ਪਟਿਆਲਾ, 1 ਮਾਰਚ (ਮਨਦੀਪ ਸਿੰਘ ਖਰੌੜ)-ਥਾਣਾ ਅਰਬਨ ਅਸਟੇਟ ਦੀ ਪੁਲਿਸ ਨੇ ਚੋਰੀ ਦੇ ਮੋਟਰਸਾਈਕਲ ਸਮੇਤ ਦੋ ਵਿਅਕਤੀਆਂ ਨੂੰ ਗਿ੍ਫ਼ਤਾਰ ਕੀਤਾ ਹੈ ਤਲਾਸ਼ੀ ਦੌਰਾਨ ਉਸ ਤੋਂ ਇਕ ਦਾਤਰ ਵੀ ਬਰਾਮਦ ਹੋਈ ਹੈ | ਮੁਲਜ਼ਮਾਂ ਦੀ ਪਹਿਚਾਣ ਸ਼ੁਭਮ ਅਤੇ ਮਨੀ ਵਾਸੀ ਜ਼ਿਲ੍ਹਾ ਪਟਿਆਲਾ ਵਜੋਂ ਹੋਈ ਹੈ | ਇਸ ਸੰਬੰਧੀ ਥਾਣੇਦਾਰ ਅਮਨਦੀਪ ਸਿੰਘ ਨੇ ਦਸਿਆ ਕਿ ਉਹ ਸਾਧੋਬੇਲਾ ਰੋਡ ਪਟਿਆਲਾ 'ਚ ਗਸ਼ਤ ਦੌਰਾਨ ਖੜ੍ਹੇ ਸੀ | ਇਸ ਦੌਰਾਨ ਉਨ੍ਹਾਂ ਨੂੰ ਸੂਚਨਾ ਮਿਲੀ ਕਿ ਮੁਲਜ਼ਮ ਦਾਤਰ ਦੀ ਨੋਕ 'ਤੇ ਲੋਕਾਂ ਤੋਂ ਮੋਬਾਈਲ ਅਤੇ ਲੁੱਟ ਖੋਹ ਕਰਦੇ ਹਨ | ਜਿਨ੍ਹਾਂ ਨੇ ਵਰਧਮਾਨ ਹਸਪਤਾਲ ਲਾਗੇ ਵੀ ਇਕ ਵਿਅਕਤੀ ਤੋਂ ਮੋਬਾਈਲ ਖੋਹਿਆ ਸੀ | ਇਸੇ ਸਿਲਸਿਲੇ ਤਹਿਤ ਮੁਲਜ਼ਮ ਸਾਧੋਬੇਲਾ ਰੋਡ ਲਾਗੇ ਘੁੰਮ ਰਹੇ ਸੀ ਜਿਨ੍ਹਾਂ ਨੂੰ ਨਾਕਾਬੰਦੀ ਦੌਰਾਨ ਕਾਬੂ ਕੀਤਾ ਗਿਆ ਅਤੇ ਤਲਾਸ਼ੀ ਦੌਰਾਨ ਉਨ੍ਹਾਂ ਤੋਂ ਫਰਜ਼ੀ ਨੰਬਰ ਲੱਗਿਆ ਇਕ ਮੋਟਰਸਾਈਕਲ ਤੇ ਇਕ ਦਾਤਰ ਬਰਾਮਦ ਹੋਇਆ | ਹਾਲੇ ਤਕ ਇਹ ਸਪਸ਼ਟ ਨਹੀਂ ਹੋ ਸਕਿਆ ਮੁਲਜ਼ਮਾਂ ਨੇ ਇਹ ਮੋਟਰਸਾਈਕਲ ਕਿਥੋਂ ਚੋਰੀ ਕੀਤਾ ਸੀ ਇਸ ਸੰਬੰਧੀ ਪੜਤਾਲ ਚਲ ਰਹੀ ਹੈ |
