ਨਵੀਂ ਦਿੱਲੀ, 5 ਦਸੰਬਰ (ਮਿਸਰਦੀਪ ਭਾਟੀਆ)-ਦਿੱਲੀ ਯੂਨੀਵਰਸਿਟੀ ਅਤੇ ਰੂਸ ਦੀ ਐਚ. ਐਸ. ਈ. ਯੂਨੀਵਰਸਿਟੀ ਮਿਲ ਕੇ 'ਸਪੇਸ ਮਿਰਰ ਲੈਬ' ਸਥਾਪਿਤ ਕਰਨਗੇ | ਇਸ ਨੂੰ ਲੈ ਕੇ ਦਿੱਲੀ ਯੂਨੀਵਰਸਿਟੀ ਅਤੇ ਨੈਸ਼ਨਲ ਯੂਨੀਵਰਸਿਟੀ ਹਾਇਰ ਸਕੂਲ ਆਫ਼ ਇਕਨਾਮਿਕਸ (ਐਚ. ਐਸ. ਈ. ਯੂਨੀਵਰਸਿਟੀ) ਵਿਚਕਾਰ 'ਸਟੇਟਮੈਂਟ ਆਫ਼ ਕੋਆਪਰੇਸ਼ਨ' 'ਤੇ ਦਸਤਖ਼ਤ ਕੀਤੇ ਗਏ | ਇਸ ਮੌਕੇ ਦਿੱਲੀ ਯੂਨੀਵਰਸਿਟੀ ਦੇ ਵਾਈਸ ਚਾਂਸਲਰ ਪ੍ਰੋ: ਯੋਗੇਸ਼ ਸਿੰਘ ਨੇ ਕਿਹਾ ਕਿ ਇਹ ਬਹੁਤ ਹੀ ਖ਼ੁਸ਼ੀ ਦੀ ਗੱਲ ਹੈ ਕਿ ਦੋ ਮਿੱਤਰ ਦੇਸ਼ਾਂ ਦੇ ਦੋ ਵੱਡੇ ਸੰਸਥਾਨ ਸੰਯੁਕਤ ਰੂਪ ਵਿਚ ਅੱਗੇ ਆਏ ਹਨ | ਉਨ੍ਹਾਂ ਦੱਸਿਆ ਕਿ ਪ੍ਰਸਤਾਵਿਤ ਸਹਿਯੋਗ ਐਚ.ਐਸ.ਈ. ਯੂਨੀਵਰਸਿਟੀ ਦੇ ਨਾਲ ਮਿਲ ਕੇ ਦਿੱਲੀ ਯੂਨੀਵਰਸਿਟੀ ਦੀ ਫੈਕਲਟੀ ਆਫ਼ ਤਕਨਾਲੋਜੀ ਵਿਚ ਇਕ 'ਸਪੇਸ ਮਿਰਰ ਲੈਬ' ਬਣਾਉਣ ਲਈ ਹੈ | ਐਚ.ਐਸ.ਈ. ਯੂਨੀਵਰਸਿਟੀ ਦੀ ਰੈਕਟਰ ਡਾ. ਨਿਕਿਤਾ ਅਨੀਸਿਮੋਵਾ ਅਤੇ ਦਿੱਲੀ ਯੂਨੀਵਰਸਿਟੀ ਦੇ ਰਜਿਸਟਰਾਰ ਡਾ: ਵਿਕਾਸ ਗੁਪਤਾ ਨੇ ਵਾਈਸ ਚਾਂਸਲਰ ਦੀ ਮੌਜੂਦਗੀ ਵਿਚ ਸਮਝੌਤੇ 'ਤੇ ਦਸਤਖ਼ਤ ਕੀਤੇ | ਇਸ ਮੌਕੇ ਰੂਸੀ ਪੱਖ ਤੋਂ ਐਚ.ਐਸ.ਈ. ਯੂਨੀਵਰਸਿਟੀ ਦੇ ਉਪ ਪ੍ਰਧਾਨ ਡਾ. ਮਨੋਜ ਸ਼ਰਮਾ ਅਤੇ ਅਨਾਸਤਾਸੀਆ ਸਰਗੀਵਾ ਮੌਜੂਦਾ ਸਨ | ਡੀ.ਯੂ. ਵਲੋਂ ਕਾਲਜਾਂ ਡੀਨ ਪ੍ਰੋ: ਬਲਰਾਮ ਪਾਣੀ, ਐਸ.ਓ.ਐਲ. ਡਾਇਰੈਕਟਰ ਪ੍ਰੋ: ਪਾਇਲ ਮਾਗੋ ਤੇ ਹੋਰ ਅਧਿਕਾਰੀ ਮੌਜੂਦ ਸਨ |
