ਕੋਲਕਾਤਾ 'ਚ ਟੀ.ਐਮ.ਸੀ. ਵਿਧਾਇਕ ਦੀ ਕਾਰ 'ਤੇ ਹਮਲਾ, ਇਕ ਆਗੂ ਦਾ ਮੁੰਨਿਆ ਸਿਰ

ਕੋਲਕਾਤਾ, 7 ਜੂਨ (ਏਜੰਸੀ)-ਕੋਲਕਾਤਾ ਦੇ ਕੁਝ ਇਲਾਕਿਆਂ 'ਚ ਤਿ੍ਣਮੂਲ ਕਾਂਗਰਸ ਦੇ ਦੋ ਕੌਂਸਲਰਾਂ ਦੀ ਵੱਖ ਵੱਖ ਅਪਰਾਧਿਕ ਮਾਮਲਿਆਂ 'ਚ ਗਿ੍ਫ਼ਤਾਰੀ ਦੇ ਬਾਅਦ ਕਾਫ਼ੀ ਹੰਗਾਮਾ ਹੋਇਆ | ਦੱਖਣੀ-ਪੂਰਬੀ ਕੋਲਕਾਤਾ 'ਚ ਕੌਂਸਲਰ ਬੱਪਾਦਿੱਤਿਆ ਦਾਸਗੁਪਤਾ ਤੇ ਸ਼ਹਿਰ ਦੇ ਉਤਰੀ ਹਿੱਸੇ 'ਚ ਮੁਹੰਮਦ ਜਸੀਮੂਦੀਨ ਖਿਲਾਫ਼ ਪ੍ਰਦਰਸ਼ਨ ਦੌਰਾਨ ਸਥਾਨਕ ਲੋਕਾਂ ਨੇ ਆਂਡੇ ਸੁੱਟੇ | ਨਾਟਕੀ ਘਟਨਾ ਇਹ ਰਹੀ ਕਿ ਜਸੀਮੂਦੀਨ ਨੇ ਗਿ੍ਫ਼ਤਾਰੀ ਤੋਂ ਬਚਣ ਲਈ ਖੁਦ ਨੂੰ ਆਪਣੇ ਘਰ ਬੰਦ ਕਰ ਲਿਆ | ਇਸ ਦੇ ਚਲਦਿਆਂ ਪੁਲਿਸ ਨੂੰ ਉਸ ਦੇ ਘਰ ਦੇ ਬਾਹਰ ਕਰੀਬ 6 ਘੰਟੇ ਉਡੀਕ ਕਰਨ ਦੇ ਬਾਅਦ ਜਿੰਦਰਾ ਖੋਲ੍ਹਣ ਵਾਲੇ ਨੂੰ ਬੁਲਾਉਣਾ ਪਿਆ | ਇਸ ਤੋਂ ਬਾਅਦ ਉਸ ਨੇ ਪੁਲਿਸ ਸਾਹਮਣੇ ਆਤਮ-ਸਮਰਪਣ ਕੀਤਾ | ਜਸੀਮੂਦੀਨ ਨੂੰ 2023 'ਚ ਦਰਜ 'ਪੋਕਸੋ' ਐਕਟ ਤਹਿਤ ਇਕ ਮਾਮਲੇ 'ਚ ਗਿ੍ਫ਼ਤਾਰ ਕੀਤਾ ਗਿਆ ਸੀ | ਦਾਸਗੁਪਤਾ ਨੂੰ ਸਨਿਚਰਵਾਰ ਸ਼ਾਮ ਜ਼ਬਰੀ ਵਸੂਲੀ, ਅਪਰਾਧਿਕ ਘੁਸਪੈਠ, ਅਪਰਾਧਿਕ ਧਮਕੀਆਂ ਤੇ ਅਗਜ਼ਨੀ ਦੀ ਕੋਸ਼ਿਸ਼ ਵਰਗੇ ਦੋਸ਼ਾਂ 'ਚ ਗਿ੍ਫ਼ਤਾਰ ਕੀਤਾ ਗਿਆ | ਉਸ ਦੇ ਸਹਿਯੋਗੀ ਸੌਰਵ ਘੋਸ਼ ਨੂੰ ਵੀ ਉਸ ਦੇ ਨਾਲ ਗਿ੍ਫ਼ਤਾਰ ਕੀਤਾ ਗਿਆ | ਐਤਵਾਰ ਨੂੰ ਜਦੋਂ ਪੁਲਿਸ ਦਾਸਗੁਪਤਾ ਨੂੰ ਅਲੀਪੁਰ ਅਦਾਲਤ 'ਚ ਲਿਜਾ ਰਹੀ ਸੀ ਤਾਂ ਪ੍ਰਦਰਸ਼ਨਕਾਰੀਆਂ ਨੇ ਉਸ 'ਤੇ ਆਂਡੇ ਸੁੱਟੇ | ਬਾਅਦ 'ਚ ਅਦਾਲਤ ਨੇ ਦਾਸਗੁਪਤਾ ਨੂੰ 14 ਦਿਨ ਤੇ ਘੋਸ਼ ਨੂੰ 11 ਦਿਨ ਤੱਕ ਪੁਲਿਸ ਹਿਰਾਸਤ 'ਚ ਭੇਜ ਦਿੱਤਾ | ਇਸ ਤੋਂ ਇਲਾਵਾ ਕੋਲਕਾਤਾ ਦੇ ਕਮਰਹਾਟੀ 'ਚ ਸਨਿਚਰਵਾਰ ਰਾਤ ਤਿ੍ਣਮੂਲ ਕਾਂਗਰਸ ਦੇ ਵਿਧਾਇਕ ਮਦਨ ਮਿੱਤਰਾ ਦੀ ਕਾਰ 'ਤੇ ਲੋਕਾਂ ਨੇ ਹਮਲਾ ਕਰ ਦਿੱਤਾ | ਅਰਿਯਾਦਾਹਾ ਇਲਾਕੇ 'ਚ ਇਹ ਘਟਨਾ ਉਸ ਸਮੇਂ ਵਾਪਰੀ ਜਦੋਂ ਵਿਧਾਇਕ ਇਲਾਕੇ ਦਾ ਦੌਰਾ ਕਰ ਰਿਹਾ ਸੀ | ਸਥਾਨਕ ਲੋਕਾਂ ਨੇ ਚੋਰ-ਚੋਰ ਦੇ ਨਾਅਰੇ ਲਗਾਉਂਦੇ ਹੋਏ ਵਿਧਾਇਕ ਦੀ ਕਾਰ 'ਤੇ ਆਂਡੇ ਸੁੱਟੇ | ਇਕ ਹੋਰ ਘਟਨਾ 'ਚ ਹਾਵੜਾ ਜ਼ਿਲ੍ਹੇ 'ਚ ਲੋਕਾਂ ਨੇ ਤਿ੍ਣਮੂਲ ਕਾਂਗਰਸ ਦੇ ਨੇਤਾ ਸੰਨਿਆਸੀ ਮੁੰਨਾ ਦਾ ਸਿਰ ਮੁੰਨ ਦਿੱਤਾ ਤੇ ਉਸ ਨੂੰ ਜੁੱਤੀਆਂ ਦਾ ਹਾਰ ਪਾ ਕੇ ਪੂਰੇ ਪਿੰਡ 'ਚ ਘੁਮਾਇਆ | ਅਮਰਦਾਹਾ ਪਿੰਡ ਦੇ ਲੋਕਾਂ ਦਾ ਕਹਿਣਾ ਹੈ ਕਿ ਮੁੰਨਾ ਭਲਾਈ ਯੋਜਨਾਵਾਂ ਦੇ ਨਾਂਅ 'ਤੇ ਲੋਕਾਂ ਤੋਂ ਪੈਸੇ ਵਸੂਲਦਾ ਸੀ | ਸੂਚਨਾ ਮਿਲਣ 'ਤੇ ਪੁਲਿਸ ਨੇ ਮੁੰਨਾ ਨੂੰ ਬਚਾਇਆ |