ਨਵੀਂ ਦਿੱਲੀ 15 ਮਈ (ਡਾ. ਬਲਵਿੰਦਰ ਸਿੰਘ ਸੋਢੀ)-ਦੱਖਣੀ ਦਿੱਲੀ ਸਥਿਤ ਸਰੋਜਨੀ ਮਾਰਕੀਟ ਜੋ ਕਿ ਖ਼ਾਸ ਕਰਕੇ ਕੱਪੜੇ ਦੀ ਸਭ ਤੋਂ ਵੱਡੀ ਮਾਰਕੀਟ ਗਿਣੀ ਜਾਂਦੀ ਹੈ | ਦੁਕਾਨਦਾਰਾਂ ਅਤੇ ਵੈਂਡਰਜ਼ ਦੇ ਵਿਚ ਪੈਦਾ ਹੋਏ ਵਿਵਾਦ ਦਾ ਕੋਈ ਹੱਲ ਨਹੀਂ ਨਿਕਲ ਰਿਹਾ ਜਿਸ ਕਰਕੇ ਇਹ ਮਾਰਕੀਟ 14 ਮਈ ਅਤੇ ਅੱਜ (15 ਮਈ) ਨੂੰ ਬੰਦ ਰੱਖੀ ਗਈ ਹੈ | ਐਨ. ਡੀ. ਐਮ. ਸੀ. ਵਲੋਂ ਕੁੱਝ ਵੈਂਡਰਜ਼ ਨੂੰ ਇਥੇ ਥਾਂ ਦਿੱਤੀ ਜਾਣ ਦੇ ਫ਼ੈਸਲੇ ਵਿਰੁੱਧ ਸਰੋਜਨੀ ਨਗਰ ਦੇ ਦੁਕਾਨਦਾਰ ਨਾਰਾਜ਼ ਹਨ | ਇਨ੍ਹਾਂ ਦੁਕਾਨਦਾਰਾਂ ਦਾ ਕਹਿਣਾ ਹੈ ਕਿ ਇਹ ਮਾਰਕੀਟ ਪਹਿਲਾਂ ਵੀ ਘੱਟ ਥਾਂ 'ਤੇ ਚੱਲ ਰਹੀ ਹੈ | ਪਰ ਜੇਕਰ ਹੋਰ ਵੈਂਡਰਜ਼ ਆਉਣਗੇ ਤੇ ਹੋਰ ਭੀੜ ਹੋ ਜਾਵੇਗੀ ਅਤੇ ਨਾਲ ਹੀ ਸੁਰੱਖਿਆ ਵਿਵਸਥਾ 'ਤੇ ਅਸਰ ਹੋਵੇਗਾ | ਦੁਕਾਨਦਾਰਾਂ ਦਾ ਇਹ ਵੀ ਕਹਿਣਾ ਹੈ ਕਿ ਗਾਹਕਾਂ ਦੀ ਆਵਾਜਾਈ ਤੇ ਪਾਰਕਿੰਗ ਪ੍ਰਤੀ ਵੀ ਮੁਸ਼ਕਿਲ ਪੇਸ਼ ਆਵੇਗੀ | ਇਸ ਤਰ੍ਹਾਂ ਨਾਲ ਹੀ ਇਹ ਮਾਰਕੀਟ ਏਨੀ ਭਰ ਜਾਵੇਗੀ ਕਿ ਗਾਹਕਾਂ ਨੂੰ ਸਾਮਾਨ ਵਿਖਾਉਣ ਤੇ ਖਰੀਦਣ ਵਿਚ ਵੀ ਬਹੁਤ ਪ੍ਰੇਸ਼ਾਨੀ ਆਵੇਗੀ | ਇਥੋਂ ਦੇ ਦੁਕਾਨਦਾਰਾਂ ਦਾ ਕਹਿਣਾ ਹੈ ਕਿ ਇਸ ਮਾਮਲੇ ਪ੍ਰਤੀ ਉਹ ਕਈ ਵਾਰ ਗੱਲਬਾਤ ਕਰ ਚੁੱਕੇ ਹਨ ਪ੍ਰੰਤੂ ਕੁੱਝ ਵੀ ਨਾ ਹੋਣ 'ਤੇ ਅਖ਼ੀਰ ਉਹ ਮਜਬੂਰ ਹੋ ਗਏ ਹਨ ਕਿ ਮਾਰਕੀਟ ਬੰਦ ਰੱਖੀ ਜਾਵੇ | ਵਰਨਣਯੋਗ ਹੈ ਕਿ ਇਸ ਮਾਰਕੀਟ ਵਿਚੋਂ ਵਿਸ਼ੇਸ਼ ਕਰਕੇ ਰੇਡੀਮੇਡ ਕੱਪੜੇ ਦੀ ਖਰੀਦਦਾਰੀ ਲਈ ਦਿੱਲੀ ਤੋਂ ਇਲਾਵਾ ਹੋਰਾਂ ਰਾਜਾਂ ਤੋਂ ਵੀ ਲੋਕ ਆਉਂਦੇ ਹਨ | ਦੁਕਾਨਾਂ ਬੰਦ ਹੋਣ 'ਤੇ ਗਾਹਕ ਵੀ ਪ੍ਰੇਸ਼ਾਨ ਹੋ ਰਹੇ ਹਨ |
