ਼ਖ਼ਮੀ ਕਰਣ ਨੂੰ ਨਜ਼ਦੀਕੀ ਹਿੰਦੂ ਰਾਓ ਹਸਪਤਾਲ ਪਹੁੰਚਾਇਆ ਪਰ ਡਾਕਟਰਾਂ ਨੇ ਉਸ ਨੂੰ ਮਿ੍ਤਕ ਐਲਾਨ ਦਿੱਤਾ | ਘਟਨਾ ਦੀ ਸੂਚਨਾ ਮਿਲਦੇ ਹੀ ਸਿਵਲ ਲਾਈਨ ਥਾਣਾ ਪੁਲਿਸ ਮੌਕੇ 'ਤੇ ਪਹੁੰਚੀ ਅਤੇ ਲਾਸ਼ ਨੂੰ ਕਬਜ਼ੇ ਵਿਚ ਲੈ ਕੇ ਪੋਸਟਮਾਰਟਮ ਲਈ ਭੇਜ ਦਿੱਤਾ | ਫਿਲਹਾਲ, ਪੁਲਿਸ ਨੇ ਕਤਲ ਦਾ ਮਾਮਲਾ ਦਰਜ ਕਰ ਲਿਆ ਹੈ ਅਤੇ ਦੋਸ਼ੀ ਨੌਜਵਾਨ ਨੂੰ ਹਿਰਾਸਤ ਵਿਚ ਲੈ ਲਿਆ ਹੈ | ਕਰਣ ਦੀ ਲਾਸ਼ ਦਾ ਪੋਸਟਮਾਰਟਮ ਹਿੰਦੂ ਰਾਓ ਹਸਪਤਾਲ ਵਿਚ ਕੀਤਾ ਜਾਵੇਗਾ | ਇਸ ਪੂਰੇ ਮਾਮਲੇ ਦੀ ਰਿਪੋਰਟ ਆਉਣ ਦੇ ਬਾਅਦ ਹੀ ਮੌਤ ਦੇ ਕਾਰਨਾਂ ਦੀ ਪੁਸ਼ਟੀ ਹੋ ਸਕੇਗੀ |
