ਨਿਊਯਾਰਕ, 10 ਜੁਲਾਈ (ਰਾਜੂ ਸਹਿਬਾਜ਼ਪੁਰਾ)-ਅਮਰੀਕੀ ਸੰਘੀ ਜਾਂਚ ਏਜੰਸੀਆਂ ਨੇ ਵ੍ਹਾਈਟ ਹਾਊਸ ’ਚ ਜੂਨ 2026 ਦੌਰਾਨ ਕਰਵਾਏ ਗਏ ਯੂ.ਐਫ਼.ਸੀ. ਸਮਾਗਮ ਨੂੰ ਨਿਸ਼ਾਨਾ ਬਣਾਉਣ ਦੀ ਕਥਿਤ ਵੱਡੀ ਸਾਜਿਸ਼ ਨੂੰ ਨਾਕਾਮ ਬਣਾਉਣ ਤੋਂ ਬਾਅਦ ਇਸ ਮਾਮਲੇ ’ਚ 8 ਵਿਅਕਤੀਆਂ ਖ਼ਿਲਾਫ਼ ਅੱਤਵਾਦ ਤੇ ਕਤਲ ਦੀ ਸਾਜਿਸ਼ ਦੇ ਗੰਭੀਰ ਦੋਸ਼ਾਂ ਹੇਠ ਇਲਜ਼ਾਮਨਾਮਾ ਦਾਇਰ ਕੀਤਾ ਹੈ। ਅਮਰੀਕੀ ਨਿਆਂ ਵਿਭਾਗ ਤੇ ਐਫ.ਬੀ.ਆਈ. ਮੁਤਾਬਕ, ਇਸ ਗਰੁੱਪ ਨੇ ਮਈ 2026 ਤੋਂ ਹੀ ਹਮਲੇ ਦੀ ਯੋਜਨਾ ’ਤੇ ਕੰਮ ਸ਼ੁਰੂ ਕਰ ਦਿੱਤਾ ਸੀ। ਕਥਿਤ ਮੁਲਜ਼ਮਾਂ ਨੇ ਹਥਿਆਰ, ਗੋਲਾ-ਬਾਰੂਦ, ਬਾਡੀ ਆਰਮਰ, ਵਿਸਫੋਟਕ ਸਮੱਗਰੀ, ਡਰੋਨ, ਮੈਡੀਕਲ ਸਾਮਾਨਅਤੇ ਸੰਚਾਰ ਉਪਕਰਣ ਸਮੇਤ ਹੋਰ ਲੋੜੀਂਦਾ ਸਾਜ਼ੋ-ਸਾਮਾਨ ਇਕੱਠਾ ਕੀਤਾ ਸੀ।
