ਬੱਚਿਓ, ਊਠ ਨੂੰ 'ਮਾਰੂਥਲ ਦਾ ਜਹਾਜ਼' ਕਿਹਾ ਜਾਂਦਾ ਹੈ, ਤੁਹਾਨੂੰ ਪਤਾ ਹੈ |
ਕਿਉਂ? ਕਿਉਂਕਿ ਇਸ ਨੇ ਆਪਣੇ ਸਰੀਰ ਨੂੰ ਰੇਗਿਸਤਾਨ ਦੀਆਂ ਕਠੋਰ ਸਥਿਤੀਆਂ ਵਿਚ ਰਹਿਣ ਦੇ ਯੋਗ ਬਣਾ ਲਿਆ ਹੈ | ਊਠ ਦੇ ਇਹ ਸਰੀਰਕ ਅਨੁਕੂਲਣ ਹਨ |
• ਰੰਗ : ਇਸ ਦਾ ਭੂਰਾ ਰੰਗ ਰੇਤ ਦੇ ਟਿੱਬਿਆਂ ਨਾਲ ਮੇਲ ਖਾਂਦਾ ਹੈ, ਜੋ ਇਸ ਨੂੰ ਆਲੇ-ਦੁਆਲੇ ਵਿਚ ਰਲਣ ਵਿਚ ਮਦਦ ਕਰਦਾ ਹੈ |
• ਪੈਰ : ਰੇਤ ਉਤੇ ਆਸਾਨੀ ਨਾਲ ਚੱਲਣ ਲਈ ਇਸ ਦੇ ਪੈਰ ਚੌੜੇ ਅਤੇ ਚਪਟੇ ਹੁੰਦੇ ਹਨ |
• ਨੱਕ : ਇਸ ਦੇ ਨੱਕ ਉਤੇ ਪਰਦੇ ਹੁੰਦੇ ਹਨ, ਜੋ ਰੇਤਲੇ ਤੂਫਾਨ ਦੌਰਾਨ ਰੇਤ ਨੂੰ ਨੱਕ ਦੇ ਅੰਦਰ ਜਾਣ ਤੋਂ ਰੋਕਦੇ ਹਨ |
• ਪਾਣੀ ਦੀ ਵਰਤੋਂ : ਉੱਠ ਇਕ ਵਾਰ ਵਿਚ ਬਹੁਤ ਸਾਰਾ ਪਾਣੀ ਪੀ ਸਕਦਾ ਹੈ, ਜੋ ਇਸ ਦੇ ਸਰੀਰ ਦੇ ਟਿਸ਼ੂਆਂ ਵਿਚ ਜਮ੍ਹਾਂ ਹੋ ਜਾਂਦਾ ਹੈ | ਇਸ ਕਾਰਨ ਇਹ ਕਈ ਦਿਨਾਂ ਤੱਕ ਬਿਨਾਂ ਪਾਣੀ ਤੋਂ ਰਹਿ ਸਕਦਾ ਹੈ |
• ਕੁਹਾਣ : ਊਠ ਆਪਣੇ ਕੁਹਾਣ ਵਿਚ ਚਰਬ ਜਮ੍ਹਾਂ ਕਰਦਾ ਹੈ | ਜਦੋਂ ਭੋਜਨ ਦੀ ਕਮੀ ਹੁੰਦੀ ਹੈ, ਤਾਂ ਇਹ ਇਸ ਚਰਬੀ ਦੀ ਵਰਤੋਂ ਊਰਜਾ ਲਈ ਕਰਦਾ ਹੈ |
• ਪਾਣੀ ਦੀ ਬੱਚਤ : ਇਹ ਗੋਹੇ ਅਤੇ ਪਿਸ਼ਾਬ ਰਾਹੀਂ ਸਰੀਰ ਵਿਚੋਂ ਬਹੁਤ ਘੱਟ ਪਾਣੀ ਬਾਹਰ ਕੱਢਦਾ ਹੈ, ਤਾਂ ਜੋ ਪਾਣੀ ਦੀ ਬੱਚਤ ਹੋ ਸਕੇ |
• ਲੰਬੀਆਂ ਲੱਤਾਂ : ਇਸ ਦੀਆਂ ਲੰਬੀਆਂ ਲੱਤਾਂ ਸਰੀਰ ਨੂੰ ਗਰਮ ਰੇਤ ਤੋਂ ਦੂਰ (ਉੱਚਾ) ਰੱਖਣ ਵਿਚ ਮਦਦ ਕਰਦੀਆਂ ਹਨ |
-ਸ. ਸ. ਅਧਿਆਪਕਾ, ਸ.ਸ.ਸ. ਸਕੂਲ ਕਿਸ਼ਨ ਪੁਰਾ ਕਲਾਂ (ਮੋਗਾ) |
manpreetkpk1985@gmail.com
