ਫ਼ਾਜ਼ਿਲਕਾ, 30 ਅਪ੍ਰੈਲ (ਦਵਿੰਦਰ ਪਾਲ ਸਿੰਘ)-ਭਾਰਤ-ਪਾਕਿਸਤਾਨ ਸਰਹੱਦੀ ਖੇਤਰ ਦੇ ਪਿੰਡਾਂ ਵਿਚ ਆਏ ਹੜ੍ਹ ਤੋਂ ਬਾਅਦ ਜਿੱਥੇ ਮੁੜ ਵਸੇਬੇ ਦੀ ਲੋੜ ਹੈ, ਉੱਥੇ ਰੋਟਰੀ ਕਲੱਬ ਇੰਟਰਨੈਸ਼ਨਲ ਇਕ ਮਦਦਗਾਰ ਸੰਸਥਾ ਵਜੋਂ ਸਾਹਮਣੇ ਆਈ ਹੈ | ਕਲੱਬ ਦੀ ਫ਼ਾਜ਼ਿਲਕਾ ਇਕਾਈ ਦੇ ਯਤਨਾਂ ਸਦਕਾ ਡਿਸਟਿ੍ਕਟ ਗਵਰਨਰ ਨੇ ਹੜ੍ਹ ਪ੍ਰਭਾਵਿਤ ਸਕੂਲਾਂ ਦੇ ਪਖਾਨਿਆਂ ਦੇ ਨਿਰਮਾਣ ਲਈ 25 ਹਜ਼ਾਰ ਡਾਲਰ ਦੀ ਗਰਾਂਟ ਜਾਰੀ ਕਰਵਾਈ ਹੈ | ਰੋਟਰੀ ਕਲੱਬ ਦੇ ਡਿਸਟਿ੍ਕਟ ਗਵਰਨਰ ਭੁਪੇਸ਼ ਮਹਿਤਾ (ਸਿਰਸਾ), ਪਾਸਟ ਡਿਸਟਿ੍ਕਟ ਗਵਰਨਰ ਪ੍ਰੇਮ ਅਗਰਵਾਲ ਅਤੇ ਗਰਾਂਟ ਚੇਅਰਮੈਨ ਵਿਜੇ ਅਰੋੜਾ (ਫ਼ਿਰੋਜ਼ਪੁਰ) ਨੇ ਫ਼ਾਜ਼ਿਲਕਾ ਦਾ ਦੌਰਾ ਕੀਤਾ | ਉਨ੍ਹਾਂ ਪਿੰਡ ਨੂਰਸ਼ਾਹ, ਝੰਗੜ ਭੈਣੀ ਅਤੇ ਮੁਹਾਰ ਖੀਵਾ ਦੇ ਪ੍ਰਾਇਮਰੀ ਸਕੂਲਾਂ ਵਿਚ ਸਾਢੇ 7 ਲੱਖ ਰੁਪਏ ਦੀ ਲਾਗਤ ਨਾਲ ਤਿਆਰ ਕੀਤੇ ਗਏ ਪਖਾਨਿਆਂ ਦਾ ਨਿਰੀਖਣ ਕੀਤਾ ਅਤੇ ਉਨ੍ਹਾਂ ਨੂੰ ਬੱਚਿਆਂ ਲਈ ਲੋਕ ਅਰਪਣ ਕੀਤਾ | ਫ਼ਾਜ਼ਿਲਕਾ ਪਹੁੰਚਣ 'ਤੇ ਵਾਈਸ ਡਿਸਟਿ੍ਕਟ ਗਵਰਨਰ ਡਾ. ਅਜੈ ਧਵਨ, ਪ੍ਰਧਾਨ ਡਾ. ਅਨਮੋਲ ਗਰੋਵਰ, ਸਕੱਤਰ ਡਾ. ਮਨੁਜ ਦੂਮੜਾ, ਖ਼ਜ਼ਾਨਚੀ ਅਸ਼ੋਕ ਅਹੂਜਾ ਅਤੇ ਪ੍ਰੋਜੈਕਟ ਇੰਚਾਰਜ ਰਜਨੀਸ਼ ਕਾਮਰਾ ਨੇ ਆਏ ਹੋਏ ਮਹਿਮਾਨਾਂ ਦਾ ਸਵਾਗਤ ਕੀਤਾ | ਸਕੂਲ ਸਟਾਫ਼ ਨੇ ਸਰਹੱਦੀ ਖੇਤਰ ਦੇ ਇਨ੍ਹਾਂ ਪਿੰਡਾਂ ਵਿਚ ਪਖਾਨਿਆਂ ਵਰਗੀ ਮੁੱਢਲੀ ਸਹੂਲਤ ਪ੍ਰਦਾਨ ਕਰਨ ਲਈ ਕਲੱਬ ਦਾ ਵਿਸ਼ੇਸ਼ ਤੌਰ 'ਤੇ ਧੰਨਵਾਦ ਕੀਤਾ | ਡਿਸਟਿ੍ਕਟ ਗਵਰਨਰ ਭੁਪੇਸ਼ ਮਹਿਤਾ ਨੇ ਕਲੱਬ ਦੀਆਂ ਭਵਿੱਖ ਦੀਆਂ ਯੋਜਨਾਵਾਂ ਬਾਰੇ ਮੈਂਬਰਾਂ ਨਾਲ ਵਿਚਾਰ-ਵਟਾਂਦਰਾ ਕੀਤਾ | ਇਸ ਮੌਕੇ ਡਾ. ਆਰ.ਪੀ. ਸਿੰਘ, ਅਸਿਸਟੈਂਟ ਗਵਰਨਰ ਗੌਰਵ ਨਾਗਪਾਲ, ਡਾ.ਅਜੈ ਗਰੋਵਰ ਅਤੇ ਸੰਜੀਵ ਜੁਨੇਜਾ ਸਮੇਤ ਹੋਰ ਪਤਵੰਤੇ ਹਾਜ਼ਰ ਸਨ |
