ਨਵੇਂ ਸਾਲ ਦੀ ਸਵੇਰ ਤੂੰ, ਨਿੱਘੀ ਕਿਰਨ ਬਖੇਰ।
ਘਰ ਘਰ ਹੋਵੇ ਰੌਸ਼ਨੀ, ਤੇ ਖ਼ੁਸ਼ੀਆਂ ਆਵਣ ਢੇਰ।
ਨਵੇਂ ਸਾਲ ਦੀ ਸਵੇਰ ਤੂੰ, ਨਵੇਂ ਲਿਆਵੀਂ ਰੰਗ।
ਸਿਰ ਫੁਲਕਾਰੀ ਰੰਗਲੀ, ਤੇ ਬਾਹੀਂ ਛਣਕੇ ਵੰਗ।
ਨਵੇਂ ਸਾਲ ਦੀ ਸਵੇਰ ਤੂੰ, ਸਭ ਨੂੰ ਲਾਵੀਂ ਭਾਗ,
ਹੱਸਦੀਆਂ ਰਹਿਣ ਸੁਹਾਗਣਾ, ਵਸਦੇ ਰਹਿਣ ਸੁਹਾਗ।
ਨਵੇਂ ਸਾਲ ਦੀ ਸਵੇਰ ਤੂੰ, ਨਵੀਂ ਲਿਆਵੀਂ ਰੁੱਤ,
ਹਰ ਇਕ ਮਾਂ ਦੀ ਗੋਦ ਵਿਚ, ਖੇਡਣ ਧੀਆਂ-ਪੁੱਤ।
ਨਵੇਂ ਸਾਲ ਦੀ ਸਵੇਰ ਤੂੰ, ਨਵੀਂ ਲਿਆਵੀਂ ਰੀਤ,
ਵਿਚ ਤ੍ਰਿੰਝਣ ਜੁੜ ਕੇ, ਸਖੀਆਂ ਗਾਵਣ ਗੀਤ।
ਨਵੇਂ ਸਾਲ ਦੀ ਸਵੇਰ ਤੂੰ, ਨਵੇਂ ਲਿਆਵੀਂ ਰਾਗ,
ਅਲਾਪਣ ਜਿਹਨੂੰ ਬੁਲਬਲਾਂ, ਰਹਿਣ ਬਸੇਰੇ ਬਾਗ।
ਨਵੇਂ ਸਾਲ ਦੀ ਸਵੇਰ ਤੂੰ, ਐਨਾ ਲਿਆਵੀਂ ਪਿਆਰ,
'ਮੀਆਂਪੁਰੀਆ' ਹਰ ਜ਼ਿਹਨ 'ਚੋਂ ਰੱਬ ਦੇ ਹੋਣ ਦੀਦਾਰ।
-ਪਿੰਡ ਮੀਆਂਪੁਰ ਚੰਗਰ (ਮੁਹਾਲੀ)।
ਮੋਬਾਈਲ : 98149-78620
