ਗੁਰਦਾਸਪੁਰ, 19 ਮਈ (ਅਸ਼ੋਕ ਸ਼ਰਮਾ)-ਥਾਣਾ ਪੁਰਾਣਾ ਸ਼ਾਲਾ ਅੰਦਰ ਪੈਂਦੇ ਪਿੰਡ ਪੰਡੋਰੀ ਮਹੰਤਾਂ ਵਿਖੇ 14 ਦਿਨ ਪਹਿਲਾਂ ਇਕ ਘਰ 'ਚ ਚੋਰਾਂ ਵਲੋਂ ਗਹਿਣੇ ਤੇ ਹੋਰ ਸਮਾਨ ਚੋਰੀ ਕਰ ਲਿਆ ਸੀ | ਪਰ ਸ਼ਾਲਾ ਨੇ ਇੰਨੇ ਦਿਨ ਬੀਤਣ ਦੇ ਬਾਵਜੂਦ ਅਜੇ ਤੱਕ ਕਾਰਵਾਈ ਨਹੀਂ ਕੀਤੀ | ਜਿਸ ਕਰਕੇ ਪਰਿਵਾਰ ਦਾ ਪੁਲਿਸ ਖ਼ਿਲਾਫ਼ ਭਾਰੀ ਰੋਸ ਹੈ | ਪੀੜਤ ਪਿੰਕੀ ਪਤਨੀ ਰੋਬਿਨ ਮਸੀਹ ਵਾਸੀ ਪੰਡੋਰੀ ਮਹੰਤਾਂ ਨੇ ਦੱਸਿਆ ਕਿ ਉਸ ਦੀ ਪਤੀ ਦੁਬਈ ਰਹਿੰਦਾ ਹੈ ਤੇ 6 ਮਈ ਨੰੂ ਉਹ ਮੁਹੱਲੇ 'ਚ ਸਤਿਸੰਗ ਸੁਣਨ ਲਈ ਪਰਿਵਾਰ ਸਮੇਤ ਗਈ ਸੀ ਕਿ ਜਦੋਂ ਉਹ ਰਾਤ 8 ਵਜੇ ਵਾਪਸ ਆਏ ਤਾਂ ਘਰ ਦਾ ਗੇਟ ਖੁੱਲ੍ਹਾ ਸੀ ਤੇ ਅੰਦਰ ਜਾ ਕੇ ਦੇਖਿਆ ਤਾਂ ਦਰਵਾਜ਼ੇ ਟੁੱਟੇ ਸਨ ਤੇ ਅਲਮਾਰੀ ਵਿਚ ਪਿਆ ਸਮਾਨ ਖਿੱਲਰਿਆ ਸੀ | ਜਦੋਂ ਕਿ ਟਰੰਕ ਦੇ ਤਾਲੇ ਵੀ ਟੁੱਟੇ ਸੀ, ਜਿਸ ਵਿਚ 4 ਤੋਲੇ ਸੋਨਾ ਗ਼ਾਇਬ ਸੀ ਤੇ ਹੋਰ ਸਮਾਨ ਬਚ ਗਿਆ | ਉਨ੍ਹਾਂ ਦੱਸਿਆ ਕਿ ਪੁਲਿਸ ਨੰੂ ਦੱਸਿਆ ਸੀ ਕਿ ਉਨ੍ਹਾਂ ਨੰੂ ਸ਼ੱਕ ਹੈ ਕਿ ਵਰੁਣ ਪੁੱਤਰ ਵੀਰੂ ਵਾਸੀ ਪੰਡੋਰੀ ਮਹੰਤਾਂ ਨੇ ਚੋਰੀ ਕੀਤੀ ਹੈ | ਪਰ ਪੁਲਿਸ ਵਲੋਂ ਉਨ੍ਹਾਂ ਪਾਸੋਂ ਗਹਿਣਿਆਂ ਦੀਆਂ ਰਸੀਦਾਂ ਦੀ ਮੰਗ ਕੀਤੀ ਜਾ ਰਹੀ ਹੈ | ਜਦੋਂ ਕਿ ਪੁਲਿਸ ਵਲੋਂ 7 ਮਈ ਦਾ ਮਾਮਲਾ ਦਰਜ ਕੀਤਾ ਹੈ | ਪਰ ਦੋਸ਼ੀਆਂ ਖ਼ਿਲਾਫ਼ ਕਾਰਵਾਈ ਨਹੀਂ ਕਰ ਰਹੀ | ਉਨ੍ਹਾਂ ਦੱਸਿਆ ਕਿ ਇਸ ਕੇਸ ਦੀ ਸੁਣਵਾਈ ਆਈ.ਓ ਸਬ ਇੰਸਪੈਕਟਰ ਨਿਰਮਲ ਸਿੰਘ ਕਰ ਰਹੇ ਹਨ ਜੋ ਉਨ੍ਹਾਂ ਨੰੂ ਵਾਰ ਵਾਰ ਗਹਿਣਿਆਂ ਦੇ ਬਿੱਲਾਂ ਦੀ ਮੰਗ ਕਰ ਰਹੇ ਹਨ | ਜਿਸ ਕਾਰਨ ਪੀੜਤ ਪਰਿਵਾਰ ਪ੍ਰੇਸ਼ਾਨੀ ਦੇ ਆਲਮ ਵਿਚ ਹੈ | ਉਨ੍ਹਾਂ ਜ਼ਿਲ੍ਹਾ ਪੁਲਿਸ ਮੁਖੀ ਪਾਸੋਂ ਮੰਗ ਕੀਤੀ ਕਿ ਦੋਸ਼ੀ ਨੰੂ ਗਿ੍ਫ਼ਤਾਰ ਕਰਕੇ ਪਰਿਵਾਰ ਨੰੂ ਇਨਸਾਫ਼ ਦਿਵਾਇਆ ਜਾਵੇ |
