ਪਿੰਡ ਲਾਂਦੜਾ ਨਹਿਰ ਵਿੱਚ 40 ਸਾਲਾ ਤੈਰਦੀ ਹੋਈ ਲਾਸ਼ ਮਿਲੀ

ਅੱਪਰਾ, (ਜਲੰਧਰ), 23 ਜੁਲਾਈ (ਦਲਵਿੰਦਰ ਸਿੰਘ ਅੱਪਰਾ)- ਬਿਸਤ ਦੁਆਬ ਨਹਿਰ ਵਿਚ ਪਿੰਡ ਲਾਂਦੜਾ ਕਲੋਨੀ ਦੇ ਨਜ਼ਦੀਕ ਪੁਲ ਕੋਲ ਇਕ ਅਣ-ਪਛਾਤੀ ਤੈਰਦੀ ਹੋਈ ਲਾਸ਼ ਮਿਲੀ ਹੈ। ਇਸ ਸੰਬੰਧੀ ਵੇਰਵਾ ਦਿੰਦਿਆਂ ਸੁਖਵਿੰਦਰ ਪਾਲ ਸੋਡੀ ਇੰਚਾਰਜ ਪੁਲਿਸ ਚੌਂਕੀ ਅੱਪਰਾ ਨੇ ਦੱਸਿਆ ਕਿ ਅੱਜ ਸਵੇਰੇ ਪਿੰਡ ਵਾਸੀਆਂ ਨੇ ਨਹਿਰ ਵਿਚ ਤੈਰਦੀ ਹੋਈ ਇਕ ਨੌਜਵਾਨ ਦੀ ਲਾਸ਼ ਦੇਖੀ ਅਤੇ ਤੁਰੰਤ ਪੁਲਿਸ ਨੂੰ ਸੂਚਿਤ ਕੀਤਾ। ਸੂਚਨਾ ਮਿਲਦੇ ਹੀ ਉਹ ਆਪਣੀ ਟੀਮ ਲੈ ਕੇ ਪਿੰਡ ਲਾਂਦੜਾ ਕਲੋਨੀ ਦੇ ਨਜ਼ਦੀਕ ਪਹੁੰਚੇ ਤੇ ਪਿੰਡ ਵਾਸੀਆਂ ਦੀ ਮਦਦ ਦੇ ਨਾਲ ਲਾਸ਼ ਨੂੰ ਬਾਹਰ ਕੱਢਿਆ ਗਿਆ। ਉਨ੍ਹਾਂ ਦੱਸਿਆ ਕਿ ਲਾਸ਼ ਸ਼ਨਾਖਤ ਵਾਸਤੇ ਸਿਵਲ ਹਸਪਤਾਲ ਫਿਲੌਰ ਵਿਖੇ ਰੱਖ ਦਿੱਤੀ ਗਈ ਹੈ। ਉਨ੍ਹਾਂ ਦੱਸਿਆ ਕਿ ਇਸ ਵਿਅਕਤੀ ਦੀ ਉਮਰ ਕਰੀਬ 40 ਸਾਲ, ਸਿਰ ਤੋਂ ਮੋਨਾ, ਦਾੜੀ ਰੱਖੀ ਹੋਈ, ਰੰਗ ਕਣਕ ਵੰਨਾ ਹੈ। ਇਸ ਨੇ ਕਾਲੇ ਰੰਗ ਦੀ ਟੀ-ਸ਼ਰਟ ਤੇ ਫਿੱਕਾ ਨੀਲੇ ਰੰਗ ਦਾ ਪਜਾਮਾ ਪਹਿਨਿਆ ਹੋਇਆ ਹੈ। ਇਕ ਹੱਥ ’ਤੇ ਅੰਗਰੇਜ਼ੀ ਦਾ ਐਮ ਲਿਖਿਆ ਹੋਇਆ ਹੈ।