ਬਾਲ ਗੀਤ ਪੰਛੀਆਂ ਦੀ ਉਡਾਣ

ਲੱਗਦਾ ਸਾਨੂੰ ਜੀਕੁਣ ਐਨਾ
ਹੁੰਦਾ ਨਹੀਂ ਆਸਾਨ
ਅੰਬਰ ਵਿਚ ਸੌਖ਼ੀ ਨਹੀਂ
ਪੰਛੀਆਂ ਦੀ ਉਡਾਣ

ਪਲ 'ਚ ਉੱਪਰ ਉੱਡਣਾ
ਹੋਰ ਉਤਾਂਹ ਜਾਣਾ
ਉੱਡਦੇ ਉੱਡਦੇ ਝੱਟ ਧਰਤੀ
'ਤੇ ਉਤਰ ਆਉਣਾ
ਲਾਉਂਦੇ ਹੋਣ ਜਦ ਕਲਾਬਾਜ਼ੀਆਂ
ਹੁੰਦੀ ਬੜੀ ਥਕਾਨ

ਹੁਨਰਮੰਦ ਪੰਛੀ ਭਰ ਲੈਂਦੇ
ਖੰਭਾਂ ਵਿਚ ਵਿਸ਼ਵਾਸ
ਉੱਡਦੇ ਪੰਛੀਆਂ ਸਾਹਵੇਂ
ਬੌਣਾ ਹੋ ਜਾਂਦਾ ਆਕਾਸ਼
ਨਿੱਕੇ-ਨਿੱਕੇ ਖੰਭ ਗਾਹ ਆਉਂਦੇ
ਨੇ ਕੀਕੁਣ ਅਸਮਾਨ

ਸਰਹੱਦਾਂ ਵੀ ਰੋਕਣ ਨਾ
ਉਡਾਣ ਪੰਛੀਆਂ ਦੀ
ਪੈਰੀ ਛੱਲੇ ਪਾ ਕੇ ਕਰਨ
ਪਛਾਣ ਪੰਛੀਆਂ ਦੀ
ਪੌਣਾਂ ਦੀ ਅਸਵਾਰੀ ਕਰਦੇ
ਹੱਦਬੰਨ੍ਹੇ ਲੰਘ ਜਾਣ
 
ਪੰਛੀਆਂ ਦੀ ਜਾਣੋ ਬੋਲੀ
ਸਾਨੂੰ ਕੀ ਕਹਿੰਦੇ
ਜ਼ਹਿਰੀ ਕਣ ਧੂੰਏਂ ਦੇ
ਮਾਰਨ ਨੂੰ ਪੈਂਦੇ
ਜ਼ਹਿਰੀ ਚੋਗੇ ਦੀ ਪੰਛੀ
ਕਿੱਦਾਂ ਕਰਨ ਪਛਾਣ

ਵੱਢੀ ਜਾਂਦੇ ਰੁੱਖ
ਉੱਜੜ ਜਾਂਦੇ ਨੇ ਆਲ੍ਹਣੇ
ਸੋਚੋ ਪੰਛੀਆਂ ਨੇ ਵੀ
ਹੁੰਦੇ ਬੋਟ ਪਾਲਣੇ
ਕਬਜ਼ਾ ਕਰਕੇ ਧਰਤੀ ਉੱਤੇ
ਬੈਠ ਗਿਆ ਇਨਸਾਨ

ਆਪਣੇ ਪਿਓ ਦਾਦੇ ਦੇ
ਲੋਕੋ ਬੋਲ ਪੁਗਾਉਣੇ
ਰੁੱਖ ਲਗਾਉਣੇ ਚੋਗਾ ਭਰ ਕੇ
ਆਲ੍ਹਣੇ ਵੀ ਲਟਕਾਉਣੇ
ਪੰਛੀਆਂ ਦੇ ਵਿਚ ਹੁੰਦੀ
ਸਾਡੇ ਵਰਗੀ ਜਾਨ

ਤੋਤੇ ਚਿੜੀਆਂ,ਮੋਰ ਗੁਟਾਰਾਂ
ਪਿਆਸੇ ਮੰਗਦੇ ਪਾਣੀ
ਦਾਣੇ ਮੰਗਣ
ਬੈਠਣ ਨੂੰ ਰੁੱਖ ਦੀ ਟਾਹਣੀ
ਧਰਤੀ ਉੱਤੇ ਲਾਉਣ ਛਹਿਬਰਾਂ
ਮਨਮੋਹਣੇ ਗੀਤ ਸੁਣਾਉਣ
-ਮੋਬਾਈਲ : 97806-67686