ਮਾਨਸਾ , 3 ਅਗਸਤ ( ਸ . ਰਿ .)- ਜ਼ਿਲ੍ਹਾ ਆਯੁਰਵੈਦਿਕ ਤੇ ਯੂਨਾਨੀ ਅਫ਼ਸਰ ਡਾ . ਨਮਿਤਾ ਗਰਗ ਨੇ ਜ਼ਿਲ੍ਹੇ ਦੀਆਂ ਸਮੂਹ ਸਰਕਾਰੀ ਆਯੁਰਵੈਦਿਕ ਸੰਸਥਾਵਾਂ ਦੇ ਇੰਚਾਰਜਾਂ ਤੇ ਮੈਡੀਕਲ ਅਫ਼ਸਰਾਂ ਨੂੰ ਕੈਂਸਰ ਦੇ ਸ਼ੱਕੀ ਤੇ ਪੁਸ਼ਟੀਸ਼ੁਦਾ ਮਰੀਜ਼ਾਂ ਦੀ ਸਮੇਂ ਸਿਰ ਪਛਾਣ ਕਰ ਕੇ ਰਿਪੋਰਟਿੰਗ ਕਰਨ ਲਈ ਨਿਰਦੇਸ਼ ਜਾਰੀ ਕੀਤੇ ਹਨ । ਉਨ੍ਹਾਂ ਕਿਹਾ ਕਿ ਕੈਂਸਰ ਦੇ ਲੱਛਣਾਂ ਵਾਲੇ ਮਰੀਜ਼ਾਂ ਦੀ ਸ਼ੁਰੂਆਤੀ ਪੱਧਰ ’ ਤੇ ਪਛਾਣ ਕਰ ਕੇ ਲੋੜੀਂਦੀ ਜਾਂਚ ਅਤੇ ਮਾਹਿਰ ਡਾਕਟਰਾਂ ਕੋਲ ਰੈਫ਼ਰ ਕਰਨਾ ਅਤਿ ਜ਼ਰੂਰੀ ਹੈ , ਜਿਸ ਨਾਲ ਸਮੇਂ - ਸਿਰ ਬਿਮਾਰੀ ਦਾ ਪਤਾ ਲੱਗਣ ’ ਤੇ ਇਲਾਜ ਦੀ ਸਫਲਤਾ ਦੀ ਸੰਭਾਵਨਾ ਵੱਧ ਜਾਂਦੀ ਹੈ । ਉਨ੍ਹਾਂ ਆਯੁਰਵੈਦਿਕ ਮੈਡੀਕਲ ਅਫ਼ਸਰਾਂ ਨੂੰ ਹਦਾਇਤ ਕੀਤੀ ਕਿ ਉਹ ਲੋਕਾਂ ਨੂੰ ਕੈਂਸਰ ਦੇ ਸ਼ੁਰੂਆਤੀ ਲੱਛਣਾਂ ਬਾਰੇ ਜਾਗਰੂਕ ਕਰਨ , ਸ਼ੱਕੀ ਮਰੀਜ਼ਾਂ ਦੀ ਤੁਰੰਤ ਪਛਾਣ ਕਰ ਕੇ ਲੋੜ ਅਨੁਸਾਰ ਉੱਚ ਸਿਹਤ ਸੰਸਥਾਵਾਂ ’ ਚ ਰੈਫ਼ਰ ਕਰਨ ਅਤੇ ਵਿਭਾਗੀ ਹਦਾਇਤਾਂ ਦੀ ਪਾਲਣਾ ਯਕੀਨੀ ਬਣਾਉਣ । ਉਨ੍ਹਾਂ ਲੋਕਾਂ ਨੂੰ ਅਪੀਲ ਕੀਤੀ ਕਿ ਜੇਕਰ ਸਰੀਰ ’ ਚ ਕੋਈ ਗੰਢ , ਲੰਬੇ ਸਮੇਂ ਤੱਕ ਨਾ ਠੀਕ ਹੋਣ ਵਾਲਾ ਜ਼ਖ਼ਮ , ਅਸਧਾਰਨ ਖ਼ੂਨ ਵਗਣਾ , ਲਗਾਤਾਰ ਖੰਘ , ਨਿਗਲਣ ’ ਚ ਦਿੱਕਤ , ਆਵਾਜ਼ ’ ਚ ਲਗਾਤਾਰ ਬਦਲਾਅ ਜਾਂ ਹੋਰ ਕੋਈ ਸ਼ੱਕੀ ਲੱਛਣ ਨਜ਼ਰ ਆਉਣ ਤਾਂ ਬਿਨਾਂ ਦੇਰੀ ਨਜ਼ਦੀਕੀ ਸਰਕਾਰੀ ਸਿਹਤ ਸੰਸਥਾ ’ ਚ ਜਾਂਚ ਕਰਵਾਈ ਜਾਵੇ ।
