ਪੋਕਸੋ ਮਾਮਲੇ ਦੇ ਦੋਸ਼ੀ ਵਲੋਂ ਜ਼ਮਾਨਤ ਮਿਲਦੇ ਹੀ ਆਪਣੇ 2 ਬੱਚਿਆਂ ਸਮੇਤ 6 ਦੀ ਹੱਤਿਆ

  ਹੈਦਰਾਬਾਦ, 11 ਜੁਲਾਈ (ਪੀ.ਟੀ.ਆਈ.)-ਪੋਕਸੋ ਮਾਮਲੇ ਦੇ ਦੋਸ਼ੀ 35 ਸਾਲਾ ਵਿਅਕਤੀ ਨੇ ਜ਼ਮਾਨਤ ਮਿਲਦੇ ਹੀ 6 ਵਿਅਕਤੀਆਂ ਦੀ ਹੱਤਿਆ ਕਰ ਦਿੱਤੀ, ਜਿਨ੍ਹਾਂ ’ਚ ਉਸ ਦੇ 2 ਬੱਚੇ ਅਤੇ ਸ਼ਿਕਾਇਤਕਰਤਾ ਪਰਿਵਾਰ ਦੇ 3 ਮੈਂਬਰ ਸ਼ਾਮਿਲ ਹਨ। ਫਿਊਚਰ ਸਿਟੀ ਪੁਲਿਸ ਕਮਿਸ਼ਨਰ ਤਰੁਣ ਜੋਸ਼ੀ ਨੇ ਪੱਤਰਕਾਰਾਂ ਨੂੰ ਦੱਸਿਆ ਕਿ ਦੋਸ਼ੀ ਪੀ. ਰਾਜਕੁਮਾਰ ਪਹਿਲਾਂ ਸ਼ਬਦ ਕਸਬੇ ਵਿਚ ਨਾਬਾਲਗ ਲੜਕੀ ਦੇ ਘਰ ਗਿਆ ਅਤੇ ਉਸ ਦੀ ਮਾਂ ਅਤੇ ਦਾਦੀ, ਜੋ ਸੌਂ ਰਹੀਆਂ ਸਨ, ਨੂੰ ਮਾਰ ਦਿੱਤਾ। ਫਿਰ ਉਹ ਨਾਬਾਲਗ ਲੜਕੀ ਨੂੰ ਇੱਕ ਕਾਰ ਵਿਚ ਆਪਣੇ ਜੱਦੀ ਪਿੰਡ ਧਾਈਵਾਲਗੁਡਾ ਲੈ ਗਿਆ ਅਤੇ ਇੱਕ ਝੀਲ ਦੇ ਨੇੜੇ ਉਸ ਨੂੰ ਚਾਕੂ ਮਾਰ ਕੇ ਮਾਰ ਦਿੱਤਾ। ਕਮਿਸ਼ਨਰ ਨੇ ਕਿਹਾ ਕਿ ਰਾਜਕੁਮਾਰ ਫਿਰ ਝੀਲ ਤੋਂ ਲਗਭਗ 250 ਮੀਟਰ ਦੂਰ ਆਪਣੇ ਘਰ ਗਿਆ ਅਤੇ ਆਪਣੀ ਪਤਨੀ (30 ਸਾਲ) ਅਤੇ ਆਪਣੇ 2 ਪੁੱਤਰਾਂ ਨੂੰ ਮਾਰ ਦਿੱਤਾ, ਜੋ ਸਾਰੇ ਸੁੱਤੇ ਪਏ ਸਨ।ਲੜਕੀ ਦੇ ਪਰਿਵਾਰ ਦੀ ਸ਼ਿਕਾਇਤ ਦੇ ਆਧਾਰ ’ਤੇ ਇਸ ਸਾਲ ਮਈ ’ਚ ਨਾਬਾਲਗ ਲੜਕੀ ਦਾ ਪਿੱਛਾ ਕਰਨ ਅਤੇ ਪ੍ਰੇਸ਼ਾਨ ਕਰਨ ਦੇ ਦੋਸ਼ ਵਿੱਚ ਵਿਅਕਤੀ ਵਿਰੁੱਧ ਪੋਕਸੋ ਐਕਟ ਤਹਿਤ ਮਾਮਲਾ ਦਰਜ ਕੀਤਾ ਗਿਆ ਸੀ। ਪੁਲਿਸ ਨੇ ਕਿਹਾ ਕਿ ਉਸ ਨੂੰ ਹਾਲ ਹੀ ਵਿੱਚ ਇਸ ਮਾਮਲੇ ਵਿਚ ਅਗਾਊਂ ਜ਼ਮਾਨਤ ਮਿਲੀ ਸੀ। ਪੁਲਿਸ ਨੇ ਦੱਸਿਆ ਕਿ ਕਤਲਾਂ ਤੋਂ ਤੁਰੰਤ ਬਾਅਦ ਦੋਸ਼ੀ ਨੇ ਆਪਣੇ ਪਿਤਾ ਨੂੰ ਫ਼ੋਨ ਕੀਤਾ ਅਤੇ ਅਪਰਾਧਾਂ ਦਾ ਇਕਬਾਲ ਕੀਤਾ। ਉਸ ਨੇ ਆਪਣੇ ਪਿਤਾ ਨੂੰ ਦੱਸਿਆ ਕਿ ਉਹ ‘ਖੁਦਕੁਸ਼ੀ’ ਕਰਨ ਜਾ ਰਿਹਾ ਹੈ ਅਤੇ ਫਿਰ ਫਾਹਾ ਲੈ ਲਿਆ। ਦੋਸ਼ੀ ਦੇ ਮਾਪਿਆਂ ਨੇ ਫਿਰ ਪੁਲਿਸ ਨੂੰ ਮਾਮਲੇ ਦੀ ਸੂਚਨਾ ਦਿੱਤੀ।